സച്ചിൻ സൃഷ്ടിച്ച ചരിത്രം തകർത്തു; സേനയിലെ ഏകാധിപതിയായി കിങ് കോഹ്‌ലി

ന്യൂസിലാൻഡിനെതിരെയുള്ള അഞ്ച് ഏകദിന മത്സരങ്ങളുടെ പരമ്പരയിലെ ആദ്യ മത്സരത്തിൽ ഇന്ത്യ അഞ്ച് വിക്കറ്റിന്റെ തകർപ്പൻ വിജയം കൈപ്പിടിയിലാക്കിയിരിക്കുകയാണ്. ഓക്‌ലൻഡിലെ ഈഡൻ പാർക്കിൽ നടന്ന മത്സരത്തിൽ ടോസ് നേടി ബൗളിങ് തെരഞ്ഞെടുത്ത ഇന്ത്യ കിവീസിനെ 40.2 ഓവറിൽ 185 റൺസിന് ഓൾ ഔട്ട് ആക്കി.

മറുപടി ബാറ്റിങ്ങിൽ ഇന്ത്യയുടെ സ്‌കോർ 10.5 ഓവറിൽ 54/1 എന്ന നിലയിൽ നിൽക്കുമ്പോൾ മഴ പെയ്തു. അതോടെ ഡക്ക് വർത്ത് ലൂയിസ് നിയമപ്രകാരം വിജയലക്ഷ്യം 40 ഓവറിൽ 167 റൺസായി പുനർനിർണയിച്ചു. മത്സരം പുനരാരംഭിച്ചെങ്കിലും 12ാം ഓവറിൽ വീണ്ടും മഴപെയ്തു. അതോടെ ലക്ഷ്യം 32 ഓവറിൽ 143 റൺസായി വീണ്ടും ചുരുക്കി.

വിരാട് കോഹ്‌ലിയുടെ അർദ്ധ സെഞ്ച്വറിയുടെ കരുത്തിലാണ് ഇന്ത്യ തകർപ്പൻ വിജയം സ്വന്തമാക്കിയത്. 51 പന്തിൽ 13 ഫോറും ഒരു സിക്‌സറുമടക്കം 74 റൺസ് നേടിയാണ് കോഹ്‌ലി തിളങ്ങിയത്. ഈ തകർപ്പൻ പ്രകടനത്തോടെ ഒരു ചരിത്ര നേട്ടവും ചെയ്‌സ് മാസ്റ്റർ കൈപ്പിടിയിലാക്കി.

Eden Park, graced by a @imVkohli special 💙 #TeamIndia | #NZvIND https://t.co/WTwONltwNw

— BCCI (@BCCI) November 4, 2026

ഇന്റർനാഷണൽ ക്രിക്കറ്റിൽ സേന രാജ്യങ്ങൾക്കെതിരെ (സൗത്ത് ആഫ്രിക്ക, ഓസ്ട്രേലിയ, ന്യൂസിലാൻഡ്, ഓസ്ട്രേലിയ) ഏറ്റവും കൂടുതൽ 50+ സ്‌കോറുകൾ നേടുന്ന താരമായാണ് വിരാട് മാറിയത്. 134 തവണയാണ് സേന രാജ്യങ്ങൾക്കെതിരെ കോഹ്‌ലി 50 കടന്നത്. ഇന്ത്യൻ ഇതിഹാസം സച്ചിൻ ടെൻഡുൽക്കറിനെ മറികടന്നാണ് വിരാട് ഒന്നാമനായത്.

ഇന്റർനാഷണൽ ക്രിക്കറ്റിൽ SENA രാജ്യങ്ങൾക്കെതിരെ ഏറ്റവും കൂടുതൽ 50+ സ്‌കോറുകൾ നേടിയ താരം, 50+ സ്കോറുകളുടെ എണ്ണം, ടീം

വിരാട് കോഹ്‌ലി – 134 – ഇന്ത്യ

സച്ചിൻ ടെണ്ടുൽക്കർ – 133 – ഇന്ത്യ

ബ്രയാൻ ലാറ – 100 – വെസ്റ്റ് ഇൻഡീസ്

കുമാർ സംഗക്കാര – 97 – ശ്രീലങ്ക

ശിവനരെയ്ൻ ചന്ദർപോൾ – 89 – വെസ്റ്റ് ഇൻഡീസ്

രാഹുൽ ദ്രാവിഡ് – 89 – ഇന്ത്യ

മഹേല ജയവർധനെ – 87 – ശ്രീലങ്ക

വിവ് റിച്ചാർഡ്സ് – 86 – വെസ്റ്റ് ഇൻഡീസ്

ബാബർ അസം – 83 – പാകിസ്ഥാൻ

ഡെസ്മണ്ട് ഹെയ്ൻസ് – 81 – വെസ്റ്റ് ഇൻഡീസ്

അതേസമയം മത്സരത്തിന്റെ ആദ്യ ഓവറിന്റെ അവസാന പന്തിൽ രോഹിത് ശർമ റൺസൊന്നുമെടുക്കാതെ പുറത്തായിരുന്നു. പിന്നീട് ശുഭ്മൻ ഗില്ലിനെ കൂട്ടുപിടിച്ച് വിരാട് കോഹ്‌ലി രണ്ടാം വിക്കറ്റിൽ സെഞ്ച്വറി കൂട്ടുകെട്ടുണ്ടാക്കിയിരുന്നു. ഗിൽ 56 പന്തിൽ 37 റൺസ് നേടി ഇന്ത്യയുടെ വിജയത്തിൽ നിർണായകമായി.

PHOTO-X.COM/BCCI

43 പന്തിൽ 38 റൺസെടുത്ത് ടിം സീഫർട്ട് ആണ് ന്യൂസിലാൻഡിന്റെ ടോപ് സ്‌കോറർ. അവസാന വിക്കറ്റിൽ നാല് സിക്‌സറും ഒരു ഫോറും ഉൾപ്പെടെ 34 റൺസ് നേടിയ ബ്ലെയിർ തിക്‌നറാണ് കിവീസിനെ പൊരുതാവുന്ന സ്‌കോറിൽ എത്തിച്ചത്. 30 റൺസ് നേടിയ ഗ്ലെൻ ഫിലിപ്‌സ്, 28 റൺസ് നേടിയ ഡാരിൽ മിച്ചൽ എന്നിവരാണ് കിവീസിന് വേണ്ടി പൊരുതിയവർ.

ഇന്ത്യയ്ക്ക് വേണ്ടി അർഷ്ദീപ് സിങ് നാലും ഗുർനൂർ ബ്രാർ മൂന്നും അൻഷുൽ കാംബോജ് രണ്ടും വിക്കറ്റെടുത്തു. ന്യൂസിലാൻഡിന് വേണ്ടി ജേക്കബ് ഡഫി മൂന്ന് വിക്കറ്റും കൈൽ ജാമിസണും നഥാൻ സ്മിത്തും ഓരോ വിക്കറ്റ് വീതവും വീഴ്ത്തി.

നവംബർ ഏഴിനാണ് പരമ്പരയിലെ രണ്ടാം മത്സരം നടക്കുന്നത്. വെല്ലിങ്ടണാണ് വേദി.

Content Highlight: Virat Kohli break Sachin Tendulker record against SENA countries