അയര്ലാന്ഡ് ടി-20 പരമ്പരക്കുള്ള ഇന്ത്യന് ടീമില് പഞ്ചാബ് കിങ്സ് യുവതാരം സൂര്യാന്ഷ് ഷെഡ്ജെ ഇടം നേടിയിരുന്നു. പരിക്കേറ്റ ഓള് റൗണ്ടര് നിതീഷ് കുമാര് റെഡ്ഡിക്ക് പകരക്കാരനായാണ് സൂര്യാന്ഷ് ഷെഡ്ജെ ടീമില് ഇടം നേടിയത്. ആദ്യമായാണ് ഷെഡ്ജെ ഇന്ത്യന് സീനിയര് ടീമില് കളിക്കാനൊരുങ്ങുന്നത്.
ഇപ്പോള് താരത്തെ ടീമില് ഉള്പ്പെടുത്തിയതിനെക്കുറിച്ച് സംസാരിക്കുകയാണ് മുന് ഇന്ത്യന് താരം ആകാശ് ചോപ്ര. ഐ.പി.എല്ലില് പഞ്ചാബ് കിങ്സിന് വേണ്ടി മികച്ച പ്രകടനം നടത്തിയ താരമാണ് ഷെഡ്ജെയെന്നും ഇന്ത്യന് ടീമില് അവസരം നല്കണമെന്നുമാണ് ചോപ്ര അഭിപ്രായപ്പെട്ടത്. തന്റെ യുട്യൂബ് ചാനലിലൂടെ സംസാരിക്കുകയായിരുന്നു മുന് ഇന്ത്യന് താരം.
‘സൂര്യാന്ഷ് ഷെഡ്ജെ ഇന്ത്യന് ടീമില് തെരഞ്ഞെടുത്തിട്ടുണ്ട്, അവന് മുംബൈയില് നിന്നാണ് വരുന്നത്. മുംബൈക്ക് വേണ്ടി അവന് മികച്ച പ്രകടനം നടത്തി. പിന്നീട് പഞ്ചാബ് കിങ്സിന് വേണ്ടി മികച്ച പ്രകടനം നടത്തി. ഇപ്പോള് സൂര്യാന്ഷ് ഷെഡ്ജെ ഇന്ത്യന് എ ടീമിന്റെ ഭാഗവുമായി. അവന് നേടിയ റണ്സ് നോക്കിയാല് മികച്ച താരമാണെന്ന് മനസിലാവും. അവന് ടീമില് അവസരം ലഭിക്കണം,’ ആകാശ് ചോപ്ര പറഞ്ഞു.
അടുത്തിടെ ശ്രീലങ്കയില് നടന്ന ത്രിരാഷ്ട്ര പരമ്പരയില് ഇന്ത്യ എ ടീമിന് വേണ്ടി നടത്തിയ മികവുറ്റ പ്രകടനമാണ് താരത്തെ ഇന്ത്യന് ടീമിലെത്തിച്ചത്. ടൂര്ണമെന്റില് അഞ്ച് മത്സരങ്ങളില് നിന്നും 147 റണ്സാണ് താരം അടിച്ചെടുത്തത്.
2026 ഐ.പി.എല്ലില് പഞ്ചാബ് കിങ്സിന് വേണ്ടിയും മികച്ച പ്രകടനം നടത്താന് ഷെഡ്ജെക്ക് സാധിച്ചു. ഏഴ് മത്സരങ്ങളില് നിന്നും 158 റണ്സാണ് താരം പഞ്ചാബിനായി നേടിയത്. ഫിനിഷിങ് റോളില് മിന്നി തിളങ്ങാനുള്ള കഴിവാണ് ഷെഡ്ജെയെ വ്യത്യസ്തനാക്കുന്നത്.
