ഡി.എന്‍.എ പരിശോധനയ്ക്ക് തയ്യാറാണെന്ന് ബിനോയ് കോടിയേരി; തീരുമാനം കോടതി നിര്‍ദേശത്തെ തുടര്‍ന്ന്
Kerala
ഡി.എന്‍.എ പരിശോധനയ്ക്ക് തയ്യാറാണെന്ന് ബിനോയ് കോടിയേരി; തീരുമാനം കോടതി നിര്‍ദേശത്തെ തുടര്‍ന്ന്
ന്യൂസ് ഡെസ്‌ക്
Monday, 8th July 2019, 1:18 pm

 

മുംബൈ: ലൈംഗികമായി ആക്രമിച്ചെന്ന യുവതിയുടെ പരാതിയില്‍ ബിനോയ് കോടിയേരിക്ക് ഡി.എന്‍.എ പരിശോധന. പരിശോധനയ്ക്ക് തയ്യാറാണെന്ന് ബിനോയ് കോടിയേരി അറിയിച്ചു. പരിശോധനയ്ക്കായി രക്തസാമ്പിള്‍ നല്‍കണമെന്ന് മുംബൈ പൊലീസ് ബിനോയ് കോടിയേരിയോട് ആവശ്യപ്പെട്ടു.

അടുത്ത തിങ്കളാഴ്ച രക്തസാമ്പിള്‍ നല്‍കാനാണ് പൊലീസ് നിര്‍ദേശം.

കേസില്‍ ജാമ്യം നേടിയ ബിനോയ് ഇന്ന് മുംബൈ ഓഷിവാര പൊലീസ് സ്റ്റേഷനില്‍ ഹാജരായിരുന്നു. എല്ലാ തിങ്കളാഴ്ചയും അന്വേഷണ ഉദ്യോഗസ്ഥന് മുമ്പില്‍ ഹാജരാകണമെന്ന ജാമ്യ വ്യവസ്ഥയുടെ ഭാഗമായാണ് ബിനോയ് ഇന്ന് പൊലീസ് സ്റ്റേഷനില്‍ എത്തിയത്.

പൊലീസ് ആവശ്യപ്പെട്ടാല്‍ ഡി.എന്‍.എ പരിശോധനയ്ക്ക് തയ്യാറാകണമെന്നും മുന്‍കൂര്‍ ജാമ്യം അനുവദിച്ചുകൊണ്ടുള്ള ഉത്തരവില്‍ കോടതി നിര്‍ദേശിച്ചിരുന്നു.

നേരത്തെ ബിനോയ് കോടിയേരിയുടെ മുന്‍കൂര്‍ ജാമ്യ ഹരജി പരിഗണിക്കവേ അദ്ദേഹത്തിന്റെ അഭിഭാഷകന്‍ അശോക് ഗുപ്ത ഡി.എന്‍.എ പരിശോധയനെ എതിര്‍ത്തിരുന്നു. രേഖാമൂലം പൊലീസ് ആവശ്യപ്പെട്ടാല്‍ മാത്രമേ ഡി.എന്‍.എ പരിശോധനയുമായി സഹകരിക്കൂവെന്നും ഇക്കാര്യത്തില്‍ ബിനോയിയുടെ അഭിപ്രായം തേടേണ്ടതുണ്ടെന്നുമായിരുന്നു അദ്ദേഹം കോടതിയില്‍ പറഞ്ഞത്. എന്നാലിപ്പോള്‍ പൊലീസിനു മുമ്പില്‍ ബിനോയ് പരിശോധനയ്ക്ക് സമ്മതം അറിയിച്ചിരിക്കുകയാണ്.

ജൂണ്‍ 13 നാണ് ബിനോയ് കോടിയേരിക്കെതിരെ ബിഹാര്‍ സ്വദേശി മുംബൈ ഓഷിവാര സ്റ്റേഷനില്‍ പീഡന പരാതി നല്‍കിയത്. ദുബൈയില്‍ ഡാന്‍സ് ബാറില്‍ ജോലി ചെയ്തിരുന്ന യുവതിയാണ് ബിനോയിക്കെതിരെ ലൈംഗിക ചൂഷണ പരാതി നല്‍കിയത്. വിവാഹവാഗ്ദാനം നല്‍കി വര്‍ഷങ്ങളോളം ലൈംഗിക ചൂഷണം നടത്തിയെന്നും ഈ ബന്ധത്തില്‍ എട്ടുവയസ്സുള്ള കുട്ടിയുണ്ടെന്നും യുവതി ആരോപിച്ചിരുന്നു.

യുവതിയുടെ പരാതിയുടെ അടിസ്ഥാനത്തില്‍ ബിനോയിക്കെതിരെ ഐ.പി.സി 376, 376(2), 420, 504, 506 തുടങ്ങിയ വകുപ്പുകളാണ് ചുമത്തിയിട്ടുള്ളത്.

അഞ്ച് കോടി രൂപ നഷ്ടപരിഹാരം ആവശ്യപ്പെട്ട് അയച്ച വക്കീല്‍ നോട്ടീസില്‍ ബിനോയ് തന്നെ കല്യാണം കഴിച്ചതാണെന്ന് യുവതി പറഞ്ഞിരുന്നു. എന്നാല്‍ പൊലീസില്‍ നല്‍കിയ പരാതിയില്‍ വിവാഹ വാഗ്ദാനം നല്‍കി പീഡിപ്പിച്ചെന്നാണുള്ളത്.

എന്നാല്‍ തനിക്കെതിരെ യുവതി നല്‍കിയ പരാതിയില്‍ കഴമ്പില്ലെന്നാണ് ഒളിവില്‍ പോകുന്നതിനു മുമ്പ് ബിനോയ് കോടിയേരി മാധ്യമങ്ങളോട് പറഞ്ഞത്. തന്നെ ബ്ലാക്ക്മെയില്‍ ചെയ്യാനുള്ള ശ്രമമാണ് കേസെന്നും ബിനോയ് പറഞ്ഞിരുന്നു. തന്റെ പക്കല്‍നിന്ന് അഞ്ചുകോടി ആവശ്യപ്പെട്ട് കത്തയച്ചതിന് പരാതിക്കാരിയായ യുവതിക്കെതിരേ കേസെടുക്കണമെന്നാവശ്യപ്പെട്ട് താന്‍ പരാതി നല്‍കിയിട്ടുണ്ടെന്നും ബിനോയ് കോടിയേരി പറഞ്ഞിരുന്നു.