ലോക്ക്ഡൗണിന് ശേഷം തീയേറ്റര്‍ റിലീസ് ചെയ്യുന്ന ആദ്യ മലയാള ചിത്രമായി 'വെള്ളം'; റിലീസ് തിയ്യതി പ്രഖ്യാപിച്ചു
Entertainment
ലോക്ക്ഡൗണിന് ശേഷം തീയേറ്റര്‍ റിലീസ് ചെയ്യുന്ന ആദ്യ മലയാള ചിത്രമായി 'വെള്ളം'; റിലീസ് തിയ്യതി പ്രഖ്യാപിച്ചു
ന്യൂസ് ഡെസ്‌ക്
Tuesday, 12th January 2021, 8:41 pm

ഏറെ നാളത്തെ കാത്തിരിപ്പിന് ശേഷം കേരളത്തില്‍ തീയേറ്ററുകള്‍ തുറക്കുകയാണ്. ഇതിനോടൊപ്പം എത്തിയിരിക്കുന്ന മറ്റൊരു സന്തോഷം തിയേറ്ററില്‍ ആദ്യം റിലീസ് ചെയ്യുന്ന മലയാള ചിത്രവും പ്രഖ്യാപിച്ചു എന്നതാണ്.

ജയസൂര്യ നായകനായെത്തുന്ന ‘വെള്ളം’ ആണ് തീയേറ്റര്‍ റിലീസിനൊരുങ്ങുന്ന ആദ്യ മലയാള ചിത്രം. ജനുവരി 22നാണ് ചിത്രത്തിന്റെ റിലീസ്.

തീയേറ്റര്‍ റിലീസിനെത്തുന്ന ആദ്യ ചിത്രം വിജയ് നായകനായെത്തുന്ന മാസ്റ്ററാണ്. കഴിഞ്ഞ ഏപ്രില്‍ മാസം റിലീസ് ചെയ്യേണ്ടിയിരുന്ന മാസ്റ്റര്‍ കൊവിഡ് ഭീഷണി മൂലം മാറ്റി വെയ്ക്കുകയായിരുന്നു.

ബോക്‌സ് ഓഫീസില്‍ വലിയ വിജയമായി തീര്‍ന്ന കൈദിയ്ക്ക് ശേഷം ലോകേഷ് കനകരാജ് സംവിധാനം ചെയ്യുന്ന ചിത്രമാണ് മാസ്റ്റര്‍. വിജയും വിജയ് സേതുപതിയും ആദ്യമായാണ് ഒരുമിച്ചഭിനയിക്കുന്നതെന്ന പ്രത്യേകതയും ചിത്രത്തിനുണ്ട്. വിജയ്‌യുടെ 64ാമത് ചിത്രമാണിത്.

ക്യാപ്റ്റന്‍ സിനിമയ്ക്ക് ശേഷം ജയസൂര്യ നായകനായി പ്രജേഷ് സെന്‍ സംവിധാനം ചെയ്യുന്ന ചിത്രമാണ് ‘വെള്ളം’. നേരത്തെ സിനിമയുടെ ക്യാരക്ടര്‍ പോസ്റ്റര്‍ പുറത്തുവിട്ടിരുന്നു. ‘മറ്റെവിടെയും തിരഞ്ഞുപോകേണ്ട… നമുക്കിടയില്‍ കാണും ഇതുപോലൊരു മനുഷ്യന്‍..’ എന്ന ക്യാപ്ഷനോടെ ജയസൂര്യ തന്നെയാണ് പോസ്റ്റര്‍ പുറത്തുവിട്ടത്.

സ്ഥിരം മദ്യപാനിയായ ഒരാളുടെ യഥാര്‍ത്ഥ ജീവിതമാണ് സിനിമയാക്കിയിരിക്കുന്നതെന്നണ് റിപ്പോര്‍ട്ട്. ഫ്രണ്ട്‌ലി പ്രൊഡക്ഷന്‍സിന്റെ ബാനറില്‍ ജോസ്‌കുട്ടി മഠത്തില്‍, യദു കൃഷ്ണ, രഞ്ജിത്ത് മണബ്രക്കാട്ട് എന്നിവര്‍ചേര്‍ന്ന് നിര്‍മിക്കുന്ന ചിത്രത്തില്‍ നിധീഷ് നടേരിയുടെ വരികള്‍ക്ക് ബിജിപാലാണ് സംഗീതം നല്‍കിയത്.

സംയുക്താ മേനോന്‍, സിദ്ദിക്ക്, ഇന്ദ്രന്‍സ്, ബൈജു, ശ്രീലക്ഷ്മി, പ്രിയങ്ക, സ്നേഹ പലിയേരി, ഇടവേള ബാബു, ജോണി ആന്റണി, വെട്ടുക്കിളി പ്രകാശന്‍, നിര്‍മല്‍ പാലാഴി, സന്തോഷ് കീഴാറ്റൂര്‍, ഉണ്ണി ചെറുവത്തൂര്‍, ബാബു അന്നൂര്‍, മിഥുന്‍, സീനില്‍ സൈനുദ്ധീന്‍, മുഹമ്മദ് പേരാമ്പ്ര, ശിവദാസ് മട്ടന്നൂര്‍, ജിന്‍സ് ഭാസ്‌കര്‍, ബേബി ശ്രീലക്ഷ്മി എന്നിവരാണ് പ്രധാനവേഷത്തില്‍ എത്തുന്നത്.

ഇതിന് പുറമേ മുപ്പതോളം പുതുമുഖങ്ങളും ചിത്രത്തില്‍ അഭിനയിച്ചിട്ടുണ്ട്. സെന്‍ട്രല്‍ പിക്ചേഴ്സ് ആണ് ചിത്രം വിതരണത്തിനെത്തിക്കുന്നത്.

ഡൂള്‍ന്യൂസിനെ ടെലഗ്രാംവാട്‌സാപ്പ് എന്നിവയിലൂടേയും  ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക

ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ

Content Highlight: Jayasurya acting movie Vellam announced releasing date