2010ല് വിനീത് ശ്രീനിവാസന്റെ മലര്വാടി ആര്ട്സ് ക്ലബ്ബ് എന്ന ചിത്രത്തിലൂടെ സിനിമാ കരിയര് ആരംഭിച്ച നടനാണ് അജു വര്ഗീസ്. തുടക്കത്തില് കോമഡി വേഷങ്ങളില് തിളങ്ങിയ അജുവിന്റ കരിയറില് വഴിത്തിരിവായത് ഹെലന് എന്ന ചിത്രമായിരുന്നു.
കമല എന്ന സിനിമയിലൂടെ നായകവേഷവും തനിക്കിണങ്ങുമെന്ന് അജു തെളിയിച്ചിരുന്നു. കഴിഞ്ഞ 15 വര്ഷത്തിനിടയില് 145ല് അധികം സിനിമകളിലാണ് അജു വര്ഗീസ് അഭിനയിച്ചിട്ടുള്ളത്. സിനിമകള്ക്ക് പുറമെ വെബ് സീരീസുകളിലും നടന് തന്റെ കഴിവ് തെളിയിച്ചിട്ടുണ്ട്.
താന് നടി ഉര്വശി ‘അയ്യോ’ എന്ന് പറയുന്ന രീതി ഒരു റെഫറന്സായി എടുത്തിട്ടുണ്ടെന്ന് പറയുകയാണ് അജു വര്ഗീസ്. ആ റെഫറന്സ് ഉര്വശിയില് നിന്ന് വേറെയും അഭിനേതാക്കള് എടുത്തിട്ടുണ്ടെന്നും എന്നാല് താന് അവരുടെ പേര് പറയുന്നില്ലെന്നും അജു പറഞ്ഞു. ട്രൂകോപ്പി തിങ്കില് സംസാരിക്കുകയായിരുന്നു നടന്.
‘ഏതോ ഒരു പടത്തില് ഞാന് ഉര്വശി ചേച്ചിയുടെ ചില കാര്യങ്ങള് റെഫറന്സാക്കിയിരുന്നു. അഭിനയമല്ല ഞാന് ഉദ്ദേശിച്ചത്. ‘അയ്യോ’ എന്ന് പറയുന്ന രീതി ഞാന് എടുത്തതാണ്. എനിക്ക് തോന്നുന്നത് ആ റെഫറന്സ് ഉര്വശി ചേച്ചിയില് നിന്ന് വേറെയും ആക്ടേഴ്സ് എടുത്തിട്ടുണ്ട് എന്നാണ് (ചിരി).
അത് ആരാണെന്ന് ഞാന് പേര് പറയുന്നില്ല. സീനിയര് ആക്ടേഴ്സ് പോലും എടുത്തിട്ടുണ്ട് എന്നതാണ് സത്യം. മലയാള സിനിമയില് ആദ്യമായിട്ട് അത്രയും ഇന്നസെന്റായി ‘അയ്യോ’ എന്ന് പറയുന്നത് കൊണ്ടുവന്നത് ഉര്വശി ചേച്ചിയാണ്,’ അജു വര്ഗീസ് പറയുന്നു.
കുഞ്ഞിരാമായണം എന്ന സിനിമയിലെ തന്റെ കുട്ടന് എന്ന കഥാപാത്രത്തിനായി താന് നിവിന് പോളി നായകനായ 1983 എന്ന സിനിമയില് നിന്ന് ഒരു റെഫറന്സ് എടുത്തിട്ടുണ്ടെന്നും നടന് അഭിമുഖത്തില് പറഞ്ഞു. ചിത്രത്തിലെ സഞ്ജു ശിവറാമിന്റെ തയ്യല്ക്കാരന് കഥാപാത്രത്തെ റെഫറന്സ് ആക്കിയെന്നാണ് അജു പറയുന്നത്.
Content Highlight: Aju Varghese Talks About Urvashi
