മലയാളികള്ക്ക് ഏറെ പ്രിയപ്പെട്ട സംവിധായകരില് ഒരാളാണ് സിബി മലയില്. സിനിമാപ്രേമികള്ക്ക് മികച്ച നിരവധി സിനിമകള് സമ്മാനിക്കാന് അദ്ദേഹത്തിന് സാധിച്ചിരുന്നു. 1985ല് മുത്താരംകുന്ന് പി.ഒ എന്ന ചിത്രത്തിലൂടെയാണ് സിബി ആദ്യമായി സംവിധായകനാകുന്നത്.
സ്വതന്ത്ര സംവിധായകനാകുന്നതിന് മുമ്പ് പ്രിയദര്ശന്, ഫാസില് ഉള്പ്പെടെയുള്ള മികച്ച സംവിധായകര്ക്കൊപ്പം പ്രവര്ത്തിച്ച ആള് കൂടിയാണ് അദ്ദേഹം. സിബി മലയിലിന്റെ സംവിധാനത്തില് എത്തുന്ന സിനിമകള്ക്ക് ഇന്നും ആരാധകര് ഏറെയാണ്.
ഇപ്പോള് അദ്ദേഹം തന്റെ സംവിധാന കരിയര് ആരംഭിച്ചിട്ട് 40 വര്ഷങ്ങള് പൂര്ത്തിയായിരിക്കുകയാണ്. ഈയിടെ തനിയാവര്ത്തനം, ആഗസ്റ്റ് 1 എന്നീ രണ്ട് സിനിമകളിലൂടെ സിബി മലയില് എന്ന സംവിധായകന്റെ മികവും വൈവിധ്യവും കാണാന് പറ്റുമെന്ന് നടന് മമ്മൂട്ടി പറഞ്ഞിരുന്നു.
ഇരുചിത്രങ്ങളിലും അഭിനയിച്ചിരുന്നത് മമ്മൂട്ടി തന്നെയായിരുന്നു. ഇപ്പോള് മാതൃഭൂമിക്ക് നല്കിയ അഭിമുഖത്തില് മമ്മൂട്ടി പറഞ്ഞ അഭിപ്രായത്തെ കുറിച്ച് സംസാരിക്കുകയാണ് സിബി മലയില്.
‘എസ്.എന് സ്വാമിയുടെ സ്ക്രിപ്റ്റിലാണ് ആഗസ്റ്റ് 1 എന്ന സിനിമ വരുന്നത്. അതേസമയം പലരും കരുതിയത് ആ സിനിമ സംവിധാനം ചെയ്തത് കെ. മധു ആണെന്നാണ്. ഞാന് സംവിധാനം ചെയ്തതാണ് ആ സിനിമയെന്ന് ഒരിക്കലും തോന്നില്ല.
ആഗസ്റ്റ് 1 എന്റെയൊരു പാറ്റേണില് പെട്ട സിനിമ ആയിരുന്നില്ല. അതുവരെ ചെയ്ത സിനിമകളില് നിന്നൊക്കെ വളരെ വ്യത്യസ്തമായ സിനിമയായിരുന്നു അത്. മമ്മൂട്ടിയെ വെച്ച് തനിയാവര്ത്തനം ചെയ്ത അതേ സംവിധായകന് തന്നെ അതിന്റെ ഓപ്പോസിറ്റ് എക്സ്ട്രീമില് നില്ക്കുന്ന മറ്റൊരു സിനിമ ചെയ്തു എന്നതാണ് കാര്യം.
തനിയാവര്ത്തനവും ആഗസ്റ്റ് 1 ഉം നന്നായി വര്ക്കായത് കൊണ്ടാണ് മമ്മൂട്ടി അങ്ങനെ പറയുന്നത്. അദ്ദേഹത്തെ വെച്ച് ഞാന് വേറെ സിനിമകള് ചെയ്തെങ്കില് പോലും കമ്പാരിസന് ചെയ്യാന് പറ്റുന്ന രണ്ട് സിനിമകള് ഇതാകും,’ സിബി മലയില് പറയുന്നു.
Content Highlight: Sibi Malayil Talks About Thaniyavarthanam, August 1 Movie And Mammootty
