മലയാളത്തിലും തമിഴിലും സജീവമായി വര്‍ക്ക് ചെയ്യുന്ന കൊറിയോഗ്രാഫറാണ് ശാന്തി മാസ്റ്റര്‍. 1982ല്‍ ഒരു ഗ്രൂപ്പ് ഡാന്‍സറായിട്ടാണ് സിനിമയില്‍ കരിയര്‍ ആരംഭിക്കുന്നത്. പിന്നീട് 1986 മുതല്‍ ഇന്‍ഡിപെന്‍ഡന്റ് കൊറിയോഗ്രാഫറായി മാറുകയായിരുന്നു. നാല് പതിറ്റാണ്ടിലധികമായി നീണ്ടുനില്‍ക്കുന്ന കരിയറില്‍ ആയിരത്തിലധികം സിനിമകളുടെ ഭാഗമാകാന്‍ ശാന്തി മാസ്റ്റര്‍ക്ക് സാധിച്ചു.

മോഹന്‍ലാലിനെക്കുറിച്ച് സംസാരിക്കുകയാണ് ശാന്തി മാസ്റ്റര്‍. ഡാന്‍സിന്റെ കാര്യത്തില്‍ പലപ്പോഴും തങ്ങളെ അത്ഭുതപ്പെടുത്തിയിട്ടുള്ള നടനാണ് മോഹന്‍ലാലെന്ന് ശാന്തി മാസ്റ്റര്‍ പറഞ്ഞു. അസാധ്യ മെയ്‌വഴക്കമുള്ളയാണ് മോഹന്‍ലാലെന്നും എത്ര പ്രയാസമുള്ള സ്റ്റെപ്പും എളുപ്പത്തില്‍ അദ്ദേഹം പഠിച്ചെടുക്കുമെന്നും ശാന്തി കൂട്ടിച്ചേര്‍ത്തു.

കമലദളം എന്ന സിനിമ അതിന്റെ ഏറ്റവും വലിയ ഉദാഹരണമാണെന്നും അവര്‍ പറയുന്നു. ഭരതനാട്യം, കഥക്, ഫോക്ക് ഡാന്‍സ് എന്നിങ്ങനെ വ്യത്യസ്തമായിട്ടുള്ള ഡാന്‍സ് ഒറ്റ പാട്ടില്‍ പെര്‍ഫോം ചെയ്യണമായിരുന്നെന്നും മോഹന്‍ലാല്‍ അത് വളരെ സിമ്പിളായി അവതരിപ്പിച്ചെന്നും ശാന്തി മാസ്റ്റര്‍ പറഞ്ഞു. പോര്‍ട്രയല്‍സ് ബൈ ഗദ്ദാഫി എന്ന ചാനലിനോട് സംസാരിക്കുകയായിരുന്നു അവര്‍.

ലാല്‍ സാര്‍ ഡാന്‍സ് സീനില്‍ പലപ്പോഴും ഞെട്ടിച്ചിട്ടുണ്ട്. അത് എന്താണെന്ന് വെച്ചാല്‍, എത്ര പ്രയാസമുള്ള സ്റ്റെപ്പാണെങ്കിലും ഒറ്റ തവണ കാണിച്ചാല്‍ അദ്ദേഹം അത് ക്യാച്ച് ചെയ്യും. അതിനനുസരിച്ച് അദ്ദേഹത്തിന് മെയ് വഴക്കവുമുണ്ട്. നമ്മളെല്ലാം പലപ്പോഴും അത് കണ്ട് അന്തം വിട്ടിട്ടുണ്ട്. അതിന്റെ ഏറ്റവും വലിയ ഉദാഹരണമാണ് കമലദളം എന്ന സിനിമ.

അതിലെ ഒരു പാട്ടില്‍ നാലഞ്ച് ടൈപ്പ് ഡാന്‍സ് ചെയ്യാനുണ്ട്. ഭരതനാട്യം, കഥക്, ഫോക്ക് ഡാന്‍സ്. അതില്‍ തന്നെ കഥക് വളരെ പ്രയാസമുള്ള ഒന്നാണ്. ഒരു ഷോട്ടില്‍ ആറ് റൗണ്ട് കറങ്ങി ഒരു പോസില്‍ നില്‍ക്കുന്ന സ്‌റ്റെപ്പുണ്ട്. തുടങ്ങിയ സ്ഥലത്ത് തന്നെ നില്‍ക്കുന്ന ഷോട്ടായിട്ടാണ് പ്ലാന്‍ ചെയ്തത്. മോനിഷക്ക് അത് എത്ര തവണ നോക്കിയിട്ടും ഒരു സ്ഥലത്ത് നില്‍ക്കാന്‍ പറ്റുന്നില്ല.

ലാല്‍ സാറിന്റെ ഷോട്ട് മാത്രം നോക്കാമെന്ന് തീരുമാനിച്ചു. എന്നോട് കറക്ടായി ആറ് വരെ എണ്ണാന്‍ ലാല്‍ പറഞ്ഞു. ഞാന്‍ അതുപോലെ ചെയ്തു. ആ ആറ് കറക്കവും അത് കഴിഞ്ഞുള്ള പോസും പെര്‍ഫെക്ടായി അദ്ദേഹം പ്രസന്റ് ചെയ്തു. എങ്ങനെയാണ് അത് സാധിച്ചതെന്ന് എനിക്കറിയില്ല,’ ശാന്തി മാസ്റ്റര്‍ പറയുന്നു.

Content Highlight: Shanti Master about Mohanlal’s dance in Kamaladalam movie