കഴിഞ്ഞ 15 വര്ഷമായി മലയാളസിനിമയില് നിറഞ്ഞുനില്ക്കുന്ന നടനാണ് ആസിഫ് അലി. 2009ല് ശ്യാമപ്രസാദ് സംവിധാനം ചെയ്ത ഋതുവിലൂടെയാണ് ആസിഫ് തന്റെ സിനിമാ ജീവിതം ആരംഭിക്കുന്നത്.
കരിയറിന്റെ തുടക്കത്തില് തന്നെ മികച്ച സംവിധായകരുടെ സിനിമകളില് ആസിഫിന് ഭാഗമാകാന് സാധിച്ചിരുന്നു. തുടര്പരാജയങ്ങള്ക്ക് ശേഷം ആസിഫ് അലി മികച്ച തിരിച്ചു വരവ് നടത്തിയ വര്ഷമായിരുന്നു 2024. ഈ വര്ഷമാദ്യമിറങ്ങിയ ആസിഫ് അലിയുടെ രേഖാചിത്രവും ബ്ലോക്ക്ബസ്റ്ററായിരുന്നു.
എന്നാല് മലയാളത്തില് അല്ലാതെ മറ്റ് ഭാഷകളില് ആസിഫ് അഭിനയിച്ചിട്ടില്ല. ഇപ്പോള് മലയാള സിനിമകള് കണ്ട് തമിഴ് സിനിമാപ്രേക്ഷകര് തന്നെ തിരിച്ചറിയുന്നതിനെ കുറിച്ച് പറയുകയാണ് ആസിഫ് അലി. സോഷ്യല് മീഡിയയില് തനിക്ക് അവരുടെ നിരവധി മെസേജുകള് വരാറുണ്ടെന്നാണ് നടന് പറയുന്നത്.
മലയാള സിനിമകള് കണ്ട് അവര് മെസേജ് അയക്കുന്നതും തന്നെ തിരിച്ചറിയുന്നതും കാണുമ്പോള് താന് ശരിക്കും സര്പ്രൈസ് ആയെന്നും ആസിഫ് പറയുന്നു. തന്റെ ആദ്യ തമിഴ് ഇന്റര്വ്യൂവില് സംസാരിക്കുകയായിരുന്നു ആസിഫ് അലി.
‘എനിക്ക് ഇപ്പോള് ഇന്സ്റ്റഗ്രാമിലും ഫേസ്ബുക്കിലുമൊക്കെ തമിഴ് ഓഡിയന്സിന്റെ ഒരുപാട് മെസേജുകള് വരുന്നുണ്ട്. അതും എന്റെ മലയാള സിനിമകള് കണ്ടിട്ടാണ് അവരൊക്കെ മെസേജ് അയക്കുന്നത്. അത് ശരിക്കും എനിക്ക് വലിയൊരു സര്പ്രൈസ് തന്നെയാണ്.
ജീത്തു ജോസഫ് സാറിന്റെ കൂടെയുള്ള പുതിയ സിനിമയുടെ ആദ്യ ഷെഡ്യൂള് കോയമ്പത്തൂരിലായിരുന്നു ഷൂട്ട് ചെയ്തത്. ആ സമയത്തായിരുന്നു ഇന്റര്സ്റ്റെല്ലാര് റീറിലീസ് വന്നത്. ഞാന് അപ്പോള് കോയമ്പത്തൂരിലെ ഒരു തിയേറ്ററില് ഈ സിനിമ കാണാനായി പോയിരുന്നു.
അവിടെ ചെന്നപ്പോള് അവിടെയുണ്ടായിരുന്ന കുറേ ആളുകള് എന്നെ തിരിച്ചറിയാന് തുടങ്ങി. അവരുടെ ഭാഷയില് ഒരു സിനിമ പോലും ചെയ്യാതെയാണ് അവര് എന്നെ തിരിച്ചറിഞ്ഞത്. അത് ശരിക്കും സര്പ്രൈസായിരുന്നു. തമിഴില് ഞാന് സിനിമ ചെയ്യുകയോ കാമിയോ ചെയ്യുകയോ ക്യാരക്ടര് റോളുകള് ചെയ്യുകയോ ചെയ്തിട്ടില്ല,’ ആസിഫ് അലി പറയുന്നു.
Content Highlight: Asif Ali Talks About Tamil Cinema Audience
