മലയാളികള്‍ക്ക് ഏറെ പ്രിയപ്പെട്ട നടനും സംവിധായകനുമാണ് ലാല്‍. മിമിക്രിയിലൂടെയാണ് അദ്ദേഹം സിനിമയിലേക്കെത്തുന്നത്. സംവിധായകന്‍ സിദ്ദീഖിനൊപ്പവും മലയാളത്തിന് നിരവധി സിനിമകള്‍ സമ്മാനിച്ച അദ്ദേഹം ഒരുപാട് സിനിമകളില്‍ അഭിനയിക്കുകയും ചെയ്തിട്ടുണ്ട്.

1997ല്‍ ജയരാജ് സംവിധാനം ചെയ്ത കളിയാട്ടത്തില്‍ പനിയന്‍ എന്ന വില്ലന്‍ കഥാപാത്രത്തെ അവതരിപ്പിച്ചുകൊണ്ടായിരുന്ന ലാല്‍ തന്റെ അഭിനയ ജീവിതം ആരംഭിക്കുന്നത്. മലയാളത്തിന് പുറമെ തമിഴ്, തെലുങ്ക്, ഇംഗ്ലീഷ്, കന്നഡ, ഹിന്ദി തുടങ്ങിയ ഭാഷകളിലും അദ്ദേഹം അഭിനയിച്ചിരുന്നു.

ഇപ്പോള്‍ നാന സിനിമാവാരികക്ക് നല്‍കിയ അഭിമുഖത്തില്‍ സഹോ (2019) എന്ന ഹിന്ദി സിനിമയില്‍ അഭിനയിക്കുമ്പോഴുണ്ടായ ഒരു അനുഭവം പങ്കുവെക്കുകയാണ് ലാല്‍. അന്ന് തന്നെ പരിചയപ്പെടുത്തിയ സമയത്ത് ജാക്കി ഷ്‌റോഫിന്റെ റിയാക്ഷന്‍ കണ്ട് താന്‍ അമ്പരന്നുപോയെന്നാണ് ലാല്‍ പറയുന്നത്.

തന്റെ വലിയ ഫാനാണ് ജാക്കി ഷ്‌റോഫ് പറഞ്ഞുവെന്നും അതോടെ ലാലെന്ന് കേട്ടപ്പോള്‍ മോഹന്‍ലാലാണെന്ന് കരുതിയാണോ അദ്ദേഹം സംസാരിക്കുന്നതെന്ന് തനിക്ക് സംശയമായെന്നും ലാല്‍ പറഞ്ഞു. പക്ഷെ പിന്നീട് അദ്ദേഹം തന്റെ സിനിമയുടെ പേര് പറഞ്ഞത് കേട്ടപ്പോള്‍ താന്‍ ഞെട്ടിയെന്നും ലാല്‍ കൂട്ടിച്ചേര്‍ത്തു.

‘ഞാന്‍ സഹോ എന്ന ഹിന്ദി പടത്തില്‍ അഭിനയിക്കുമ്പോള്‍ ആ സിനിമയില്‍ ജാക്കി ഷ്‌റോഫ് ഉണ്ടായിരുന്നു. എന്നെ പരിചയപ്പെടുത്തിയ സമയത്ത് അദ്ദേഹത്തിന്റെ റിയാക്ഷന്‍ കണ്ട് ഞാന്‍ അമ്പരന്നുപോയി. അയ്യോ, ഞാന്‍ നിങ്ങളുടെ വലിയ ഫാനാണ് എന്നായിരുന്നു അദ്ദേഹം പറഞ്ഞത്.

നിങ്ങളുടെ പടങ്ങളൊക്കെ കണ്ടിട്ടുണ്ട്. പേരൊന്നും അറിയില്ല. അതോടെ ലാലെന്ന് കേട്ടപ്പോള്‍ മോഹന്‍ലാലാണെന്ന് ധരിച്ചിട്ടാണോ അദ്ദേഹം സംസാരിക്കുന്നതെന്ന് എനിക്ക് സംശയമായി. ഞാന്‍ സംശയത്തോടെ നിന്നു.

പിന്നീട് അദ്ദേഹം കൂടെ നിന്നവരോട് പടത്തിന്റെ പേര് ചോദിച്ച് പറഞ്ഞപ്പോള്‍ ശരിക്കും ഞാന്‍ ഷോക്ക്ഡായി പോയി. ജാക്കി ഷ്‌റോഫിന്റെ പടങ്ങള്‍ ഏതൊക്കെയാണെന്ന് ചോദിച്ചാല്‍ എനിക്ക് ഓര്‍മ വരില്ല. അത്രയും ആഴത്തില്‍ നമ്മളെ അവര്‍ വാച്ച് ചെയ്യുന്നുണ്ട്. അത് വലിയ കാര്യമല്ലേ,’ ലാല്‍ പറയുന്നു.

Content Highlight: Lal Talks About Jackie Shroff And Mohanlal