![?php echo $post['title']; ?>](https://assets.doolnews.com/w/900x473/2022/10/mammoottywomen.jpg)
ഇന്ന് സിനിമയില്‍ ബോള്‍ഡായ സ്ത്രീകഥാപാത്രങ്ങള്‍ ഉണ്ടായി തുടങ്ങിയെന്നും പണ്ട് കാലങ്ങളില്‍ അതായിരുന്നില്ല സ്ഥിതിയെന്നും നടന്‍ മമ്മൂട്ടി. റോഷാക്ക് സിനിമയുടെ പ്രൊമോഷനുമായി ബന്ധപ്പെട്ട് നടത്തിയ അഭിമുഖത്തില്‍ സംസാരിക്കുകയായിരുന്നു അദ്ദേഹം.
പണ്ടത്തെ സിനിമകളിലൊക്കെ സ്ത്രീകളെ കൊണ്ട് രാവിലെ മുതല്‍ വൈകീട്ട് വരെ കരയിപ്പിക്കുകയായിരുന്നെന്നും അതൊന്നും ബോള്‍ഡായ സ്ത്രീ കഥാപാത്രങ്ങളായിരുന്നില്ലെന്നും മമ്മൂട്ടി പറഞ്ഞു.
രാവിലെ തൊട്ട് വൈകീട്ട് വരെ ഇരുന്ന് കരയുന്നത് നല്ല സ്ത്രീ കഥാപാത്രമാവില്ല. ബോള്‍ഡായ കഥാപാത്രങ്ങള്‍ വരണം. ഇതില്‍ ഗ്രേസിന്റെ കഥാപാത്രം ബോള്‍ഡാണ്. പണ്ടത്തെപ്പോലയല്ല, ഇന്നുള്ളവര്‍ക്ക് അക്കാര്യത്തില്‍ ഭാഗ്യമുണ്ട്. പണ്ട് മുഴുവന്‍ ഈ കരച്ചില്‍ റോളുകളാണ്. അങ്ങനെ തന്നെ മാറ്റിവെച്ചിരിക്കുകയായിരുന്നു.
സ്ത്രീകളുടെ പ്രശ്‌നങ്ങള്‍ മനസിലാക്കിക്കുകയും അവര്‍ക്ക് ചെയ്യാന്‍ ഒരുപാട് കാര്യങ്ങള്‍ ഉണ്ടെന്ന് സമൂഹത്തിന് ബോധ്യപ്പെടുകയും ചെയ്യുന്ന കഥാപാത്രങ്ങളാണ് വേണ്ടത്. അല്ലാതെ ചവിട്ടിത്താഴ്ത്തുന്ന, ഇടിച്ച് അവിടെ ഇടുന്ന ദൈന്യം മാത്രം കാണിക്കുന്നതിന് അപ്പുറത്തേക്ക് അവര്‍ക്കും പറ്റുന്നതാണെന്ന് പ്രൂവ് ചെയ്യുന്ന സിനിമകളാണ് വേണ്ടത്. അതാണ് സ്ത്രീപക്ഷ സിനിമ, മമ്മൂട്ടി പറഞ്ഞു.
സിനിമയില്‍ ഇന്ന് ശക്തമായ സ്ത്രീകഥാപാത്രങ്ങള്‍ വരുന്നുണ്ടെന്ന് നടി ഗ്രേസ് ആന്റണിയും അഭിമുഖത്തില്‍ പറഞ്ഞു.
മലയാള സിനിമയില്‍ വനിതാ തിരക്കഥാകൃത്തുക്കള്‍ വന്നാല്‍ സ്ത്രീകള്‍ക്ക് കൂടുതല്‍ റിലേറ്റ് ചെയ്യാവുന്ന സിനിമകള്‍ വരുമെന്ന് തോന്നുന്നുണ്ടോ എന്നചോദ്യത്തിന് അങ്ങനെ തോന്നുന്നില്ലെന്നായിരുന്നു ഗ്രേസ് ആന്റണിയുടെ മറുപടി.
സ്ത്രീകളുമായി റിലേറ്റഡായ സബ്ജക്ട് എഴുതാന്‍ താത്പര്യമുണ്ടെന്നും കോണ്‍ട്രിബ്യൂട്ട് ചെയ്യാനുണ്ടെങ്കില്‍ പറയാമെന്നും നിങ്ങളുടെ സൈഡില്‍ നിന്നും കേള്‍ക്കാന്‍ തയ്യാറാണെന്നുമൊക്കെ കഥാപാത്രവുമായി ബന്ധപ്പെട്ട ചര്‍ച്ചകള്‍ക്കിടെ പറയുന്ന എഴുത്തുകാരും സംവിധായകരും ഇന്നുണ്ട്. അത് വളരെ പോസിറ്റീവായ കാര്യമാണ്. അതും അഭിനന്ദിക്കപ്പെടേണ്ടതാണ്.
ഇപ്പോള്‍ കുറേ മാറ്റങ്ങള്‍ സംഭവിക്കുന്നുണ്ട്. ഞാന്‍ തന്നെ ചെയ്യുന്ന കഥാപാത്രങ്ങള്‍ ശക്തമാണെന്ന് എനിക്ക് തോന്നിയിട്ടുണ്ട്, ഗ്രേസ് ആന്റണി പറഞ്ഞു.
Content Highlight: Actor Mammootty About Bold Women Character on Malayalam Movie
