ഓരോ വിമാനത്തിനും 526 കോടി രൂപയ്ക്ക് പകരം 1670 കോടി ചെലവായത് എന്തുകൊണ്ടാണ്?; റഫാലില്‍ മൂന്ന് ചോദ്യങ്ങളുമായി രാഹുല്‍ ഗാന്ധി
national news
ഓരോ വിമാനത്തിനും 526 കോടി രൂപയ്ക്ക് പകരം 1670 കോടി ചെലവായത് എന്തുകൊണ്ടാണ്?; റഫാലില്‍ മൂന്ന് ചോദ്യങ്ങളുമായി രാഹുല്‍ ഗാന്ധി
ന്യൂസ് ഡെസ്‌ക്
Wednesday, 29th July 2020, 9:23 pm

 

ന്യൂദല്‍ഹി: ഇന്ത്യന്‍ വ്യോമസേനയുടെ ഭാഗമായെത്തിയ റഫാല്‍ വിമാന വിഷയത്തില്‍ പ്രതികരണവുമായി കോണ്‍ഗ്രസ് നേതാവ് രാഹുല്‍ ഗാന്ധിയുടെ ട്വീറ്റ്. വിമാനങ്ങള്‍ സ്വന്തമാക്കിയ സേനയുടെ നേട്ടത്തെ അഭിനന്ദിക്കുന്നതിനോടൊപ്പം കേന്ദ്ര സര്‍ക്കാരിനോട് ചില ചോദ്യങ്ങളും അദ്ദേഹം ചോദിക്കുന്നു.

മൂന്ന് ചോദ്യങ്ങളടങ്ങിയ അദ്ദേഹം ട്വീറ്റ് ചെയ്തത്. അംബാലയില്‍ അഞ്ച് റഫാല്‍ വിമാനങ്ങളെത്തിയെന്ന വാര്‍ത്തയ്ക്ക് പിന്നാലെയായിരുന്നു രാഹുലിന്റെ ട്വീറ്റ്.

റഫാല്‍ സ്വന്തമാക്കിയ വ്യോമസേനയ്ക്ക് അഭിനന്ദനങ്ങള്‍

എന്നിരുന്നാലും കേന്ദ്രസര്‍ക്കാരിനോട് മൂന്ന് ചോദ്യങ്ങള്‍ ചോദിക്കാനുണ്ട്.

1. ഓരോ വിമാനത്തിനും 526 കോടി രൂപയ്ക്ക് പകരം 1670 കോടി ചെലവായത് എന്തുകൊണ്ടാണ്?

2. 126 വിമാനങ്ങള്‍ക്ക് പകരം 36 വിമാനങ്ങള്‍ മാത്രം വാങ്ങിയത് എന്തുകൊണ്ടാണ്?

3. എന്തിനാണ് എച്ച്.എ.എല്ലിന് പകരം ദരിദ്രനായ അനിലിന് 3000 കോടിയുടെ കരാര്‍ നല്‍കിയത്?

 

 

അതേസമയം കോണ്‍ഗ്രസ് സര്‍ക്കാരിന്റെ കാലത്ത് ആരംഭിച്ച നടപടികളാണ് റഫാല്‍ വിമാനങ്ങള്‍ എത്തുന്നതിനുള്ള കാരണമെന്ന് രാഹുല്‍ നേരത്തെ ട്വീറ്റ് ചെയ്തിരുന്നു.

2012ല്‍ റഫാലിനെ തിരിച്ചറിയുന്നതിനും വാങ്ങുന്നതിനും കോണ്‍ഗ്രസ് സര്‍ക്കാര്‍ സ്വീകരിച്ച നടപടികളുടെ ഗുണം ഇപ്പോള്‍ ഉണ്ടായെന്നും ട്വീറ്റിലുണ്ട്. മന്‍മോഹന്‍ സിങ് സര്‍ക്കാരിന്റെ കരാറും മോദി സര്‍ക്കാരിന്റെ കരാറും തമ്മിലുള്ള വ്യത്യാസവും ട്വീറ്റില്‍ ചൂണ്ടിക്കാണിച്ചിട്ടുണ്ട്.

കോണ്‍ഗ്രസിന്റെ കരാറും ബി.ജെ.പിയുടെ കരാറും തമ്മിലുള്ള പ്രധാന വ്യത്യാസം, ബി.ജെ.പിയുടെ കരാര്‍ പ്രകാരം 36 വിമാനങ്ങള്‍ ലഭിക്കുമ്പോള്‍ കോണ്‍ഗ്രസ് കരാര്‍ പ്രകാരം 126 വിമാനങ്ങള്‍ ലഭിക്കുമെന്നതായിരുന്നു. 108 വിമാനങ്ങള്‍ ഇന്ത്യയില്‍ നിര്‍മ്മിക്കുമായിരുന്നു. ഏതാണ്ട് 2016ല്‍ രാജ്യത്തിന് വിമാനങ്ങള്‍ ലഭിക്കേണ്ടതായിരുന്നു. 526 കോടി രൂപയായിരുന്നു ഒരു റഫാല്‍ വിമാനത്തിന്റെ വിലയെന്നും ട്വീറ്റില്‍ പറയുന്നു.

കഴിഞ്ഞ ലോക്സഭ തെരഞ്ഞെടുപ്പില്‍ കോണ്‍ഗ്രസും രാഹുല്‍സ ഗാന്ധിയും റഫാല്‍ ഇടപാടിനെ മുന്‍നിര്‍ത്തി ബി.ജെ.പിയെ ആക്രമിച്ചിരുന്നു. കുറഞ്ഞ എണ്ണം വിമാനങ്ങള്‍ ലഭിക്കുന്നതിനുള്ള ഉത്തരവാദിത്വം മോദി സര്‍ക്കാരിനാണ് എന്നായിരുന്നു പ്രധാന വിമര്‍ശനം.

 

ഡൂള്‍ന്യൂസിനെ ഫേസ്ബുക്ക്ടെലഗ്രാം, പേജുകളിലൂടെയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക

ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ