മെകസിക്കോയ്ക്കായി 150ലധികം അന്താരാഷ്ട്ര മത്സരങ്ങളില് ഗ്ലൗസണിഞ്ഞ ഓച്ചോവ, ലോകകപ്പ് വേദിയിലെത്തുമ്പോള് കാണിക്കുന്ന തകര്പ്പന് ഫോമിലൂടെയാണ് ‘ലോകകപ്പ് ഇതിഹാസം’ എന്ന വിശേഷണം സ്വന്തമാക്കിയത്.
കോണ്കാകാഫ് ഗോള്ഡ് കപ്പില് മെക്സിക്കോയ്ക്കൊപ്പം അഞ്ച് തവണ കിരീടനേട്ടമുണ്ട്. അമേരിക്കന് ക്ലബ്ബുകളിലും യൂറോപ്പില് അയാക്സിയോ, മലാഗ, സ്റ്റാന്ഡേര്ഡ് ലീജ്, സാ ലെര്ണിറ്റാന തുടങ്ങിയ ക്ലബ്ബുകളിലും നീണ്ടകാലം തിളങ്ങിയ ശേഷമാണ് ഇതിഹാസ ഗോള്കീപ്പര് കളിമൈതാനങ്ങളോട് വിടപറയുന്നത്.
2014 ബ്രസീല് ലോകകപ്പില് ആതിഥേയരായ ബ്രസീലിനെതിരെ നടന്ന മത്സരത്തില് നെയ്മര് ഉള്പ്പെടെയുള്ള വന്നിരയുടെ അറ്റാക്കുകളെ തടഞ്ഞുനിര്ത്തി നടത്തിയ ആറ് അവിശ്വസനീയ സേവുകള് ഓച്ചോവയുടെ കരിയറിലെ ഏറ്റവും മികച്ച പ്രകടനങ്ങളിലൊന്നായാണ് വിലയിരുത്തുന്നത്.
2018 റഷ്യ ലോകകപ്പില് നിലവിലെ ചാമ്പ്യന്മാരായിരുന്ന ജര്മനിയെ മെക്സിക്കോ 1-0ന് അട്ടിമറിച്ച മത്സരത്തിലെ നട്ടെല്ല് ഓച്ചോവയുടെ പ്രകടനമായിരുന്നു. 2022 ഖത്തര് ലോകകപ്പില് പോളണ്ടിനെതിരായ മത്സരത്തില് റോബര്ട്ട് ലെവന്ഡോവ്സ്കിയുടെ പെനാല്റ്റി തടുത്ത് താരം വീണ്ടും ശ്രദ്ധ പിടിച്ചുപറ്റി.
Content Highlight: Legendary Mexican goalkeeper Guillermo Ochoa has retired
