മലയാളികള്‍ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് എമ്പുരാന്‍. 2019ല്‍ പുറത്തിറങ്ങിയ ലൂസിഫറിന്റെ രണ്ടാം ഭാഗമായാണ് എമ്പുരാന്‍ ഒരുങ്ങുന്നത്.

തന്റെ ഇഷ്ടനടനെ കാണാനാഗ്രഹിക്കുന്ന രീതിയില്‍ പൃഥ്വിരാജ് ആദ്യചിത്രത്തില്‍ തന്നെ അവതരിപ്പിച്ചത് പ്രേക്ഷകര്‍ ഇരുകൈയും നീട്ടി സ്വീകരിച്ചു. ആ വര്‍ഷത്തെ ഏറ്റവും വലിയ വിജയമായി ലൂസിഫര്‍ മാറി. ആദ്യഭാഗത്തെക്കാള്‍ വലിയ രീതിയിലാണ് പൃഥ്വിരാജ് എമ്പുരാന്‍ അണിയിച്ചൊരുക്കുന്നത്.

മുരളി ഗോപിയാണ് രണ്ട്‍ സിനിമയുടെയും രചന നിർവഹിച്ചത്. ലൂസിഫർ മൂന്ന് ഭാഗങ്ങളായി നിർമിക്കാൻ തീരുമാനിച്ച സിനിമയാണെന്നും മൂന്നാംഭാഗം തന്റെ മനസിലുണ്ടെന്നും മുരളി ഗോപി പറയുന്നു. താൻ എഴുതിയ കമ്മാര സംഭവം എന്ന സിനിമയ്ക്ക് ഒരു രണ്ടാംഭാഗം ഒരുക്കണമെന്ന ആഗ്രഹമുണ്ടായിരുന്നുവെന്നും എന്നാൽ ഒന്നാംഭാഗം തന്നെ പരാജയപെട്ടതുകൊണ്ടാണ് പിന്നീട് അതിന് ശ്രമിക്കാതിരുന്നതെന്നും മുരളി ഗോപി കൂട്ടിച്ചേർത്തു.

‘ലൂസിഫര്‍ എന്ന് പറയുന്നത് വലിയ വിജയമായ സിനിമയാണ്. അതിന്റെ രണ്ടാം ഭാഗം എന്ന നിലയില്‍ അതിന് അതിന്റേതായ പ്രതീക്ഷകള്‍ ഉണ്ടെന്ന് മനസിലാക്കുന്നു. കൂടുതല്‍ പറയാത്തതാണ് നല്ലത് എന്നു തോന്നുന്നു. പ്രേക്ഷകര്‍ കണ്ട് വിധിയെഴുതട്ടെ. മൂന്ന് പാര്‍ട്ട് ആയിട്ട് തന്നെയാണ് സിനിമ കണ്‍സീവ് ചെയ്തത്. അതിന്റെ രണ്ടാം സെഗ്മെന്റ് എന്ന് ഇതിനെ പറയാം.

ലൂസിഫറിനേക്കാള്‍ വലുതാക്കണം എന്ന നിര്‍ബന്ധബുദ്ധിയൊന്നുമില്ല. മനസില്‍ തോന്നിയത് ആത്മാര്‍ത്ഥമായി എഴുതിയിട്ടുണ്ട്. ഇത് കഴിഞ്ഞിട്ടേ മൂന്നാം ഭാഗത്തെ കുറിച്ചൊക്കെ തീരുമാനിക്കുകയുള്ളൂ. ഇതിന്റെ റിസപ്ഷന്‍ എങ്ങനെയാണ് എന്ന് നോക്കണമല്ലോ. അല്ലാതെ തീരുമാനിക്കാന്‍ പറ്റില്ല. നേരത്തെ ഞാന്‍ പറഞ്ഞിരുന്നു.

കമ്മാരസംഭവം രണ്ട് പാര്‍ട്ടായി കണ്‍സീവ് ചെയ്ത സിനിമയാണ്. എന്നാല്‍ ആദ്യത്തെ പാര്‍ട്ട് ഹിറ്റായില്ല.

അത്രയും മുതല്‍മുടക്കുള്ള ഒരു സിനിമ അങ്ങനെ പോകുമ്പോള്‍ സെക്കന്റ് പാര്‍ട്ടിന് നാച്ചുറലി ഒരു തടസം നേരിടും. നമുക്ക് ഒന്നും പറയാന്‍ പറ്റില്ല. എന്ത് സംഭവിച്ചാലും അത് നേരിടുക എന്നേയുള്ളൂ.

2022 ആഗസ്റ്റിലാണ് എമ്പുരാന്റെ ലോക്ക് ചെയ്ത സ്‌ക്രിപ്റ്റ് ഞാന്‍ രാജുവിന് കൊടുത്തത്. അത് കഴിഞ്ഞ് പിന്നെ ഡിസ്‌ക്ഷനും കാര്യങ്ങളുമായിരുന്നു. പിന്നെ നല്ലൊരു റാപ്പോ ഞങ്ങള്‍ക്കിടയിലുണ്ട്. അത് ക്രിയേറ്റീവ് ആയുള്ള റാപ്പോ ആണ്. അത് വളരെ ഹെല്‍പ്ഫുള്ളുമാണ്. നമ്മള്‍ ഒരു കാര്യം പറയുമ്പോഴും എഴുതുമ്പോഴും പെട്ടെന്ന് അത് മനസിലാകുന്ന ഡയറക്ടറാണ് അദ്ദേഹം. ഒന്നും എക്‌സ്‌പ്ലൈന്‍ ചെയ്യേണ്ട കാര്യമില്ല. പിന്നെ എല്ലാ സംശയങ്ങളും ഷൂട്ടിന് മുന്‍പ് ചോദിച്ച് അതിന് എല്ലാ നിവാരണവും വരുത്തിയിട്ടാണ് രാജു ഷൂട്ടിന് ഇറങ്ങുന്നത്. വളരെ മെട്രിക്കുലസാണ് അദ്ദേഹം,’ മുരളി ഗോപി പറഞ്ഞു.

Content Highlight: Murali Gopy About Kammara Sambhavam Movie