![?php echo $post['title']; ?>](https://assets.doolnews.com/w/900x473/2024/06/roo.jpg)
അയര്ലന്ഡിനെ തരിപ്പണമാക്കിയാണ് ഇന്ത്യ ടി-20 ലോകകപ്പിലെ ആദ്യ മത്സരത്തില് വിജയിച്ച് കയറിയത്. ന്യൂയോര്ക്കിലെ ഈസ്റ്റ് മെഡോയില് നടന്ന മത്സരത്തില് എട്ട് വിക്കറ്റിനായിരുന്നു ഇന്ത്യയുടെ വിജയം.
മത്സരത്തില് ടോസ് നേടിയ ഇന്ത്യന് നായകന് രോഹിത് ശര്മ എതിരാളികളെ ബാറ്റിങ്ങിനയച്ചു. ക്യാപ്റ്റന്റെ തീരുമാനം ശരിവെച്ച് ബൗളര്മാര് പന്തെറിഞ്ഞപ്പോള് അയര്ലന്ഡ് പതറി. ഒടുവില് 16 ഓവറില് 96 റണ്സിന് പച്ചക്കിളികളെ രോഹിത്തും സംഘവും മടക്കിക്കെട്ടിയത്. ഇന്ത്യ 12.2 ഓവറിലാണ് മത്സരം ഫിനിഷ് ചെയ്തത്.
മറുപടി ബാറ്റിങ്ങിന് ഇറങ്ങിയ ഇന്ത്യയ്ക്ക് വിരാടിനെ ഒരു റണ്സിന് നഷ്ടമായപ്പോള് രോഹിത് ശര്മയുടെ വെടിക്കെട്ട് പ്രകടനത്തിലാണ് ഇന്ത്യ കുതിപ്പ് തുടങ്ങിയത്. മൂന്ന് സിക്സും നാല് ഫോറും ഉള്പ്പെടെ 37 പന്തില് 52 റണ്സ് നേടിയാണ് രോഹിത് തകര്ത്താടിയത്. ഇതോടെ ഒരു തകര്പ്പന് റെക്കോഡും സ്വന്തമാക്കിയിരിക്കുകയാണ് ഇന്ത്യന് ക്യാപ്റ്റന്. ഐ.സി.സി.യുടെ മെത്തം ഇവന്റില് ഏറ്റവും കൂടുതല് സിക്സറുകള് നേടുന്ന ഇന്ത്യന് താരം എന്ന ബഹുമതിയാണ് രോഹിത്തിനെ തേടി വന്നിരിക്കുന്നത്. 100 സിക്സുകളാണ് താരം സ്വന്തമാക്കിയത്.
ഐ.സി.സി.യുടെ മെത്തം ഇവന്റില് ഏറ്റവും കൂടുതല് സിക്സറുകള് നേടുന്ന ഇന്ത്യന് താരം, സിക്സറിന്റെ എണ്ണം
രോഹിത് ശര്മ – 100*
വിരാട് കോഹ്ലി – 50
യുവരാജ് സിങ് – 48
സൗരവ് ഗാംഗുലി – 42
എം.എസ്. ധോണി – 35
സച്ചിന് ടെണ്ടുല്ക്കര് – 34
കിടിലന് ഇന്നിങ്സില് പരിക്ക് മൂലം റിട്ടയേഡ് ഔട്ട് ആവുകയായിരുന്നു രോഹിത്. ഒപ്പം നിന്ന റിഷബ് പന്ത് രണ്ട് സിക്സും മൂന്ന് ഫോറും അടക്കം 26 പന്തില് 36 റണ്സ് നേടി മത്സരം അനായാസം ഫിനിഷ് ചെയ്യുകയായിരുന്നു.
പേസര്മാരായിരുന്നു ഇന്ത്യയുടെ കരുത്ത്. അയര്ലന്ഡിന്റെ എട്ട് വിക്കറ്റുകളും പിഴുതെറിഞ്ഞത് പേസര്മാര് തന്നെയായിരുന്നു. ഹര്ദിക് പാണ്ഡ്യ മൂന്ന് വിക്കറ്റ് വിക്കറ്റ് നേടിയപ്പോള് ബുംറയും അര്ഷ്ദീപും രണ്ട് വിക്കറ്റ് വീതവും സിറാജും അക്സര് പട്ടേലും ഓരോ വിക്കറ്റ് വീതവും നേടി.
ഈ വിജയത്തോടെ ഗ്രൂപ്പ് എ-യില് ഒന്നാം സ്ഥാനത്തെത്തിയിരിക്കുകയാണ് ഇന്ത്യ. ജൂണ് ഒമ്പതിനാണ് ഇന്ത്യയുടെ അടുത്ത മത്സരം. ന്യൂയോര്ക്കില് നടക്കുന്ന മത്സരത്തില് പാകിസ്ഥാനാണ് എതിരാളികള്.
Content Highlight: Rohit Sharma In Record Achievement In t20 World Cup 2024
