ഹരിപ്പാട്: ഫിലിം കോണ്‍ക്ലേവിന്റെ സമാപന ചടങ്ങില്‍ നടത്തിയ വിവാദ പ്രസ്താവന സംവിധായകന്‍ അടൂര്‍ ഗോപാലകൃഷ്ണന്‍ പിന്‍വലിക്കണമെന്ന് കോണ്‍ഗ്രസ് നേതാവ് രമേശ് ചെന്നിത്തല.

അടൂര്‍ ഗോപാലകൃഷ്ണനെ പോലെയുള്ള ഒരാളില്‍ നിന്ന് സ്ത്രീകള്‍ക്കും ദളിത് വിഭാഗത്തിനും എതിരെ ഒരു പരാമര്‍ശമുണ്ടാവാന്‍ പാടില്ലാത്തതായിരുന്നുവെന്നും രമേശ് ചെന്നിത്തല പറഞ്ഞു. സമൂഹ മാധ്യമങ്ങളില്‍ പങ്കുവെച്ച കുറിപ്പിലൂടെയാണ് കോണ്‍ഗ്രസ് എം.എല്‍.എയുടെ പ്രതികരണം.

പിന്നോക്കക്കാരെയും സ്ത്രീകളെയും സമൂഹത്തിന്റെ മുഖ്യധാരയിലേക്ക് കൈപിടിച്ചുയര്‍ത്തുക എന്നതാണ് നമ്മുടെ ലക്ഷ്യം. ഇത്തരം പരാമര്‍ശങ്ങള്‍ പാര്‍ശ്വവത്ക്കരിക്കപ്പെട്ടവരുടെ വളര്‍ച്ചയെ ദുര്‍ബലപ്പെടുത്താനെ ഉതകൂ എന്നും രമേശ് ചെന്നിത്തല ചൂണ്ടിക്കാട്ടി.

സമൂഹത്തില്‍ രൂഢമൂലമായ ചില ജാതി, ആണധികാര ചിന്തകളെ ശക്തിപ്പെടുത്തുന്ന തരത്തിലുള്ള നിലപാടാണിത്. അത് അദ്ദേഹം മനപൂര്‍വം പറഞ്ഞതല്ല എന്ന് വിശ്വസിക്കുന്നുവെന്നും രമേശ് ചെന്നിത്തല കുറിച്ചു. അവസരം കിട്ടാത്തത് മൂലം തഴയപ്പെടുന്നവരെ കൈപിടിച്ചു മുന്നോട്ട് കൊണ്ടുവരാനാണ് ശ്രമിക്കേണ്ടത്. അതല്ലാതെ അത്തരം ശ്രമങ്ങളെ തടയിടുന്ന തരത്തില്‍ കാര്യങ്ങളെ കാണാന്‍ ശ്രമിക്കരുതെന്നും രമേശ് ചെന്നിത്തല പറഞ്ഞു.