![?php echo $post['title']; ?>](https://assets.doolnews.com/w/900x473/2026/11/italy-spain.jpg)
ഫ്രാന്‍സിനെതിരായ യുവേഫ നേഷന്‍സ് ലീഗ് ഗ്രൂപ്പ് മത്സരത്തില്‍ പിന്നില്‍ നിന്ന് തിരിച്ചടിച്ച് ജയം സ്വന്തമാക്കി ഇറ്റലി. റോമിലെ സ്‌റ്റേഡിയോ ഒളിംപികോയില്‍ നടന്ന മത്സരത്തില്‍ ഫ്രാന്‍സെസ്‌കോ എസ്‌പൊസിറ്റോയുടെ ഇരട്ടഗോള്‍ മികവിലാണ് അസൂറിപ്പട ജയം സ്വന്തമാക്കിയത്. സൂപ്പര്‍താരം കിലിയന്‍ എംബാപ്പെയില്ലാതെയാണ് ഫ്രാന്‍സ് കളത്തിലിറങ്ങിയത്.
അതേസമയം ലോകചാമ്പ്യന്‍മാരായ സ്‌പെയിന്‍ ചെക്കിയയെ കീഴടക്കി തങ്ങളുടെ വിജയക്കുതിപ്പ് തുടര്‍ന്നു. യുവതാരം ലാമിന്‍ യമാല്‍ ഇല്ലാതെ കളത്തിലിറങ്ങിയ സ്‌പെയിന്‍ തങ്ങളുടെ തുടര്‍ച്ചയായ 12ാം വിജയം സ്വന്തമാക്കി. 43 മത്സരങ്ങളിലായി പരാജയമറിയാതെയാണ് ലോകചാമ്പ്യന്‍മാരുടെ കുതിപ്പ്.
ഇതിഹാസതാരം സിനദിന്‍ സിദാന്‍ പരിശീലക സ്ഥാനം ഏറ്റെടുത്ത ശേഷമുള്ള ആദ്യ തോല്‍വിയാണ് ഫ്രാന്‍സ് ഏറ്റുവാങ്ങിയത്. ലോകകപ്പിന് പിന്നാലെ ദിദിയര്‍ ദെഷാം സ്ഥാനമൊഴിഞ്ഞതിന് പിന്നാലെ ജൂലൈയിലാണ് സിദാന്‍ പരിശീലകസ്ഥാനം ഏറ്റെടുത്തത്. ഇതിന് മുമ്പുള്ള നാല് മത്സരങ്ങളില്‍ മൂന്ന് ജയവും ഒരു സമനിലയുമാണ് സിദാന്റെ കീഴില്‍ ഫ്രാന്‍സിനുള്ളത്.
മത്സരം തുടങ്ങി പത്താം മിനിട്ടില്‍ മൈക്കല്‍ ഒലീസെയിലൂടെ ഫ്രാന്‍സാണ് ആദ്യം ലീഡെഡുത്തത്. അലക്ഷ്യമായി പന്ത് പാസ് ചെയ്ത ഇറ്റാലിയന്‍ കീപ്പര്‍ ഡൊണ്ണരുമയുടെ പിഴവില്‍ നിന്നുമാണ് ഒലീസ് ഗോള്‍ നേടിയത്.
26ാം മിനിട്ടില്‍ ഫ്രാന്‍സെസ്‌കോ എസ്‌പൊസിറ്റോ തന്റെ ആദ്യ ഗോള്‍ നേടി. രണ്ടാം പകുതിയില്‍ ലഭിച്ച പെനാല്‍റ്റി സഹോദരന്‍ സെബാസ്റ്റിയാനോ എസ്‌പൊസിറ്റോ പുറത്തേക്കടിച്ചു കളഞ്ഞെങ്കിലും മൂന്ന് മിനിട്ടിനുള്ളില്‍ തന്നെ ഡേവിഡ് ഫ്രറ്റേസി ഇറ്റലിയുടെ രണ്ടാം ഗോള്‍ നേടി.
😤🇮🇹 #NationsLeague https://t.co/O4SlNRFZPZ
— UEFA EURO (@UEFAEURO) November 12, 2026
75ാം മിനിട്ടില്‍ പെനാല്‍ട്ടിയിലൂടെ തന്റെ രണ്ടാം ഗോള്‍ നേടി എസ്‌പൊസിറ്റോ അസൂറിപ്പടയുടെ വിജയം ഉറപ്പിച്ചു. റോബര്‍ട്ടോ മാന്‍സീനിയുടെ കീഴില്‍ നേഷന്‍സ് ലീഗിലെ തുടര്‍ച്ചയായ മൂന്നാം ജയം സ്വന്തമാക്കിയ ഇറ്റലി എട്ട് ഗോളുകളാണ് നേടിയത്.
വ്യാഴാഴ്ച നേരത്തെ നടന്ന മത്സരത്തില്‍ തുര്‍ക്കിക്കെതിരെ ബെല്‍ജിയം വിജയിച്ചതോടെ, അവസാന മത്സരത്തില്‍ ബെല്‍ജിയത്തെ നേരിടുന്നതിന് മുമ്പ് നേഷന്‍സ് ലീഗിലെ തങ്ങളുടെ ഭാവി സ്വന്തം കൈകളില്‍ നിലനിര്‍ത്താന്‍ ഇറ്റലിക്ക് വിജയം അനിവാര്യമായിരുന്നു
ലാമിന്‍ യമാലും റോഡ്രിയും ഇല്ലാതെ ചെക്കിയക്കെതിരെ ഇറങ്ങിയ സ്‌പെയിന്‍ എതിരില്ലാത്ത രണ്ട് ഗോളുകള്‍ക്ക് അനായാസ ജയം സ്വന്തമാക്കി. അലക്‌സ് ബെയ്‌നയും മാര്‍ക്ക പ്യൂബിലുമാണ് ലാ റോജയ്ക്കായി ഗോളുകള്‍ നേടിയത്. അറുപത്തി ഒമ്പതാം മിനിട്ടില്‍ ചെക്കിയയുടെ ലാഡിസ്ലാവ് ക്രെജ്‌സി ചുവപ്പ് കാര്‍ഡ് കണ്ട് പുറത്തുപോയി. മത്സരത്തിന് മുമ്പ് തന്നെ നേഷന്‍സ് ലീഗിന്റെ അടുത്ത ഘട്ടത്തിലേക്ക് സ്‌പെയിന്‍ യോഗ്യത നേടിയിരുന്നു.
😤🇮🇹 #NationsLeague https://t.co/O4SlNRFZPZ
— UEFA EURO (@UEFAEURO) November 12, 2026
ലൂയിസ് ഡെ ലാ ഫ്യുവെന്റെയുടെ കീഴില്‍ അപരാജിതമായ കുതിപ്പാണ് ലോകചാമ്പ്യന്‍മാര്‍ നടത്തുന്നത്. എന്നാല്‍ ഈ കുതിപ്പ് ഞായറാഴ്ച പരീക്ഷിക്കപ്പെടും. നവംബര്‍ 15ന് മാഡ്രിഡില്‍ നടക്കുന്ന നേഷന്‍സ് ലീഗ് മത്സരത്തില്‍ സ്‌പെയിന്‍ ഇംഗ്ലണ്ടിനെ നേരിടും.
Content Highlight: Italy beats France and Spain beats Czechia in Uefa Nations league group stage matches.
