കഴിഞ്ഞ ദിവസം ഇന്ത്യയോടേറ്റ പരാജയത്തിന് പിന്നാലെ ടി-20 ലോകകപ്പില് പാകിസ്ഥാന്റെ മുന്നോട്ടുള്ള യാത്രയിലും അനിശ്ചിതത്വം തുടരുകയാണ്. 61 റണ്സിന്റെ വമ്പന് തോല്വിയേറ്റുവാങ്ങി പോയിന്റ് പട്ടികയില് മൂന്നാം സ്ഥാനത്തേക്ക് വീണതോടെയാണ് പാകിസ്ഥാന്റെ നില ത്രിശങ്കുവിലായിരിക്കുന്നത്.
നിലവില് ഗ്രൂപ്പ് എ സ്റ്റാന്ഡിങ്സില് ഇന്ത്യയ്ക്കും യു.എസ്.എയ്ക്കും കീഴില് മൂന്നാം സ്ഥാനത്താണ് പാകിസ്ഥാന്. രണ്ടാമതുള്ള യു.എസ്.എയ്ക്കും മൂന്നാതുള്ള പാകിസ്ഥാനും നാല് പോയിന്റ് വീതമാണെങ്കില് നെറ്റ് റണ് റേറ്റാണ് മെന് ഇന് ഗ്രീനിന് തിരിച്ചടിയായിരിക്കുന്നത്.
An all-round performance from India clinches a 61-run win over Pakistan 💪
എന്നാല് പാകിസ്ഥാന് ഒരു മത്സരം ബാക്കിയുണ്ട് എന്നതാണ് ആരാധകര്ക്ക് തെല്ലെങ്കിലും ആശ്വാസം നല്കുന്നത്.
നാല് മത്സരത്തില് നിന്നും രണ്ട് വീതം ജയവും തോല്വിയുമായാണ് യു.എസ്.എ രണ്ടാമതുള്ളത്. ഗ്രൂപ്പ് ഘട്ടത്തില് ടീമിന് മത്സരങ്ങളൊന്നും തന്നെ ഇനി ബാക്കിയില്ല. +0.788 ആണ് യു.എസ്.എയുടെ നെറ്റ് റണ് റേറ്റ്.
യു.എസ്.എ. Photo: ICC
അതേസമയം, മൂന്ന് മത്സരത്തില് നിന്നും രണ്ട് ജയവും ഒരു തോല്വിയുമായാണ് പാകിസ്ഥാന് നാല് പോയിന്റുള്ളത്. ഇന്ത്യയ്ക്കെതിരായ തോല്വി നെറ്റ് റണ് റേറ്റിലും വലിയ തോതില് പ്രതിഫലിച്ചു. നിലവില് -0.403 എന്ന നെറ്റ് റണ് റേറ്റാണ് പാകിസ്ഥാനുള്ളത്.
ഫെബ്രുവരി 18ന് നമീബിയക്കെതിരെയാണ് പാകിസ്ഥാന്റെ അവസാന ഗ്രൂപ്പ് ഘട്ട് മത്സരം. കൊളംബോയിലെ സിംഹളീസ് സ്പോര്ട്സ് ക്ലബ്ബാണ് വേദി. ഈ മത്സരത്തില് ജയിക്കണമെന്നില്ല, തോല്ക്കാതിരുന്നാല് മാത്രം മതി പാകിസ്ഥാന് സൂപ്പര് 8ല് പ്രവേശിക്കാം. മോശം കാലാവസ്ഥ മൂലമോ മറ്റെന്തെങ്കിലും കാരണത്താലോ മത്സരം ഉപേക്ഷിച്ചാലും പാകിസ്ഥാന് സൂപ്പര് 8 പ്രവേശനം സാധ്യമാകും.
എന്നാല് പാകിസ്ഥാന് നമീബിയക്കെതിരെ പരാജയപ്പെടുകയാണെങ്കില് 2024 ലോകകപ്പിന് സമാനമായി ഇന്ത്യയ്ക്കൊപ്പം യു.എസ്.എ ആകും സൂപ്പര് 8ന് യോഗ്യത നേടുക.
ഗ്രൂപ്പ് ഘട്ടത്തില് ഒരു മത്സരം ശേഷിക്കുന്ന നെതര്ലന്ഡ്സിനും സൂപ്പര് 8ല് പ്രവേശിക്കാന് തത്വത്തില് സാധ്യതയുണ്ടെങ്കിലും -1.352 എന്ന നെറ്റ് റണ്റേറ്റ് മറികടക്കുന്ന തരത്തില് ഒരു പടുകൂറ്റന് വിജയം ഇന്ത്യയ്ക്കെതിരെ ഡച്ച് പട നേടുമെന്ന് കരുതുക വയ്യ.
Content Highlight: Pakistan finish third in T20 World Cup Group A
