മനപ്പൂര്‍വം ചേഞ്ച് വേണമെന്ന് വിചാരിച്ചല്ല റൊമാന്‍സ് കൊടുത്തത്, ഷൂട്ടിനിടയില്‍ അജുവിന് നല്ല ടെന്‍ഷനായിരുന്നു: അനീഷ് അന്‍വര്‍

ചെയ്തുവെച്ച സിനിമകളുടെ ഴോണറുകളില്‍ വ്യത്യസ്തത പുലര്‍ത്തുന്ന സംവിധായകനാണ് അനീഷ് അന്‍വര്‍. പുതിയ ചിത്രമായ രാസ്തയുടെ പ്രൊമോഷന്റെ ഭാഗമായി മീഡിയ വണിന് നല്‍കിയ അഭിമുഖത്തില്‍ തന്റെ രണ്ടാമത്തെ സിനിമയായ സക്കറിയയുടെ ഗര്‍ഭിണികളിലെ അനുഭവം അദ്ദേഹം പങ്കുവെച്ചു.

സക്കറിയയുടെ ഗര്‍ഭിണികളില്‍ അജു വര്‍ഗീസ് – റിമ കല്ലിങ്കല്‍ പ്രണയജോഡിയെക്കുറിച്ച് ചോദിച്ച ചോദ്യത്തിന് മറുപടി പറയുകയായിരുന്നു അനീഷ് അന്‍വര്‍. അതുവരെ കോമഡി വേഷങ്ങളില്‍ മാത്രം ഒതുങ്ങിയിരുന്ന അജു വര്‍ഗീസിനെ പ്രണയഗാനത്തില്‍ അഭിനയിപ്പിക്കുക എന്നത് നിര്‍ബന്ധപൂര്‍വ്വം ചെയ്യിപ്പിച്ചതല്ല എന്നും അങ്ങനെ സംഭവിച്ചതാണെന്നുമായിരുന്നു അനീഷിന്റെ മറുപടി.

‘ഇപ്പോള്‍ എന്നോട് പലരും ചോദിക്കുന്ന കാര്യമാണ് അത്. പലരും അതിനെപ്പറ്റി പറയുമ്പോള്‍ അഭിമാനമുണ്ട്. അന്ന് വേറെ ചിന്തകള്‍ ഒന്നും ഉണ്ടായിരുന്നില്ല. അജുവിന് വലിയൊരു ചേഞ്ച് കൊടുക്കണമെന്ന രീതിയില്‍ ആയിരുന്നില്ല. റിമയുമായി ഒരു പെയര്‍ ചെയ്യുന്നതും പ്രണയഗാനം ചെയ്യുന്നതും ഒക്കെ അങ്ങ് നടന്നുപോയതാണ്.

ആ പാട്ട് ചിത്രീകരിക്കുന്ന സമയത്ത് അജു നല്ല ടെന്‍ഷനിലായിരുന്നു. എനിക്ക് ഇഷ്ടമുള്ള രീതിയിലാണ് ആ ഗാനം ചിത്രീകരിച്ചത്. അതു കഴിഞ്ഞ് കുറച്ചു കാലത്തിന് ശേഷം അജു ഒരു പൊതുവേദിയില്‍ പറഞ്ഞപ്പോഴാണ് ഞാനും അതിനെപ്പറ്റി ആലോചിച്ചത്. അല്ലാതെ മനപ്പൂര്‍വം അജുവിനെ കോമഡിയില്‍ നിന്ന് മാറ്റിക്കൊണ്ടു വരണം എന്നൊന്നും ആലോചിച്ചിരുന്നില്ല. അതുപോലെ റിമയുടെ കഥാപാത്രത്തിന് കാസര്‍ഗോഡ് സ്ലാങ് നല്‍കിയത് ചാലഞ്ചിങ് ആയിരുന്നു. എന്റെ ഒരു സുഹൃത്തിന്റെ സഹായത്തോടെയാണ് കാസര്‍ഗോഡ് സ്ലാങ് എഴുതിയതും ചിത്രീകരിച്ചതും,’ അനീഷ് പറഞ്ഞു.

പുതിയ ചിത്രമായ രാസ്ത സര്‍വൈവല്‍ ഴോണറില്‍ പെടുന്ന ഒന്നാണെന്നും മരുഭൂമിയിലെ ഷൂട്ടിങ് വെല്ലുവിളികള്‍ നിറഞ്ഞതായിരുന്നുവെന്നും അനീഷ് പറഞ്ഞു. സര്‍ജാനോ ഖാലിദ് നായകനായെത്തുന്ന ചിത്രം ജനുവരി അഞ്ചിനാണ് പുറത്തിറങ്ങുന്നത്. അനഖ നാരായണന്‍, സുധീഷ്, ടി.ജി രവി എന്നിവരാണ് മറ്റു താരങ്ങള്‍.

Content Highlight: Aneesh Anwar talks about aju varghese and zachariyayude garbhinikal