അവന്‍ ഇന്ത്യന്‍ ടീമില്‍ ഇടം നേടിയതില്‍ ഒട്ടും അത്ഭുതമില്ല; സൂപ്പര്‍ താരത്തെക്കുറിച്ച് ലോക്കി ഫെര്‍ഗൂസന്‍

ഇന്ത്യയും ന്യൂസിലാന്‍ഡും തമ്മിലുള്ള അഞ്ച് മത്സരങ്ങള്‍ അടങ്ങുന്ന ടി-20 പരമ്പര ഒക്ടോബര്‍ 22നാണ് ആരംഭിക്കുന്നത്. പരമ്പരയിലെ ആദ്യ മത്സരത്തിന് മുന്നോടിയായി ഇന്ത്യന്‍ യുവതാരം വൈഭവ് സൂര്യവംശിയെ കുറിച്ച് സംസാരിക്കുകയാണ് ന്യൂസിലാന്‍ഡ് സൂപ്പര്‍ തരം ലോക്കി ഫെര്‍ഗൂസന്‍.

ഐ.പി.എല്ലില്‍ രാജസ്ഥാന്‍ റോയല്‍സിന് വേണ്ടി കളിക്കുന്ന വൈഭവിനെ താന്‍ നേരിട്ടിട്ടുണ്ടെന്ന് പഞ്ചാബ് കിങ്‌സ് താരമായ ലോക്കി ഫെര്‍ഗൂസന്‍ പറഞ്ഞു. വൈഭവിന് അതിശയകരമായ കഴിവുണ്ടെന്നും ഇത് താരത്തിന്റെ ആദ്യത്തെ ന്യൂസിലാന്‍ഡ് പര്യടനം ആയിരിക്കുമെന്നും പില്ലുവിളികള്‍ക്കായി ആകാംക്ഷയുടെ കാത്തിരിക്കുകയാണെന്നും ഫെര്‍ഗൂസന്‍ കൂട്ടിച്ചേര്‍ത്തു.

‘ഐ.പി.എല്ലില്‍ ഞാന്‍ അവനെതിരെ കളിച്ചിട്ടുണ്ട്. അപാരമായ പ്രതിഭയുള്ള താരമാണ് വൈഭവ്. അതിശയിപ്പിക്കുന്ന കഴിവുകളാണ് അവനുള്ളത്. ഇന്ത്യന്‍ ടീമില്‍ വൈഭവ് ഇടം നേടിയതില്‍ ഒട്ടും അത്ഭുതമില്ല. തുടര്‍ച്ചയായി അവന്‍ ഐ.പി.എല്‍ സീസണുകളില്‍ കളിക്കുകയും മികച്ച പ്രകടനം കാഴ്ചവെക്കുകയും ചെയ്തിട്ടുണ്ടെന്നാണ് ഞാന്‍ കരുതുന്നത്.

ന്യൂസിലാന്‍ഡിലെ വെല്ലുവിളിക്കായി ഞാന്‍ ആകാംക്ഷയോടെ കാത്തിരിക്കുകയാണ്. ഇതായിരിക്കും അദ്ദേഹത്തിന്റെ ആദ്യ ന്യൂസിലാന്‍ഡ് പര്യടനമെന്നാണ് ഞാന്‍ കരുതുന്നത്. നേരത്തെ അദ്ദേഹം ഇവിടെ ക്രിക്കറ്റ് കളിച്ചിട്ടുണ്ടോ എന്ന കാര്യത്തില്‍ എനിക്ക് പൂര്‍ണമായ ഉറപ്പില്ല. എന്തായാലും, ഇത് മികച്ചൊരു പരമ്പരയായിരിക്കും,’ ലോക്കി ഫെര്‍ഗൂസണ്‍ പറഞ്ഞു.

വൈഭവ് സൂര്യവംശി. Photo: BCCI/x.com

ഐ.പി.എല്ലിലെ വമ്പന്‍ പ്രകടനങ്ങളിലൂടെ ക്രിക്കറ്റ് ലോകത്ത് ശ്രദ്ധ നേടിയ 16 വയസുള്ള താരമാണ് വൈഭവ്. ഇതുവരെയായി എട്ട് ടി-20കളില്‍ ഇന്ത്യയ്ക്കായി കളത്തിലിറങ്ങിയ വൈഭവ് സൂര്യവംശി, 186.36 സ്ട്രൈക് റേറ്റിലും 30.75 ശരാശരിയിലും 246 റണ്‍സ് നേടിയിട്ടുണ്ട്. രണ്ട് അര്‍ധ സെഞ്ച്വറികളും ഇക്കൂട്ടത്തില്‍ ഉള്‍പ്പെടുന്നു. ഇംഗ്ലണ്ട് പരമ്പയില്‍ അരങ്ങേറ്റം നടത്തിയ താരത്തിന് മികച്ച പ്രകടനം നടത്താന്‍ സാധിച്ചില്ലായിരുന്നു.

എന്നാല്‍ ഇന്ത്യ-അഫ്ഗാനിസ്ഥാന്‍ പരമ്പരയില്‍ മികച്ച പ്രകടനമാണ് താരം നടത്തിയത്. ഏഷ്യന്‍ ഗെയിംസിലും താരം മികവ് തെളിയിച്ചിരുന്നു. നിലവില്‍ നടക്കുന്ന വിന്‍ഡീസ് പരമ്പരയില്‍ വൈഭവിന് കളിക്കാന്‍ അവസരം ലഭിച്ചിട്ടില്ല. ഓപ്പണറായി സഞ്ജു സാംസണും അഭിഷേക് ശര്‍മയുമാണ് ഇന്ത്യയ്ക്ക് വേണ്ടി കളിക്കുന്നത്. യുവ താരത്തിന് വൈകാതെ അവസരം ലഭിക്കുമെന്നാണ് ആരാധകര്‍ പ്രതീക്ഷിക്കുന്നത്.

വെസ്റ്റ് ഇന്‍ഡീസും ഇന്ത്യയും തമ്മിലുള്ള ടി-20 പരമ്പരയിലെ ആദ്യ മൂന്ന് മത്സരം അവസാനിച്ചപ്പോള്‍ ഇന്ത്യ 2-1ന് മുമ്പിലാണ്. നാളെയാണ് (ഒക്ടോബര്‍ 14ന്) പരമ്പരയിലെ നാലാം മത്സരം. ഹൈദരാബാദാണ് വേദി.

Content Highlight: lockie ferguson Talking About Indian Young Player Vaibhav Sooryavanshi