രാമായണ ട്രെയ്‌ലർ പുറത്ത്, രൺബീറിനെക്കാൾ ശ്രദ്ധ നേടി യാഷിന്റെ രാവണൻ

ഇന്ത്യൻ സിനിമാ പ്രേക്ഷകർ ഏറെ പ്രതീക്ഷയോടെ കാത്തിരിക്കുന്ന ചിത്രങ്ങളിലൊന്നായ ‘രാമായണ’യുടെ ആദ്യ ട്രെയ്‌ലർ പുറത്തിറങ്ങി. വമ്പൻ താരനിരയും ദൃശ്യവിസ്മയവും ഉയർന്ന സാങ്കേതിക മികവും കൊണ്ട് ട്രെയ്‌ലർ ഇതിനോടകം തന്നെ സോഷ്യൽ മീഡിയയിൽ ശ്രദ്ധ നേടുകയാണ്.

നിതേഷ് തിവാരി സംവിധാനം ചെയ്യുന്ന സിനിമ ഇന്ത്യൻ സിനിമാ ചരിത്രത്തിലെ തന്നെ ഏറ്റവും വലിയ ബജറ്റിലാണ് ഒരുക്കിയിരിക്കുന്നത്. ഇന്ത്യൻ സിനിമയിലെ ഏറ്റവും വലിയ ദൃശ്യവിസ്മയങ്ങളിലൊന്നായി ചിത്രം മാറുമെന്ന പ്രതീക്ഷയും ട്രെയ്‌ലർ നൽകുന്നുണ്ട്. ചിത്രത്തിന്റെ ട്രെയിലര്‍ മലയാളം, ഹിന്ദി, കന്നഡ, തെലുങ്ക്, തമിഴ് എന്നീ അഞ്ച് ഭാഷകളിലായാണ് അണിയറപ്രവർത്തകർ പുറത്തുവിട്ടത്.

ചിത്രത്തിൽ രാമനായി രൺബീറും സീതയായി സായിപല്ലവിയയും രാവണനായി യാഷുമാണ് എത്തുന്നത്. എന്നാൽ ട്രെയ്‌ലർ പുറത്തുവന്നതോടെ രൺബീറിനെക്കാൾ പ്രേക്ഷക കയ്യടി നേടുകയാണ് യാഷിന്റെ രാവണൻ. ട്രെയിലറിലെ യാഷിന്റെ കഥാപാത്രമായ രാവണന് ഇപ്പോൾ സോഷ്യൽ മീഡിയയിൽ വൻ സ്വീകാര്യതയാണ് ലഭിക്കുന്നത്. താരത്തിന്റെ ലുക്കും സ്ക്രീൻ പ്രസൻസും മാസ് അവതരണവും സോഷ്യൽ മീഡിയയിൽ വലിയ ചർച്ചയായി മാറിയിട്ടുണ്ട്.

നമിത് മൽഹോത്രയും വിഷ്വൽ ഇഫക്റ്റ്സ് സ്റ്റുഡിയോയായ ഡി.എൻ.ഇജിയും യാഷിന്റെ മോൺസ്റ്റർ മൈൻഡ് ക്രീയേഷൻഷനും ചേർന്നാണ് ചിത്രം നിർമിക്കുന്നത്. രണ്ട് ഭാഗങ്ങളിലായി ഇറങ്ങുന്ന സിനിമയുടെ ബജറ്റ് ഏകദേശം 4000 കോടി രൂപയാണ്. ഇൻസെപ്ഷൻ, ഇന്റർസ്റ്റെല്ലാർ തുടങ്ങിയ സിനിമകൾക്ക് വി.എഫ്.എക്സ് നൽകിയ ഡി.എൻ.ഇ.ജി സ്റ്റുഡിയോയാണ് രാമായണത്തിന് വിഷ്വൽ ഇഫക്റ്റുകൾ നൽകുന്നത്.

എട്ട് തവണ ഓസ്കാർ പുരസ്ക്കാരം നേടിയ വിഷ്വൽ ഇഫക്റ്റ് സ്റ്റുഡിയോ കൂടിയാണ് ഡി.എൻ.ഇ.ജി. ലോകപ്രശസ്ത ജർമ്മൻ സംഗീത സംവിധായകൻ ഹാൻസ് സിമ്മറും എ.ആർ റഹ്മാനും ചേർന്നാണ് ചിത്രത്തിന് സംഗീതം ഒരുക്കിയിരിക്കുന്നത്.

ദൂരദർശനിലെ രാമായണം പരമ്പരയിൽ ശ്രീരാമനായി തിളങ്ങിയ അരുൺ ഗോവിൽ ഈ ചിത്രത്തിൽ ദശരഥനായി തിരിച്ചെത്തുന്നുണ്ട്. ഹനുമാനായി സണ്ണി ഡിയോളും ലക്ഷ്മണനായി രവി ദുബെയും മണ്ഡോദരിയായി കാജൽ അഗർവാളും കൈകേയിയായി ലാറ ദത്തയും ശൂർപ്പണഖയായി രാകുൽ പ്രീത് സിംഗും പ്രധാന വേഷങ്ങളിലെത്തുന്നു. മലയാളത്തിന്റെ പ്രിയനടി ശോഭനയും ചിത്രത്തിൽ ശ്രദ്ധേയ കഥാപാത്രത്തെ അവതരിപ്പിക്കുന്നുണ്ട്. വമ്പൻ താരനിര അണിനിരക്കുന്ന ചിത്രം 2026 ദീപാവലി റിലീസായാണ് തിയേറ്ററുകളിലെത്തുന്നത്.