ടൊവിനോയെ ചായം പൂശി കറുപ്പിച്ചതല്ല, ഇത് ടാനിങ്; വിമര്‍ശനങ്ങളോട് ഡോ. ബിജു

അദൃശ്യജാലകങ്ങള്‍ എന്ന പുതിയ ചിത്രത്തിലെ കേന്ദ്ര കഥാപാത്രത്തെ അവതരിപ്പിക്കാനായി ടൊവിനോ തോമസിനെ തെരഞ്ഞെടുത്തതിനും മേക്കപ്പിനുമെതിരെ ഉയരുന്ന വിമര്‍ശനങ്ങളോട് പ്രതികരിച്ച് സംവിധായകന്‍ ഡോ. ബിജു.

കറുത്ത നിറമുള്ള കഥാപാത്രത്തിന് വേണ്ടി കറുത്തവനായ ഒരു നടനെ തെരഞ്ഞെടുക്കുന്നതിന് പകരം വെളുത്ത നിറമുള്ള ടൊവിനോയെ കറുപ്പ് ചായം പൂശിയെടുത്തു എന്നായിരുന്നു വിമര്‍ശനം.

എന്നാല്‍ തന്റെ ചിത്രത്തിലെ കഥാപാത്രത്തിനായി ടൊവിനോയെ കറുപ്പ് ചായം പൂശിയിട്ടില്ലെന്നും ടാന്‍ ആണ് നല്‍കിയിരിക്കുന്നതെന്നും ഡോ. ബിജു പ്രതികരിച്ചു.

‘ഒരാളെ കറുപ്പ് ചായം പൂശുന്നതും, കഥാപാത്രത്തിന് വേണ്ടി ടാന്‍ ചെയ്യുന്നതും രണ്ടാണ് എന്ന മിനിമം ധാരണയെങ്കിലും വേണ്ടേ സുഹൃത്തേ. ഇമ്മാതിരി ഘടാഘടിയന്‍ ആരോപണമുന്നയിക്കുന്നതിന് മുമ്പ് കറുപ്പടിക്കലും ടാനിങ്ങും രണ്ടാണ് എന്നെങ്കിലും മനസ്സിലാകുന്നില്ലെങ്കില്‍ പിന്നെന്ത് പറയാന്‍,’ ഡോ. ബിജു പറഞ്ഞു.

ടൊവിനോക്ക് ജന്മദിനാശംസകള്‍ നേര്‍ന്നുകൊണ്ട് ഡോ. ബിജു എഴുതിയ ഫേസ്ബുക്ക് കുറിപ്പിന് താഴെ വന്ന കമന്റിനാണ് ഡോ. ബിജു ഈ മറുപടി നല്‍കിയത്.