മെസിക്ക് അര്‍ജന്റീനയില്‍ ലഭിക്കുന്ന ബഹുമാനം പോര്‍ച്ചുഗലില്‍ റോണോയ്ക്ക് ലഭിക്കുന്നില്ല; മുന്‍ ബ്രസീല്‍ താരത്തിന്റെ വീഡിയോ ലൈക്ക് ചെയ്ത് താരം

പോര്‍ച്ചുഗല്‍ ദേശീയ ഫുട്‌ബോള്‍ ടീമില്‍ താന്‍ നേരിട്ട മോശം അനുഭവത്തെക്കുറിച്ചുള്ള വീഡിയോ സോഷ്യല്‍ മീഡിയയില്‍ ലൈക്ക് ചെയ്ത് സൂപ്പര്‍ താരം ക്രിസ്റ്റ്യാനോ റൊണാള്‍ഡോ.

അര്‍ജന്റീനയില്‍ ലയണല്‍ മെസിക്ക് ലഭിക്കുന്ന പരിഗണനയും ബഹുമാനവും പോര്‍ച്ചുഗലില്‍ റൊണാള്‍ഡോയ്ക്ക് ലഭിക്കുന്നില്ലെന്ന് വിമര്‍ശിക്കുന്ന വീഡിയോയാണ് താരം തന്റെ ഔദ്യോഗിക ഇന്‍സ്റ്റാഗ്രാം അക്കൗണ്ടിലൂടെ ലൈക്ക് ചെയ്തത്.

മുന്‍ ബ്രസീലിയന്‍ താരം ഫിലിപ്പ് മെലോ പങ്കുവെച്ച വീഡിയോയിലാണ് റൊണാള്‍ഡോയ്ക്ക് പിന്തുണയുമായി രംഗത്തെത്തിയത്.

‘അര്‍ജന്റീനക്കാര്‍ മെസിയോട് കാണിക്കുന്ന ബഹുമാനവും പോര്‍ച്ചുഗീസുകാര്‍ റൊണാള്‍ഡോയോട് കാണിക്കുന്ന സമീപനവും തമ്മില്‍ വളരെ വലിയ വ്യത്യാസമുണ്ട്. റൊണാള്‍ഡോയോട് കാണിക്കുന്നത് വിചിത്രമായ രീതിയിലുള്ള പെരുമാറ്റമാണ്,’ എന്ന് മെലോ വീഡിയോയില്‍ പറഞ്ഞു. ഈ വീഡിയോയാണ് റൊണാള്‍ഡോ ലൈക്ക് ചെയ്തതത്.

വെള്ളിയാഴ്ച പോസ്റ്റ് ചെയ്ത ഈ വീഡിയോ ലക്ഷക്കണക്കിന് ആളുകളാണ് കണ്ടത്. റൊണാള്‍ഡോയുടെ അക്കൗണ്ടില്‍ നിന്ന് ഇതിന് ലൈക്ക് വന്നതോടെ, പോര്‍ച്ചുഗല്‍ ദേശീയ ടീം മാനേജ്‌മെന്റും റൊണാള്‍ഡോയും തമ്മിലുള്ള ഭിന്നത വീണ്ടും മറനീക്കി പുറത്തുവന്നു.

യുവേഫ നേഷന്‍സ് ലീഗില്‍ നോര്‍വേയ്‌ക്കെതിരായ മത്സരത്തില്‍ റൊണാള്‍ഡോയെ സബ്സ്റ്റിറ്റിയൂട്ട് ബെഞ്ചിലിരുത്തുകയും വാംഅപ്പ് ചെയ്യിപ്പിച്ച ശേഷം കളത്തിലിറക്കാതിരിക്കുകയും ചെയ്തത് വലിയ വിവാദമായിരുന്നു. ഇതിന് പിന്നാലെ പരിശീലകന്‍ ജോര്‍ജ്ജ് ജീസസ് നടത്തിയ വാര്‍ത്താസമ്മേളനത്തിന് ശേഷം റൊണാള്‍ഡോ ടീം ക്യാമ്പ് വിട്ടിരുന്നു.

ടീം ക്യാമ്പ് വിടുന്നതായി പ്രഖ്യാപിച്ചുകൊണ്ട് റൊണാള്‍ഡോ ഇന്‍സ്റ്റാഗ്രാമില്‍ കുറിപ്പ് പങ്കുവെച്ചിരുന്നു. ദേശീയ ടീമില്‍ നിന്ന് പിന്മാറാനുണ്ടായ യഥാര്‍ത്ഥ കാരണങ്ങള്‍ അനുയോജ്യമായ സമയത്ത് പോര്‍ച്ചുഗീസ് ജനതയോട് വ്യക്തമാക്കുമെന്ന് അദ്ദേഹം അറിയിച്ചു.

തന്നെ ബെഞ്ചിലിരുത്തിയതില്‍ വാര്‍ത്താസമ്മേളനത്തില്‍ പരസ്യമായി ഖേദം പ്രകടിപ്പിക്കാമെന്ന് പരിശീലകന്‍ ജോര്‍ജ്ജ് ജീസസ് ഉറപ്പുനല്‍കിയിരുന്നെന്നും എന്നാല്‍ അദ്ദേഹം അത് പാലിച്ചില്ലെന്നും, ഇത് കാരണം റൊണാള്‍ഡോയ്ക്ക് വിശ്വാസവഞ്ചന അനുഭവപ്പെട്ടെന്നും അദ്ദേഹത്തിന്റെ സുഹൃത്തും മാധ്യമപ്രവര്‍ത്തകനുമായ എഡു അഗ്വീറെ വെളിപ്പെടുത്തി.

ദേശീയ ടീമിനെ നയിക്കുന്നതില്‍ മാനേജ്‌മെന്റിന് വലിയ വീഴ്ച പറ്റിയെന്നും, പോര്‍ച്ചുഗീസുകാര്‍ റൊണാള്‍ഡോയെ അര്‍ഹിക്കുന്ന രീതിയില്‍ ബഹുമാനിച്ചില്ലെന്നും വ്യക്തമാക്കി റൊണാള്‍ഡോയുടെ സഹോദരി എല്‍മ ഡോസ് സാന്റോസ് അവീറോയും സോഷ്യല്‍ മീഡിയയിലൂടെ രംഗത്തെത്തിയിട്ടുണ്ട്.

Content Highlight: Ronaldo does not receive the same respect in Portugal that Messi enjoys in Argentina; the star liked a video by a former Brazilian player.