ലോഹിതദാസിന്റെ രചനയില്‍ സുന്ദര്‍ദാസ് സംവിധാനം ചെയ്ത് 1996ൽ പുറത്തിറങ്ങിയ ചിത്രമായിരുന്നു സല്ലാപം. മഞ്ജു വാര്യര്‍, ദിലീപ്, മനോജ് കെ. ജയന്‍ എന്നിവരായിരുന്നു ചിത്രത്തിൽ പ്രധാന കഥാപാത്രങ്ങളെ അവതരിപ്പിച്ചത്. മഞ്ജു ആദ്യമായി നായികയായി അഭിനയിച്ച ചിത്രം കൂടിയായിരുന്നു സല്ലാപം. രാധ എന്ന കഥാപാത്രത്തിൽ മഞ്ജു മികച്ച പ്രകടനമാണ് നടത്തിയത്. ഇപ്പോൾ ചിത്രത്തെക്കുറിച്ച് സംസാരിക്കുകയാണ് സുന്ദർ ദാസ്.

സല്ലാപത്തിലെ മഞ്ജു അവതരിപ്പിച്ച കഥാപാത്രത്തിലേക്ക് ആദ്യം ആലോചിച്ചത് ആനിയെ ആയിരുന്നെന്നും അന്ന് ഏറ്റവും തിരക്കുള്ള നായിക ആനി ആയിരുന്നെന്നും സുന്ദര്‍ ദാസ് പറയുന്നു.

ലോഹിതദാസ് ആണ് ആനിയോട് സംസാരിച്ചതെന്നും അന്ന് സിനിമയുടെ കഥ ആയിട്ടില്ലെന്നും അദ്ദേഹം പറഞ്ഞു. ആനിയോട് സംസാരിച്ചപ്പോള്‍ ഓക്കെ പറഞ്ഞെന്നും എന്നാല്‍ പിന്നീട് ആലോചിച്ചപ്പോള്‍ ചിത്രത്തിലെ കഥാപാത്രം വളരെ വിധേയത്വമുള്ള വേഷമാണെന്നും അന്ന് ആനി തന്റേടിയായിട്ടുള്ള കഥാപാത്രങ്ങള്‍ ചെയ്യുന്ന സമയാണെന്നും അദ്ദേഹം പറയുന്നു. അങ്ങനെയാണ് മഞ്ജുവിലേക്ക് എത്തുന്നതെന്നും സുന്ദര്‍ ദാസ് കൂട്ടിച്ചേര്‍ത്തു. ഗദ്ദാഫിയുമായുള്ള പോഡ്കാസ്റ്റില്‍ സംസാരിക്കുകയായിരുന്നു അദ്ദേഹം.

‘ഞങ്ങള്‍ സല്ലാപം എന്ന ചിത്രത്തിലേക്ക് വേണ്ടി ആലോചിച്ചത് ആനിയെ ആണ്. അന്ന് ഏറ്റവും പ്രോമിസിങ് ആയിട്ടുള്ള അല്ലെങ്കില്‍ ടാലന്റ് ആയിട്ടുള്ള ടീനേജ് നായിക എന്നുപറയുന്നത് ആനിയാണ്. ആനിയായിട്ട് ഞാന്‍ നല്ല സൗഹൃദം ഉണ്ട്. ഒരു സിനിമയില്‍ സുരേഷ് ഗോപിയോടൊപ്പം അഭിനയിച്ചപ്പോള്‍ കുറച്ച് ഷോട്ട്‌സ് ഞാന്‍ എടുത്തിട്ടുണ്ട് ആ സിനിമക്ക് വേണ്ടി.

ലോഹിയോട് പറഞ്ഞപ്പോള്‍ ആനിയെ ആലോചിക്കാം എന്നുപറഞ്ഞു. ലോഹിയാണ് വിളിക്കുന്നത്. എന്നിട്ട് പറഞ്ഞു ‘ഒരു കഥ ആലോചിക്കുന്നുണ്ട്, കഥ ഒന്നും ആയിട്ടില്ല പക്ഷെ കഥയില്‍ ഹീറോയിന് പ്രാധാന്യമുള്ള കഥയാണ്. ആനിയുടെ ഡേറ്റിന്റെ അവസ്ഥയെന്താണ്’ എന്ന് ചോദിച്ചു. ഡേറ്റ് അഡ്ജസ്റ്റ് ചെയ്യാമെന്ന് അവരും സമ്മതിച്ചു.

അന്ന് ആനി മലയാളത്തിലെ ഏറ്റവും തിരക്കുള്ള ഹീറോയിന്‍ ആണ്. ലോഹിയുടെ കഥാപാത്രം ആനി ചെയ്തിട്ടില്ല. അല്ലെങ്കില്‍ ലോഹിയുടെ തിരക്കഥയില്‍ കഥാപാത്രം ചെയ്തിട്ടില്ല.

എല്ലാം സെറ്റ് ആയിരുന്നു. പക്ഷെ, പിന്നീടൊരിക്കല്‍ ഞങ്ങളിരിക്കുമ്പോള്‍ ആലോചിച്ചു, ആനി അന്നേ മിടുക്കിയായിട്ടുള്ള വേഷങ്ങള്‍ ചെയ്തുകൊണ്ടിരിക്കുന്ന സമയമാണ്. തന്റേടിയായിട്ടുള്ള കഥാപാത്രങ്ങള്‍ ചെയ്യുന്നുണ്ട്. നമ്മുടെ കഥാപാത്രം വളരെ വിധേയത്വമുള്ള കഥാപാത്രം ആണ്. ഒരു സാധാരണ പെണ്‍കുട്ടിയാണ്. ആനിയാകുമ്പോള്‍ അങ്ങനെയുള്ള പറ്റിക്കലിലേക്ക് പോകില്ലല്ലോ. അങ്ങനെയാണ് മഞ്ജുവിലേക്ക് എത്തുന്നത്,’ സുന്ദർ ദാസ് പറയുന്നു.

Content Highlight: Sundar Das Talking about Manju Warrier and Sallapam Movie