സിനിമാപ്രേമികള്‍ക്ക് ഏറെ പ്രിയപ്പെട്ട സംവിധായകനും നടനുമാണ് ജോണി ആന്റണി. സി.ഐ.ഡി മൂസ, കൊച്ചി രാജാവ്, തുറുപ്പു ഗുലാന്‍, ഈ പട്ടണത്തില്‍ ഭൂതം ഉള്‍പ്പെടെയുള്ള ജനപ്രിയ സിനിമകള്‍ സമ്മാനിച്ചത് ജോണി ആന്റണി ആയിരുന്നു. അദ്ദേഹത്തിന്റെ സംവിധാന കരിയറിലെ ഏറ്റവും വലിയ വിജയമായ ചിത്രമാണ് സി.ഐ.ഡി മൂസ.

മികച്ച താരനിര ഒന്നിച്ച ചിത്രമായിരുന്നു ഇത്. മലയാള സിനിമയുടെ ഹാസ്യ സാമ്രാട്ട് ജഗതി ശ്രീകുമാറും സിനിമയില്‍ ഒരു പ്രധാന വേഷത്തില്‍ എത്തിയിരുന്നു. ഇപ്പോള്‍ ജഗതിയെ കുറിച്ച് സംസാരിക്കുകയാണ് ജോണി ആന്റണി.

സി.ഐ.ഡി മൂസയിലെ ഒരു സീന്‍ ജഗതി കയ്യില്‍ നിന്നിട്ടതാണെന്ന് അദ്ദേഹം പറയുന്നു. നായകനും അയാളുടെ വളര്‍ത്തു പട്ടിയും ജനലിന്റെ അടുത്തു നിന്ന് നായികയെയും അവരുടെ പട്ടിയെയും നോക്കുന്ന ഒരു സീനുണ്ടെന്നും നായകന്റെ അളിയനായ ജഗതി ആ സമയം അമ്മായിയപ്പനായ ഒടുവില്‍ ഉണ്ണികൃഷ്ണന്റെ അടുത്ത് പറയുന്ന ഒരു കാര്യമുണ്ടെന്നും ജോണി ആന്റണി പറഞ്ഞു.

അത് കഴിഞ്ഞ് ഒടുവില്‍ ഉണ്ണികൃഷ്ണന്‍ മറുപടി കൊടുത്തു കഴിയുമ്പോള്‍ ജഗതിയുടെ ഒരു എക്‌സ്പ്രഷന്‍ ഉണ്ട് അത് അദ്ദേഹത്തിന് മാത്രമേ ചെയ്യാന്‍ കഴിയുകയെന്നും ജോണി ആന്റണി പറഞ്ഞു. ജഗതി ഷൂട്ട് കഴിഞ്ഞ് വന്നപ്പോള് ഇത് അനിയന് സ്‌പെഷ്യല്‍ ആണെന്ന് തന്നോട് പറഞ്ഞുവെന്നും അദ്ദേഹം കൂട്ടിച്ചേര്‍ത്തു. ജാങ്കോ സ്‌പേസില്‍ സംസാരിക്കുകയായിരുന്നു ജോണി ആന്റണി.

‘നായകനും അര്‍ജുന്‍ എന്ന പട്ടിയും കൂടെ ജനലിന്റെ അവിടെ നിന്നുള്ള ഒരു സീനുണ്ട്. ഭാവനയും അവര് വളര്‍ത്തുന്ന പട്ടിയുമാണ് അപ്പുറത്ത്. മറ്റേ പട്ടിയെ നോക്കിയാണ് അര്‍ജുന്‍ നില്‍ക്കുന്നത്, ഇവിടെ നായകന്‍ നായികയെ നോക്കി നില്‍ക്കുന്നു. അമ്പിളി ചേട്ടനാണ് നായകന്റെ അളിയന്‍. ഒടുവില്‍ ഉണ്ണി കൃഷണന്‍ നായകന്റെ അച്ഛനാണ്.

ജനലിന്റെ അടുത്തുനിന്ന് ഇത് കണ്ടുകൊണ്ട് ജഗതി ചേട്ടന്‍ ഉണ്ണി ചേട്ടനോട് പറയുവാണ് ‘ദേ കണ്ടോ മോന്‍ പട്ടിയോടാണ് കളി, വിവരം അറിയും’. ഉടനെ ഉണ്ണിയേട്ടന്‍ പറയും ഇത് തന്നെയാണ് ‘ഞാന്‍ എന്റെ മോളോട് പറയാറുള്ളത്’ എന്ന്. അത് പറഞ്ഞ് കഴിയുമ്പോള്‍ ഉള്ള അമ്പിളി ചേട്ടന്റെ ഒരു എക്‌സ്പ്രഷനുണ്ട്. അത് അദ്ദേഹത്തിന് മാത്രമെ ചെയ്യാന്‍ പറ്റുകയുള്ളു. ഷൂട്ട് കഴിഞ്ഞപ്പോള്‍ പുള്ളി വന്നിട്ട് എന്നോട് ‘ഇത് അനിയന് സ്‌പെഷ്യലാണ്’ അങ്ങനെ പറഞ്ഞു,’ ജോണി ആന്റണി പറയുന്നു.

Content Highlight: Johny Antony  talks  about Jagathy Sreekumar