ഞങ്ങളുടെ 'മൈക്കിളപ്പ'; ചിത്രങ്ങള്‍ പങ്കുവെച്ച് സൗബിനും സുഷിനും

മമ്മൂട്ടി-അമല്‍ നീരദ് കൂട്ടുകെട്ടിലൊരുങ്ങിയ ഭീഷ്മ പര്‍വം നിറഞ്ഞ തിയേറ്ററില്‍ പ്രദര്‍ശനം തുടരുകയാണ്. മാസും ക്ലാസും മാസ് ബി.ജി.എമ്മും ചേര്‍ന്ന് മികച്ച തിയേറ്റര്‍ അനുഭവം തന്നെയാണ് ചിത്രം നല്‍കുന്നത്.

മൈക്കിളായി മമ്മൂട്ടി നിറഞ്ഞാടിയപ്പോള്‍ മറ്റ് അഭിനേതാക്കളും തങ്ങളുടെ റോളുകള്‍ ഗംഭീരമാക്കി. ഇപ്പോഴിതാ മമ്മൂട്ടിക്കൊപ്പമുള്ള ചിത്രം പങ്കുവെച്ചിരിക്കുകയാണ് സൗബിന്‍ ഷാഹിറും, സുഷിന്‍ ശ്യാമും. മമ്മൂട്ടിക്കൊപ്പമുള്ള ചിത്രങ്ങള്‍ പങ്കുവെച്ചുകൊണ്ട് ‘മൈക്കിളപ്പ’ എന്നാണ് ഇരുവരും കുറിച്ചിരുന്നത്.

സിനിമയിലെ മറ്റ് കഥാപാത്രങ്ങള്‍ മൈക്കിളിനെ ബഹുമാനത്തോടെ വിളിക്കുന്നതാണ് മൈക്കിളപ്പയെന്ന്. ചിത്രത്തില്‍ അജാസ് എന്ന കഥാപാത്രത്തെയാണ് സൗബിന്‍ അവതരിപ്പിച്ചിരുന്നത്. സൗബിന്റെ പ്രകടനത്തിനും മികച്ച അഭിപ്രായമാണ് ലഭിക്കുന്നത്. പ്രത്യേകിച്ചും ആദ്യപകുതിയില്‍ നിന്നും രണ്ടാം പകുതിയിലെത്തുമ്പോള്‍ നിര്‍ണായകമായ മാറ്റം സംഭവിക്കുന്ന കഥാപാത്രം കൂടിയാണ് സൗബിന്റെ അജാസ്.

അതുപോലെ മൈക്കിളിന്റെ മാസ് പെര്‍ഫോമന്‍സിനൊപ്പം തിയേറ്ററിനെ പ്രകമ്പനം കൊള്ളിച്ച ഒരു പ്രധാന ഘടകം സുഷിന്‍ ശ്യാമിന്റെ ബാക്ക് ഗ്രൗണ്ട് സ്‌കോറുകളായിരുന്നു.