ടെന്ഡുല്ക്കര് – ആന്ഡേഴ്സണ് ട്രോഫിയിലെ മൂന്നാം മത്സരം ലോര്ഡ്സില് തുടരുകയാണ്. ഇംഗ്ലണ്ടിന്റെ ഒന്നാം ഇന്നിങ്സ് സ്കോര് പിന്തുടര്ന്ന് ലീഡ് നേടാനുറച്ച് കളത്തിലിറങ്ങിയ ഇന്ത്യയ്ക്ക് ഇംഗ്ലണ്ട് നേടിയ അതേ 387 റണ്സാണ് ആദ്യ ഇന്നിങ്സില് നേടാന് സാധിച്ചത്. ആദ്യ ഇന്നിങ്സില് ഇരുവര്ക്കും ലീഡില്ല.
Innings Break!
The scores are level in the 1st innings as #TeamIndia are all out for 387.
എട്ട് ഫോറും രണ്ട് സിക്സറും അടങ്ങുന്നതായിരുന്നു റിഷബ് പന്തിന്റെ ഇന്നിങ്സ്. ഈ പരമ്പരയിലുടനീളം സ്ഥിരതയാര്ന്ന പ്രകടനമാണ് താരം പുറത്തെടുക്കുന്നത്.
ലോര്ഡ്സില് നേടിയ രണ്ട് സിക്സറിന് പിന്നാലെ താരം ഒരു റെക്കോഡും സ്വന്തമാക്കി. ടെസ്റ്റ് ഫോര്മാറ്റില് ഏറ്റവുമധികം റണ്സ് നേടിയ ഇന്ത്യന് താരങ്ങളില് രണ്ടാം സ്ഥാനത്തേക്കാണ് പന്ത് ഉയര്ന്നത്. 80ാം ഇന്നിങ്സില് 88ാം സിക്സര് നേടിയാണ് താരം ഈ റെക്കോഡിലെത്തിയത്.
ഇന്ത്യന് ലെജന്ഡ് വിരേന്ദര് സേവാഗാണ് ഈ റെക്കോഡില് ഒന്നാം സ്ഥാനത്തുള്ളത്. 178 ഇന്നിങ്സില് നിന്നും 90 സിക്സറുകളാണ് താരം സ്വന്തമാക്കിയത്.
ടെസ്റ്റില് ഏറ്റവുമധികം സിക്സറുകള് നേടിയ ഇന്ത്യന് താരങ്ങള്
(താരം – ഇന്നിങ്സ് – സിക്സര് എന്നീ ക്രമത്തില്)
വിരേന്ദര് സേവാഗ് – 178 – 90
റിഷബ് പന്ത് – 80 – 88*
രോഹിത് ശര്മ – 116 – 88
എം.എസ്. ധോണി – 144 – 78
രവീന്ദ്ര ജഡേജ – 123 – 73
സച്ചിന് ടെന്ഡുല്ക്കര് – 329 – 69
അതേസമയം, രണ്ടാം ഇന്നിങ്സ് ബാറ്റിങ്ങിനിറങ്ങിയ ഇംഗ്ലണ്ട് നാലാം ദിവസം ലഞ്ചിന് പിരിയുമ്പോള് നാല് വിക്കറ്റ് നഷ്ടത്തില് 98 റണ്സ് എന്ന നിലയിലാണ്. 40 പന്തില് 17 റണ്സുമായി ജോ റൂട്ടും 13 പന്തില് രണ്ട് റണ്സുമായി ബെന് സ്റ്റോക്സുമാണ് ക്രീസില്.
വിക്കറ്റൊന്നും നഷ്ടപ്പെടാതെ രണ്ട് റണ്സ് എന്ന നിലയില് നാലാം ദിവസമാരംഭിച്ച ഇംഗ്ലണ്ടിന് ആദ്യ വിക്കറ്റില് മികച്ച കൂട്ടുകെട്ട് പടുത്തുയര്ത്താന് സാധിച്ചില്ല. 22 റണ്സാണ് ആദ്യ വിക്കറ്റില് ഇംഗ്ലണ്ടിന് നേടാനായത്. 12 പന്തില് 12 റണ്സ് നേടിയ ബെന് ഡക്കറ്റിനെയാണ് ഇംഗ്ലണ്ടിന് ആദ്യം നഷ്ടപ്പെട്ടത്.
