കന്നഡയിലെ മികച്ച താരങ്ങളിലൊരാളാണ് ശിവ രാജ്കുമാര്‍. കന്നഡയിലെ പഴയകാല സൂപ്പര്‍സ്റ്റാര്‍ രാജ്കുമാറിന്റെ മകനാണ് ശിവരാജ് കുമാര്‍. ‘കരുനാട ചക്രവര്‍ത്തി’ എന്നറിയപ്പെടുന്ന താരം 140ലധികം ചിത്രങ്ങളില്‍ നായകനായി വേഷമിട്ടു. രജിനികാന്ത് നായകനായ ജയിലറിലെ നരസിംഹ എന്ന ചിത്രത്തിലൂടെ കേരളത്തിലും ശിവണ്ണക്ക് ആരാധകരുണ്ടായി.

കമല്‍ ഹാസന്റെ കടുത്ത ആരാധകനാണ് താനെന്ന് പറയുകയാണ് ശിവ രാജ്കുമാര്‍. കമല്‍ ഹാസന്റെ എല്ലാ സിനിമകളും ഫസ്റ്റ് ഡേ ഫസ്റ്റ് ഷോ കാണാറുള്ളയാളാണ് താനെന്ന് ശിവ രാജ്കുമാര്‍ പറഞ്ഞു. ആരെങ്കിലും കമല്‍ ഹാസന്റെ സിനിമകളെക്കുറിച്ച് കുറ്റം പറയുമ്പോള്‍ താന്‍ അവരുമായി തര്‍ക്കിക്കാറുണ്ടെന്നും അദ്ദേഹത്തെ മോശം പറയുന്നത് തനിക്ക് ഇഷ്ടമല്ലെന്നും താരം കൂട്ടിച്ചേര്‍ത്തു.

ഒരുതവണ കമല്‍ ഹാസനെ നേരിട്ട് കാണാന്‍ അവസരം ലഭിച്ചെന്നും അന്ന് അദ്ദേഹം തന്നെ കെട്ടിപ്പിടിച്ചെന്നും ശിവ രാജ്കുമാര്‍ പറയുന്നു. വീട്ടിലെത്തിയ ശേഷം തന്റെ അച്ഛനോട് അഭിമാനത്തോടെ അക്കാര്യം പറഞ്ഞെന്നും മൂന്ന് ദിവസം കുളിക്കാതെ ഇരുന്നിട്ടുണ്ടെന്നും താരം പറഞ്ഞു. തഗ് ലൈഫിന്റെ ഓഡിയോ ലോഞ്ചില്‍ സംസാരിക്കുകയായിരുന്നു ശിവ രാജ്കുമാര്‍.

‘കമല്‍ സാറിന്റെ വലിയൊരു ഫാനാണ് ഞാന്‍. എത്ര വലിയ ഫാനാണെന്ന് ചോദിച്ചാല്‍ അദ്ദേഹത്തിന്റെ എല്ലാ സിനിമകളും ഒന്നുവിടാതെ കണ്ടിട്ടുണ്ട്. പല സിനിമകളും ഫസ്റ്റ് ഡേ ഫസ്റ്റ് ഷോ തന്നെ കാണാന്‍ ശ്രമിക്കാറുണ്ട്. ഒരുവട്ടം അദ്ദേഹത്തെ നേരില്‍ കാണാനുള്ള അവസരം ലഭിച്ചു. അന്ന് കമല്‍ സാര്‍ എന്നെ കെട്ടിപ്പിടിക്കുകയും ചെയ്തു.

വീട്ടിലെത്തിയപ്പോള്‍ അച്ഛനോട് അഭിമാനത്തോടെ അക്കാര്യം പറഞ്ഞു. മൂന്ന് ദിവസം ഞാന്‍ കുളിക്കാതെ ഇരുന്നു. കമല്‍ സാറിന്റെ മണം എന്നെ വിട്ട് പോകരുതെന്ന ചിന്തയിലാണ് അങ്ങനെ ചെയ്തത്. കമല്‍ സാറിന്റെ സിനിമകളെ കുറ്റം പറയുന്നവരോട് ഞാന്‍ ഒരുപാട് തര്‍ക്കിച്ചിട്ടുണ്ട്. അവരുടെ കുറ്റം കൊണ്ടാണ് സിനിമ ഇഷ്ടപ്പെടാത്തത് എന്നൊക്കെ പറഞ്ഞിട്ടുണ്ട്.

എനിക്ക് ഈയടുത്ത് ക്യാന്‍സര്‍ പിടിപെട്ടു. അതിന്റെ സര്‍ജറി കഴിഞ്ഞ് വിശ്രമിച്ചുകൊണ്ടിരുന്നപ്പോള്‍ സിനിമാലോകത്ത് നിന്ന് ആദ്യം വിളിച്ചത് കമല്‍ സാറായിരുന്നു. സുഖവിവരങ്ങളൊക്കെ അദ്ദേഹം അന്വേഷിച്ചു. എന്റെ ജീവിതത്തില്‍ മറക്കാനാകാത്ത നിമിഷങ്ങളിലൊന്നായിരുന്നു അത്,’ ശിവ രാജ്കുമാര്‍ പറയുന്നു.

Content Highlight: Shiva Rajkumar saying he is a big fan of Kamal Haasan