'രാവിലെ എണീറ്റ് ഇന്‍സ്റ്റഗ്രാം അക്കൗണ്ട് കണ്ട് ഇവാന്‍ കലിയൂഷ്നി ഞെട്ടിക്കാണും'; ഒറ്റരാത്രികൊണ്ട് വര്‍ധിച്ചത് റെക്കോര്‍ഡ് ഫോളോവേഴ്‌സ്; മഞ്ഞപ്പടയുടെ പവറെന്ന് ആരാധകര്‍

കഴിഞ്ഞ ദിവസം കൊച്ചിയല്‍ നടന്ന ഐ.എസ്.എല്ലിന്റ ഉദ്ഘാടന മത്സരത്തില്‍ കേരളാ ബ്ലാസ്റ്റേഴ്സിന് വലിയ വിജയമാണ് നേടാനായത്. ഇരട്ട ഗോളുമായി ഇവാന്‍ കലിയൂഷ്നിയും തകര്‍പ്പന്‍ ഗോളില്‍ അഡ്രിയാന്‍ ലൂണയും തകര്‍ത്തുകളിച്ചപ്പോള്‍ ഈസ്റ്റ് ബംഗാളിനെ ഒന്നിനെതിരെ മൂന്ന് ഗോളിനാണ് ബ്ലാസ്റ്റേഴ്സ് തോല്‍പ്പിച്ചുവിട്ടത്.

ബ്ലാസ്റ്റേഴ്സ് വിജയത്തിന് പിന്നാലെ ഉക്രൈന്‍ യുവതാരം ഇവാന്‍ കലിയൂഷ്നിയുടെ പ്രതീക്ഷിക്കാത്ത പ്രകടനം തന്നെയാണ് സോഷ്യല്‍ മീഡിയയിലും ചര്‍ച്ചയാകുന്നത്.

ഐ.എസ്.എല്ലില്‍ അരങ്ങേറ്റം കുറിച്ച തൊട്ടടുത്ത നിമിഷം തന്നെ ഇവാന്‍ കലിയൂഷ്നി ആരാണെന്ന് സമൂഹമാധ്യമങ്ങളില്‍ ബ്ലാസ്‌റ്റേഴ്‌സ് ആരാധകര്‍ തിരഞ്ഞിരുന്നു. ഇപ്പോഴിതാ ഒറ്റ ദിവസം കൊണ്ട് തന്റെ ഇന്‍സ്റ്റഗ്രാം അക്കൗണ്ടില്‍ നാല്‍പതിനായിരത്തില്‍ കൂടുതല്‍ ഫോളോവേഴ്‌സിനെ സ്വന്തമാക്കിയിരിക്കുകയാണ് ഇവാന്‍ കലിയൂഷ്നി.

കഴിഞ്ഞ ദിവസം കളി തുടങ്ങുമ്പോള്‍ 60,000 ഫോളോവേഴ്‌സ് മാത്രമുണ്ടായിരുന്ന ഇവാന്‍ കലിയൂഷ്നിയുടെ അക്കൗണ്ടിന് നിലവല്‍ 10,50,00 ഫോളോവേഴ്‌സുണ്ട്. ഇത് കേരളാ ബ്ലാസ്‌റ്റേഴ്‌സ് ഫാന്‍സിന്റെ പവറാണെന്നാണ് ആരാധക കൂട്ടയ്മായ മഞ്ഞപ്പടയുടെ ഗ്രൂപ്പില്‍ വന്ന ഒരു കമന്റ്.

വായ്പാ അടിസ്ഥാനത്തിലാണ് ഇവാന്‍ കേരള ബ്ലാസ്റ്റേഴ്സിലെത്തിയത്. ഉക്രൈനിലെ ഖാര്‍കിവ് ഒബ്ലാസ്റ്റിലെ സോളോകീവ് റായിയോണില്‍ 1998 ജനുവരി 21 നാണ് ഇവാന്റെ ജനനം. 2005 മുതല്‍ 2008 വരെ താരം ആഴ്സനലിനുവേണ്ടി കളിച്ചു. ശേഷം 2008 മുതല്‍ 2015 വരെ മെറ്റാലിസ്റ്റ് ഖാര്‍കിവിനുവേണ്ടിയും പന്തുതട്ടി.

CONTENT HIGHLIGHTS: Ivan Kaliushny has gained more than 40,000 followers on his Instagram account in a single day