മലയാളികള്ക്ക് ഏറെ പരിചിതനായ നടനാണ് ഫര്ഹാന് ഫാസില്. സംവിധായകന് ഫാസിലിന്റെ ഇളയ മകനും നടന് ഫഹദ് ഫാസിലിന്റെ സഹോദരനുമാണ് ഫര്ഹാന്. 2014ല് രാജീവ് രവി സംവിധാനം ചെയ്ത ഞാന് സ്റ്റീവ് ലോപ്പസ് എന്ന ചിത്രത്തിലൂടെയാണ് അദ്ദേഹം തന്റെ കരിയര് ആരംഭിക്കുന്നത്.
2017ല് അനീഷ് അന്വര് സംവിധാനം ചെയ്ത റൊമാന്റിക്-കോമഡി ചിത്രമായ ബഷീറിന്റെ പ്രേമലേഖനം ആയിരുന്നു ഫര്ഹാന്റെ രണ്ടാമത്തെ ചിത്രം. പിന്നീട് അണ്ടര് വേള്ഡ് (2019), ഭീഷ്മ പര്വം (2022), തുടരും (2025) എന്നീ ചിത്രങ്ങളില് അഭിനയിച്ചു.
എന്നാല് 11 വര്ഷത്തെ കരിയറില് ഈ അഞ്ച് സിനിമകളില് മാത്രമാണ് ഫര്ഹാന് അഭിനയിച്ചത്. ഇപ്പോള് അതിനെ കുറിച്ച് പറയുകയാണ് നടന്. ദി നെക്സ്റ്റ് 14 മിനിട്സ് എന്ന യൂട്യൂബ് ചാനലിന് നല്കിയ അഭിമുഖത്തില് സംസാരിക്കുകയായിരുന്നു ഫര്ഹാന് ഫാസില്.
‘ഞാന് ഇപ്പോള് 11 വര്ഷമായി സിനിമയില് എത്തിയിട്ട്. എന്നാല് 11 വര്ഷത്തിന്റെ ഇടയില് എനിക്ക് അഞ്ച് സിനിമകളാണ് ചെയ്യാന് ആയിരിക്കുന്നത്. ഞാന് സിനിമയെ വളരെ സീരിയസായി തന്നെയാണ് കാണുന്നത്.
പക്ഷെ ഞാന് കൂടുതല് ചൂസി ആകുന്നത് കൊണ്ടാണോ അതോ എന്നെ തേടി എക്സൈറ്റ് ചെയ്യിക്കുന്ന കഥാപാത്രങ്ങള് വരാത്തത് കൊണ്ടാണോ സിനിമകള് അധികം ചെയ്യാന് പറ്റാതെ പോയതെന്ന് എനിക്ക് അറിയില്ല.
എനിക്ക് സത്യത്തില് 10 വര്ഷത്തിന്റെ ഇടയില് 20 സിനിമകള് ചെയ്യണമെന്ന് ആഗ്രഹമുണ്ടായിരുന്നു. പക്ഷെ അഞ്ചെണ്ണം മാത്രമേ ചെയ്യാന് പറ്റിയുള്ളൂ. ഇനിയെങ്കിലും സ്പീഡ് കൂട്ടണമെന്ന് എനിക്ക് ആഗ്രഹമുണ്ട്. ഭീഷ്മ പര്വം സിനിമയുടെ സമയത്ത് മമ്മൂക്ക പറഞ്ഞ കാര്യങ്ങള് എനിക്ക് ഇപ്പോഴും ഓര്മയുണ്ട്.
‘നീ ഇങ്ങനെ ചൂസ് ചെയ്യാനൊന്നും ആയിട്ടില്ല കേട്ടോ. നീ പടങ്ങള് ചെയ്യൂ. പടങ്ങള് ചെയ്തു കൊണ്ടിരിക്കൂ. അതാണ് ഒരു നടന് ചെയ്യേണ്ടത്’ എന്നാണ് അദ്ദേഹം എന്നോട് പറഞ്ഞത്. ഞാന് ആ ഉപദേശം ഇനി സീരിയസായി എടുക്കണമെന്ന് കരുതി നില്ക്കുകയാണ്. കുറച്ച് കൂടെ പടങ്ങള് ചെയ്യണം,’ ഫര്ഹാന് ഫാസില് പറയുന്നു.
Content Highlight: Farhaan Faasil Talks About Mammootty’s Advice
