പശ്ചിമ ഘട്ട സംരക്ഷണത്തിനായുള്ള കസ്തൂരി രംഗൻ റിപ്പോർട്ട് തള്ളി കർണാടക നിയമസഭ; പുനപരിശോധിക്കാൻ പ്രമേയം പാസാക്കി

ബെംഗളൂരു: പശ്ചിമഘട്ട സംരക്ഷണവുമായി ബന്ധപ്പെട്ട കസ്തൂരിരംഗൻ റിപ്പോർട്ട് കർണാടക നിയമസഭ പൂർണമായും തള്ളി. ഈ റിപ്പോർട്ടിൽ ആവശ്യമായ മാറ്റങ്ങൾ വരുത്തി പുനപരിശോധിക്കണം എന്ന് ആവശ്യപ്പെടുന്ന പ്രമേയം എല്ലാ രാഷ്ട്രീയ പാർട്ടികളുടെയും പിന്തുണയോടെ സഭ ഐകകണ്ഠ്യേന പാസാക്കി.

കേന്ദ്ര പരിസ്ഥിതി മന്ത്രാലയം പുറത്തിറക്കിയ ഏഴാമത് കരട് വിജ്ഞാപനത്തെക്കുറിച്ച് വിശദമായി ചർച്ച ചെയ്ത ശേഷമാണ് ഈ തീരുമാനം എടുത്തത്.

കർണാടകയിലെ 10 ജില്ലകളിലായി 20,668 ചതുരശ്ര കിലോമീറ്റർ പ്രദേശം പരിസ്ഥിതിലോല മേഖലയായി മാറ്റാനാണ് കേന്ദ്ര വിജ്ഞാപനത്തിൽ പറയുന്നത്. എന്നാൽ നിലവിലെ രീതിയിൽ ഇത് നടപ്പാക്കാൻ കഴിയില്ലെന്ന് ഭരണ-പ്രതിപക്ഷ എം.എൽ.എമാർ ഒരുപോലെ വ്യക്തമാക്കി.

ഉപഗ്രഹ ചിത്രങ്ങൾ (സാറ്റലൈറ്റ് വിവരങ്ങൾ) മാത്രം നോക്കിയാണ് ഈ റിപ്പോർട്ട് ഉണ്ടാക്കിയിരിക്കുന്നത് എന്നും, ഇത് തീർത്തും അശാസ്ത്രീയമാണെന്നും സഭ വിലയിരുത്തി.

വനത്തിന്റെ യഥാർത്ഥ അതിർത്തി കണ്ടെത്താൻ ഉദ്യോഗസ്ഥർ നേരിട്ടെത്തി സ്ഥലപരിശോധന നടത്തണമെന്ന് സർക്കാർ വ്യക്തമാക്കി. തങ്ങൾ പരിസ്ഥിതി സംരക്ഷണത്തിന് എതിരല്ലെന്നും, എന്നാൽ തലമുറകളായി അവിടെ ജീവിക്കുന്ന കർഷകരെയും ആദിവാസികളെയും മറ്റ് കുടുംബങ്ങളെയും ഈ തീരുമാനം ബാധിക്കരുതെന്നും നേതൃത്വം വ്യക്തമാക്കി. നേരിട്ടുള്ള ഈ പരിശോധന പൂർത്തിയാക്കാൻ കേന്ദ്രത്തോട് ഒരു വർഷത്തെ സമയം ആവശ്യപ്പെടും.

കേരളം ചെയ്തതുപോലെ കർണാടകയും ഈ സർവേ നടത്താൻ വിരമിച്ച ഒരു സുപ്രീം കോടതി ജഡ്ജിയുടെ നേതൃത്വത്തിൽ ഉന്നതതല സമിതി ഉണ്ടാക്കും. കൂടാതെ പ്രാദേശികമായി കാര്യങ്ങൾ വിലയിരുത്താൻ പഞ്ചായത്ത് തലത്തിലും സമിതികൾ രൂപീകരിക്കും.

പരിസ്ഥിതിലോല പ്രദേശങ്ങൾ, വനങ്ങൾ, കൃഷിഭൂമികൾ, ജനങ്ങൾ താമസിക്കുന്ന ഇടങ്ങൾ എന്നിവ നേരിട്ട് കണ്ട് കൃത്യമായി തിരിക്കാനാണ് ഈ ശ്രമം. ഈ വിഷയത്തിൽ പ്രധാനമന്ത്രിയെയും കേന്ദ്ര പരിസ്ഥിതി മന്ത്രിയെയും നേരിൽക്കണ്ട് ആശങ്കകൾ അറിയിക്കാൻ സർവ്വകക്ഷി സംഘത്തെ അയക്കാനും തീരുമാനിച്ചു.

സംസ്ഥാനത്തെ വരൾച്ചയും കസ്തൂരിരംഗൻ റിപ്പോർട്ടും ചർച്ച ചെയ്യാൻ വിളിച്ച പ്രത്യേക നിയമസഭാ സമ്മേളനത്തിലാണ് ഈ പ്രമേയം പാസാക്കിയത്.

Content Highlight: Karnataka Assembly Rejects Kasturirangan Report on Western Ghats Conservation.