![?php echo $post['title']; ?>](https://assets.doolnews.com/w/900x473/2026/10/ind-3.jpg)
ഇന്ത്യയ്‌ക്കെതിരായ അഞ്ച് മത്സരങ്ങള്‍ അടങ്ങുന്ന ടി-20 പരമ്പരയിലെ നാലാം മത്സരത്തില്‍ വമ്പന്‍ വിജയം സ്വന്തമാക്കി ന്യൂസിലാന്‍ഡ്. ഈഡന്‍ പാര്‍ക്കില്‍ നടക്കുന്ന മത്സരത്തില്‍ 87 റണ്‍സിന്റെ കൂറ്റന്‍ വിജയമാണ് കിവീസ് പട സ്വന്തമാക്കിയത്. മത്സരത്തില്‍ ടോസ് നഷ്ടപ്പെട്ട് ബാറ്റിങ്ങിന് ഇറങ്ങിയ കിവീസ് ഏഴ് വിക്കറ്റ് നഷ്ടത്തില്‍ 259 റണ്‍സിന്റെ കൂറ്റന്‍ ടോട്ടലാണ് ഇന്ത്യക്കെതിരെ അടിച്ചെടുത്തത്.
അന്താരാഷ്ട്ര ടി-20യില്‍ ഇന്ത്യക്കെതിരെ ന്യൂസിലാന്‍ഡ് നേടുന്ന ഏറ്റവും ഉയര്‍ന്ന സ്‌കോറാണിത്. മാത്രമല്ല ഇന്ത്യക്കെതിരെ അന്താരാഷ്ട്ര ടി-20യില്‍ ഒരു ടീം നേടുന്ന ഏറ്റവും ഉയര്‍ന്ന സ്‌കോറും ഇതാണ്.
A night to remember in the City of Sails 👌 #NZvIND | 📸 = @PhotosportNZ https://t.co/fQfGlHGVWu
— BLACKCAPS (@BLACKCAPS) October 30, 2026
മറുപടി ബാറ്റിങ്ങിനിറങ്ങിയ ഇന്ത്യയ്ക്ക് നിശ്ചിത ഓവറില്‍ ഒമ്പത് വിക്കറ്റ് നഷ്ടത്തില്‍ 172 റണ്‍സ് മാത്രമാണ് നേടാന്‍ സാധിച്ചത്.
ഇതോടെ ന്യൂസിലാന്‍ഡ് ഒരു ചരിത്ര നേട്ടത്തിലും തങ്ങളുടെ കയ്യൊപ്പ് പതിപ്പിച്ചിരിക്കുകയാണ്. ടി-20യില്‍ ഇന്ത്യയ്‌ക്കെതിരെ റണ്‍സിന്റെ അടിസ്ഥാനത്തില്‍ ഏറ്റവും വലിയ രണ്ടാമത്തെ വിജയം സ്വന്തമാക്കിയ ടീമാകാനാണ് ന്യൂസിലാന്‍ഡിന് സാധിച്ചത്. ഈ വര്‍ഷം ഇംഗ്ലണ്ട് 125 റണ്‍സിന് ഇന്ത്യയെ പരാജയപ്പെടുത്തിയിരുന്നു. ഇന്ന് (വെള്ളി) ഈഡന്‍ പാര്‍ക്കില്‍ നടന്ന മത്സരത്തില്‍ കിവീസ് 87 റണ്‍സിന് പരാജയപ്പെടുത്തിയതോടെ റെക്കോഡില്‍ രണ്ടാം സ്ഥാനം പിടിക്കാന്‍ മിച്ചല്‍ സാന്റ്‌നറിനും സംഘത്തിനും സാധിച്ചു.
ന്യൂസിലാന്‍ഡ് വെടിക്കെട്ട് വീരന്‍ ഗ്ലെന്‍ ഫിലിപ്‌സിന്റെ സെഞ്ച്വറി കരുത്തിലാണ് കിവീസ് പട വമ്പന്‍ സ്‌കോറില്‍ എത്തിയത്. മത്സരത്തില്‍ ഗ്ലെന്‍ ഫിലിപ്‌സ് 49 പന്തില്‍ നിന്ന് 107 റണ്‍സ് നേടിയാണ് തിളങ്ങിയത്. 10 സിക്‌സും ആറ് ഫോറും ഉള്‍പ്പെടുന്നതായിരുന്നു താരത്തിന്റെ വെടിക്കെട്ട് ബാറ്റിങ്. 218.37 എന്ന സ്‌ട്രൈക്ക് റേറ്റില്‍ ആയിരുന്നു താരം ബാറ്റ് വീശിയത്. ഫിലിപ്‌സിന് പുറമേ 25 പന്തില്‍ 65 റണ്‍സ് നേടി മിച്ചല്‍ ബ്രേസ്‌വെല്ലും തകര്‍ത്തടിച്ചു. ആറ് സിക്‌സും നാല് ഫോറുമായിരുന്നു താരം നേടിയത്. ഓപ്പണര്‍ ഫിന്‍ അലന്‍ 31 റണ്‍സ് നേടിയിരുന്നു.
ഇന്ത്യക്കുവേണ്ടി ബൗളിങ്ങില്‍ തിളങ്ങിയത് മൂന്ന് വിക്കറ്റ് നേടിയ മായങ്ക് യാദവാണ്. അര്‍ഷ്ദീപ് സിങ്, അക്‌സര്‍ പട്ടേല്‍, നിതീഷ് കുമാര്‍ റെഡ്ഡി, പ്രിന്‍സ് യാദവ് എന്നിവര്‍ ഓരോ വിക്കറ്റ് നേടി. 64 റണ്‍സായിരുന്നു നാല് ഓവറില്‍ നിന്ന് നിതീഷ് കുമാര്‍ റെഡ്ഡി വഴങ്ങിയത്.
അതേസമയം ഇന്ത്യയ്ക്ക് വേണ്ടി ഉയര്‍ന്ന സ്‌കോര്‍ നേടിയത് തിലക് വര്‍മയാണ്. 35 പന്തില്‍ 35 റണ്‍സാണ് താരം നേടിയത്. നമന്‍ ധിര്‍ 28 റണ്‍സും അഭിഷേക് ശര്‍മ 22 റണ്‍സും നേടി മടങ്ങി. ടീമിലേക്ക് തിരിച്ചെത്തിയ ഇഷാന്‍ കിഷന്‍ മൂന്ന് പന്ത് നേരിട്ട് പൂജ്യത്തിനാണ് മടങ്ങിയത്. ഓപ്പണിങ് പൊസിഷനിലേക്ക് തിരിച്ചെത്തിയ സഞ്ജു സാംസണ്‍ രണ്ട് പന്തില്‍ നാല് റണ്‍സും നേടി പുറത്തായി. ന്യൂസിലാന്‍ഡിന് വേണ്ടി നാല് വിക്കറ്റ് നേടി തിളങ്ങാന്‍ ജേക്കബ് ഡഫിക്ക് സാധിച്ചു. ക്യാപ്റ്റന്‍ സാന്റ്‌നര്‍, മാത്യു ഫിഷര്‍ എന്നിവര്‍ രണ്ട് വിക്കറ്റ് വീതം നേടി.
