മെസിയൊന്നും ചിത്രത്തിലില്ല; മറഡോണക്ക് ശേഷം ചരിത്രമെഴുതി അർജന്റൈൻ നായകൻ

ഇതിഹാസ താരം ലയണൽ മെസിയുടെ പടിയിറക്കത്തിന് ശേഷമുള്ള ആദ്യ മത്സരത്തിൽ വമ്പൻ വിജയമായിരുന്നു അർജന്റീന സ്വന്തമാക്കിയിരുന്നത്. സൗഹൃദ മത്സരത്തിൽ ബൊളീവിയയെ എതിരില്ലാത്ത നാല് ഗോളുകൾക്കാണ് അർജന്റീന വീഴ്ത്തിയത്.

മത്സരത്തിൽ ലൗട്ടാരൊ മാർട്ടിനസ്, നിക്കോ പാസ്, ക്രിസ്റ്റ്യൻ റൊമേറോ, ജോസ് മാനുവൽ ലോപസ് എന്നിവരാണ് അർജന്റീനക്ക് വേണ്ടി ഗോളുകൾ നേടിയത്. അർജന്റീനക്കൊപ്പം ക്യാപ്റ്റനായുള്ള റൊമേറോയുടെ അരങ്ങേറ്റ മത്സരം കൂടിയായിരുന്നു ഇത്. നായകനായുള്ള ആദ്യ മത്സരത്തിൽ തന്നെ എതിരാളികളുടെ വലയിൽ പന്തെത്തിക്കാനും റൊമേറോക്ക് സാധിച്ചു.

ഇതോടെ ഇതിഹാസ താരം ഡീഗോ മറഡോണക്ക് ശേഷം അർജന്റീനക്ക് വേണ്ടി ക്യാപ്റ്റനായുള്ള അരങ്ങേറ്റ മത്സരത്തിൽ തന്നെ ഗോൾ നേടുന്ന രണ്ടാമത്തെ താരമായും റൊമേറോ മാറി. 1985ൽ പരാഗ്വേക്കെതിരെയായിരുന്നു മറഡോണയുടെ ക്യാപ്റ്റൻസി അരങ്ങേറ്റം. ഇതിന് ശേഷം വന്ന മെസിയടക്കമുള്ള പല ക്യാപ്റ്റന്മാർക്കും നേടാനാവാത്ത റെക്കോഡാണ് റൊമേറോ ഈ ഒറ്റ ഗോളോടെ സ്വന്തമാക്കിയിരിക്കുന്നത്.

മെസി ഇന്റർനാഷണൽ ഫുട്ബോളിൽ നിന്നും വിരമിച്ചതിന് പിന്നാലെയായിരുന്നു റൊമേറോയെ ടീമിന്റെ പുതിയ ക്യാപ്റ്റനായി തെരഞ്ഞെടുത്തത്. അർജന്റീന ടീമിന്റെ മൂന്നാം ക്യാപ്റ്റനായിരുന്നു റൊമേറോ. മെസിക്കും നിക്കോളാസ് ഒട്ടമെന്റിക്കും ശേഷമായിരുന്നു റൊമേറോയുടെ സ്ഥാനം. ലോകകപ്പിന് ശേഷം ഒട്ടമെന്റിയും നാഷണൽ ടീമിൽ നിന്നും വിരമിച്ചിരുന്നു. ഇതോടെയാണ് താരത്തിനെ തേടി ഈ വലിയ ചുമതലയെത്തിയത്.

ഒക്ടോബർ ആറിനാണ് അർജന്റീനയുടെ അടുത്ത മത്സരം നടക്കുന്നത്. അർജന്റീനക്കൊപ്പമുള്ള മെസിയുടെ വിടവാങ്ങൽ മത്സരം കൂടിയായിരിക്കും ഇത്. ബെനിനെതിരെയായിരിക്കും മെസി അവസാനമായി നീല ജേഴ്സി അണിയുക. 2028 കോപ്പ അമേരിക്കയിൽ കൂടി മെസി അർജന്റീനക്ക് വേണ്ടി ബൂട്ട് കെട്ടുമെന്ന് പ്രതീക്ഷിച്ചിരുന്നെങ്കിലും ആരാധകരെ ഒന്നടങ്കം കണ്ണീരിലാഴ്ത്തിയായിരുന്നു മെസിയുടെ വിരമിക്കൽ പ്രഖ്യാപനം.

2026 ഫിഫ ലോകകപ്പിൽ മെസിയുടെ മികവിൽ ഫൈനൽ വരെ മുന്നേറാൻ അർജന്റീനക്ക് സാധിച്ചിരുന്നു. എന്നാൽ കലാശപ്പോരാട്ടത്തിൽ സ്പെയ്നിനോട് പരാജയപ്പെട്ട് അർജന്റീനക്ക് കിരീടം നഷ്ടമാവുകയായിരുന്നു. ന്യൂയോർക്ക് ന്യൂ ജേഴ്സി സ്റ്റേഡിയത്തിൽ നടന്ന കലാശ പോരാട്ടത്തിൽ എതിരില്ലാത്ത ഒരു ഗോളിന് അർജന്റീനയെ വീഴ്ത്തിയാണ് സ്‌പെയ്ൻ ചാമ്പ്യന്മാരായത്.

ലോകകപ്പിൽ മിന്നും പ്രകടനം നടത്തി ആരാധകരുടെ ഹൃദയം കീഴടക്കിയാണ് മെസി മടങ്ങിയത്. എട്ട് ഗോളുകളും നാല് അസിസ്റ്റുകളും നേടിയാണ് മെസി തിളങ്ങിയത്. ലോകകപ്പ് ചരിത്രത്തിൽ 21 ഗോളുകളാണ് മെസി നേടിയത്. ലോകകപ്പ് ചരിത്രത്തിലെ എക്കാലത്തെയും മികച്ച രണ്ടാമത്തെ ഗോൾ വേട്ടക്കാരനും അർജന്റൈൻ ഇതിഹാസമാണ്.

Content Highlight: Cristian Romero set a huge record as a captain for Argentina football team