ശക്തമായി തിരിച്ചുവന്നു, എല്ലാ ക്രെഡിറ്റും അവന് നല്‍കണം: ലക്ഷ്മണ്‍

സിംബാബ്‌വേക്കെതിരെയുള്ള മൂന്ന് ടി-20 മത്സരങ്ങളുടെ പരമ്പര തൂത്തുവാരിയിരിക്കുകയാണ് ഇന്ത്യ. ടി-20 ലോകകപ്പിന് ശേഷവും പുതിയ നായകന്‍ ശ്രേയസ് അയ്യരുടെ കീഴിലുള്ള ഇന്ത്യയുടെ ആദ്യ ടി-20 പരമ്പര വിജയമാണിത്.

ഹരാരെ സ്പോര്‍ട്സ് ക്ലബ്ബില്‍ നടന്ന അവസാന മത്സരത്തില്‍ 35 റണ്‍സിന്റെ തകര്‍പ്പന്‍ വിജയമാണ് ഇന്ത്യ സ്വന്തമാക്കിയത്. മത്സരത്തില്‍ ടോസ് നേടി ആദ്യം ബാറ്റ് ചെയ്ത ഇന്ത്യ അഞ്ച് വിക്കറ്റ് നഷ്ടത്തില്‍ 192 റണ്‍സാണ് നേടിയത്. വിജയലക്ഷ്യം പിന്തുടര്‍ന്ന സിംബാബ്‌വേ ഇന്നിങ്‌സ് ഏഴ് വിക്കറ്റ് നഷ്ടത്തില്‍ 157 റണ്‍സില്‍ അവസാനിച്ചു.

𝗪.𝗜.𝗡.𝗡.𝗘.𝗥.𝗦 🏆

A dominant performance from #TeamIndia as we clinch a 3️⃣-0️⃣ clean sweep over Zimbabwe 👏👏 pic.twitter.com/qb9tc3mI6t

— BCCI (@BCCI) July 26, 2026

ഇപ്പോള്‍ പരമ്പരക്ക് പിന്നാലെ ഇന്ത്യന്‍ ക്യാപ്റ്റന്‍ ശ്രേയസ് അയ്യരെ പ്രശംസിച്ചിരിക്കുകയാണ് പരിശീലകന്‍ വി.വി.എസ് ലക്ഷ്മണ്‍. എല്ലാ ക്രെഡിറ്റും ശ്രേയസ് അയ്യര്‍ക്ക് നല്‍കണമെന്നാണ് ലക്ഷ്മണ്‍ പറഞ്ഞത്.

ടീമിലെ എല്ലാ താരങ്ങളെയും മികച്ച രീതിയില്‍ അയ്യര്‍ പിന്തുണച്ചുവെന്നും ക്യാപ്റ്റനായുള്ള ശ്രേയസിന്റെ തുടക്കം മികച്ചതല്ലായിരുന്നുവെന്നും എന്നാല്‍ പിന്നീട് ശക്തമായ തിരിച്ചുവരവ് നടത്തിയെന്നും ലക്ഷ്മണ്‍ വ്യക്തമാക്കി.

‘ക്യാപ്റ്റന്‍ ശ്രേയസ് അയ്യര്‍ക്ക് എല്ലാ ക്രെഡിറ്റും നല്‍കണം. അദ്ദേഹം എല്ലാ താരങ്ങളെയും മികച്ച രീതിയില്‍ പിന്തുണച്ചു. ടീമില്‍ അദ്ദേഹത്തിന് എപ്പോഴും ആത്മവിശ്വാസം ഉണ്ടായിരുന്നു. ക്യാപ്റ്റനെന്ന നിലയില്‍ അദ്ദേഹത്തിന്റെ തുടക്കം മികച്ചതായിരുന്നില്ല. എന്നാല്‍ പിന്നീട് അദ്ദേഹം ശക്തമായി തിരിച്ചുവന്നു. ആദ്യ മത്സരത്തിന് മുമ്പായി ഞങ്ങളോടൊപ്പം ചേര്‍ന്ന ആദ്യ ദിവസം മുതല്‍ തന്നെ അദ്ദേഹം വളരെ ആത്മവിശ്വാസത്തിലായിരുന്നു,’ വി.വി.എസ് ലക്ഷ്മണ്‍ പറഞ്ഞു.

ക്യാപ്റ്റനായി ചുമതലയേറ്റ ശേഷം നടന്ന അയര്‍ലാന്‍ഡ്, ഇംഗ്ലണ്ട് എന്നീ ടീമുകള്‍ക്കെതിരെയുള്ള പരമ്പരകൾ ശ്രേയസിന്റെ കീഴില്‍ ഇന്ത്യ പരാജയപ്പെട്ടിരുന്നു. എന്നാല്‍ മൂന്നാം പരമ്പരയില്‍ ഇന്ത്യ അയ്യരുടെ കീഴില്‍ വിജയം കൈവരിച്ചിരിക്കുകയാണ്. ഇനി അയ്യരുടെയും സംഘത്തിന്റെയും മുന്നിലുള്ള പ്രധാന ലക്ഷ്യം ഏഷ്യന്‍ ഗെയിംസ് ആയിരിക്കും. സെപ്റ്റംബര്‍ 17നാണ് ഏഷ്യന്‍ ഗെയിംസിന് തുടക്കമാവുന്നത്.

Content Highlight: V.V.S Laxman praises Indian T20 captain Shreyas Iyer