![?php echo $post['title']; ?>](https://assets.doolnews.com/w/900x473/2026/10/sanju-vaibhav-1.jpg)
ന്യൂസിലാന്‍ഡിനെതിരായ മൂന്നാം ടി-20 മത്സരത്തില്‍ വൈഭവ് സൂര്യവംശിയെ ഓപ്പണറായി ഇറക്കാനുള്ള ഇന്ത്യന്‍ ടീം മാനേജ്മെന്റിന്റെ തീരുമാനത്തെ പിന്തുണച്ച് മുന്‍ നായകന്‍ അജിന്‍ക്യ രഹാനെ.
ഇന്നിങ്‌സിന്റെ തുടക്കത്തില്‍ തന്നെ ആക്രമിച്ചു കളിക്കാന്‍ ഇഷ്ടപ്പെടുന്ന താരത്തിന് മാനേജ്മെന്റ് അനുയോജ്യമായ അവസരമാണ് നല്‍കിയതെന്ന് അദ്ദേഹം പറഞ്ഞു. ജേക്കബ് ഡഫി എറിഞ്ഞ ആദ്യ പന്തില്‍ തന്നെ ഫോറടിച്ച വൈഭവിന്റെ ആത്മവിശ്വാസവും മനോഭാവവും തന്നെ ഏറെ ആകര്‍ഷിച്ചതായി രഹാനെ വ്യക്തമാക്കി.
എന്നാല്‍ ഇഷാന്‍ കിഷന്‍ തിരികെ ടീമിലേക്ക് വന്നാല്‍ സഞ്ജു സാംസണ്‍ ഇന്നിങ്‌സ് ഓപ്പണ്‍ ചെയ്യുന്നത് കാണാന്‍ സാധിക്കുമെന്നും തന്റെ യൂട്യൂബ് ചാനലില്‍ പങ്കുവെച്ച വീഡിയോയില്‍ രഹാനെ പറഞ്ഞു.
‘സഞ്ജുവിനെ മൂന്നാം നമ്പറില്‍ ഇറക്കിയപ്പോള്‍ വൈഭവിനെ ഓപ്പണിങ്ങിലേക്ക് പ്രൊമോട്ട് ചെയ്തത് ടീം മാനേജ്മെന്റിന്റെ വിവേകപൂര്‍ണമായ തീരുമാനമായാണ് ഞാന്‍ കാണുന്നത്. 15 വയസ് മാത്രമുള്ള വൈഭവ് രണ്ടാം ടി-20 മത്സരത്തിന് മുമ്പ് ഒരിക്കലും മൂന്നാം നമ്പറില്‍ ബാറ്റ് ചെയ്തിട്ടില്ല. മികച്ച ഫോമിലുള്ള അവന് നേരത്തേ ക്രീസിലെത്തി ആക്രമിച്ചുകളിക്കാനും ആധിപത്യം സ്ഥാപിക്കാനും ഇഷ്ടപ്പെടുന്ന താരമാണ്.
വൈഭവ് സൂര്യവംശി. Photo: Rajasthan Royals/x.com
അവന് ക്രമേണ പഠിച്ചുവരും. പഠിക്കേണ്ട കാര്യങ്ങളില്‍ ഒന്നായിരിക്കാം ഇതും. എല്ലാ മത്സരങ്ങളിലും ആ സ്ഥാനത്ത് ബാറ്റ് ചെയ്യാന്‍ അവന് അവസരം ലഭിക്കുമോ എന്നത് മറ്റൊരു കാര്യമാണ്. ഇഷാന്‍ കിഷന്‍ തിരിച്ചെത്തുമ്പോള്‍ സഞ്ജു സാംസണ്‍ വീണ്ടും ഓപ്പണറായി ഇറങ്ങുന്നത് നമുക്ക് കണ്ടേക്കാം,’ രഹാനെ പറഞ്ഞു.
ഒക്ടോബര്‍ 27ന് വെല്ലിങ്ടണില്‍ നടന്ന മത്സരത്തില്‍ അഭിഷേക് ശര്‍മയ്‌ക്കൊപ്പം വൈഭവിനെ ഓപ്പണറാക്കിയത് ടീം മാനേജ്മെന്റിന്റെ മികച്ചതും വിവേകപൂര്‍ണവുമായ നീക്കമായിരുന്നുവെന്ന് രഹാനെ വിലയിരുത്തി.
മത്സരത്തില്‍ 199 റണ്‍സ് വിജയലക്ഷ്യം പിന്‍തുടര്‍ന്ന ഇന്ത്യയ്ക്കായി വൈഭവ് സൂര്യവംശിയും അഭിഷേക് ശര്‍മയും ചേര്‍ന്ന് തകര്‍പ്പന്‍ തുടക്കമാണ് നല്‍കിയത്. ഇരുവരും ചേര്‍ന്ന് വെറും 43 പന്തില്‍ നിന്ന് 133 റണ്‍സിന്റെ ഒന്നാം വിക്കറ്റ് കൂട്ടുകെട്ട് പടുത്തുയര്‍ത്തി.
𝐀𝐔𝐃𝐀𝐂𝐈𝐎𝐔𝐒 is the word 😎 #TeamIndia | #NZvIND https://t.co/40wGEx66oK
— BCCI (@BCCI) October 27, 2026
മത്സരത്തില്‍ വൈഭവ് 19 പന്തില്‍ നിന്ന് 45 റണ്‍സെടുത്തപ്പോള്‍ അഭിഷേക് ശര്‍മ 38 പന്തില്‍ നിന്ന് 113 റണ്‍സ് നേടി. മൂന്നാം നമ്പറിലേക്ക് ഇറങ്ങിയ സഞ്ജു സാംസണ്‍ 13 പന്തില്‍ 18 റണ്‍സെടുത്തു. 40 പന്തുകള്‍ ബാക്കിനില്‍ക്കെ ആറ് വിക്കറ്റിനാണ് ഇന്ത്യ വിജയം സ്വന്തമാക്കിയത്.
ഇതുവരെ പത്ത് ടി-20 മത്സരങ്ങളില്‍ നിന്നായി 29.50 ശരാശരിയിലും 185.53 സ്‌ട്രൈക്ക് റേറ്റിലും രണ്ട് അര്‍ധ സെഞ്ചുറികള്‍ ഉള്‍പ്പെടെ 295 റണ്‍സാണ് വൈഭവ് സൂര്യവംശി നേടിയിട്ടുള്ളത്.
അതേസമയം, വെല്ലിങ്ടണിലെ ജയത്തോടെ അഞ്ച് മത്സരങ്ങളുടെ പരമ്പരയില്‍ ഇന്ത്യ 3-0ത്തിന് മുന്നിലെത്തി പരമ്പര സ്വന്തമാക്കി. പരമ്പരയിലെ നാലാം ടി-20 മത്സരം ഒക്ടോബര്‍ 30 വെള്ളിയാഴ്ച ഈഡന്‍ പാര്‍ക്കില്‍ നടക്കും.
Content Highlight: Ajinkya Rahane On Sanju Samson and Vaibhav Sooryavashi’s batting positions
