![?php echo $post['title']; ?>](https://assets.doolnews.com/w/900x473/2017/12/fake-baba.jpg)
ന്യൂദല്‍ഹി: രാജ്യത്തെ വ്യാജ സന്യാസിമാരുടെ രണ്ടാമത്തെ പട്ടികയുമായി അഖില ഭാരതീയ അഖാഡാ പരിഷത്ത്. സെപ്റ്റംബറില്‍ പുറത്തിറക്കിയ ആദ്യപട്ടികയില്‍ 14 പേരാണ് ഉള്‍പ്പെട്ടിരുന്നതെങ്കില്‍ കഴിഞ്ഞദിവസം പുറത്തിറക്കിയ പുതിയ പട്ടികയില്‍ 17 പേരുടെ പേരുകളാണ് ഉള്ളത്. ഇന്ത്യയിലെ സന്യാസിമാരുടെ ഉന്നതാധികാര സഭയാണ് അഖില ഭാരതീയ അഖാഡാ പരിഷത്ത്.
ബലാത്സംഗക്കേസില്‍ ജയില്‍ ശിക്ഷയനുഭവിക്കുന്ന ഗുര്‍മീത് റാം റഹീം സിങ്, ആശാറാം ബാപ്പു, രാധേ മാ തുടങ്ങിയ 14 പേരായിരുന്നു ആദ്യ പട്ടികയില്‍ ഉള്‍പ്പെട്ടിരുന്നത്. വീരേന്ദ്ര ദേവ് ദീക്ഷിത് (ദല്‍ഹി), സച്ചിദാനന്ദ് സരസ്വതി (ബസ്തി, യു.പി), ത്രികാല്‍ ഭവന്ത് (അലഹാബാദ് ) എന്നിവരെയാണ് അഖാഡാ പരിഷത്ത രണ്ടാമത്തെ പട്ടികയിലുള്‍പ്പെടുത്തിയിരിക്കുന്നത്.
കഴിഞ്ഞയാഴ്ച വീരേന്ദ്ര ദീക്ഷിത്തിന്റെ ഉത്തര്‍പ്രദേശിലേയും ദല്‍ഹിയിലേയും ആശ്രമത്തില്‍ നിന്നും 47 സ്ത്രീകളേയും മൂന്ന് പെണ്‍കുട്ടികളേയും പൊലീസ് രക്ഷപ്പെടുത്തിയിരുന്നു. ഇതിനു പിന്നാലെയാണ് ദീക്ഷിതിനെയും പട്ടികയില്‍ ഉള്‍പ്പെടുത്തിയിരിക്കുന്നത്.
ദീക്ഷിതിന്റെ ആശ്രമത്തില്‍ മൂന്നു കേന്ദ്രങ്ങളിലായാണ് ഇവരെ തടങ്കലില്‍ പാര്‍പ്പിച്ചിരുന്നത്. ജയിലിനു സമാനമായ രീതിയിലാണ് സ്ത്രീകളെയും കുട്ടികളെയും പാര്‍പ്പിച്ചിരുന്നതെന്ന് ദല്‍ഹി വനിതാ കമ്മീഷന്‍ അധ്യക്ഷ സ്വാതി മലിവാല്‍ നേരത്തെ പറഞ്ഞിരുന്നു.
വീരേന്ദ്ര ദേവ് ദീക്ഷിത്, സച്ചിദാനന്ദ് സരസ്വതി, ത്രികാല്‍ ഭവന്ത്, ആശാറാം ബാപ്പു, രാധേ മാ, സച്ചിദാന്ദ് ഗിരി, ഗുര്‍മീത് റാം റഹീം സിങ്, സ്വാമി ഒംജി, നിര്‍മല്‍ ബാബ, ഇച്ഛാദാരി ഭീമാനന്ദ്, സ്വാമി അസീമാനന്ദ്, നാരയന്‍ സായി, രാംപാല്‍, ആചാര്യ കുഷ്മുനി, ബൃഹസ്പതി ഗിരി, ഓം നമശിവായ ബാബ, മല്‍ഖന്‍ സിങ് എന്നിവരാണ് പരിഷത്ത് തയ്യാറാക്കിയ വ്യാജ സന്യാസിമാരുടെ പട്ടികയില്‍ ഉള്ളത്.
