ശ്രീലങ്കയ്ക്കെതിരായ ടെസ്റ്റ് പരമ്പരയ്ക്കുള്ള തയ്യാറെടുപ്പിലാണ് ഇന്ത്യ. പരമ്പരയ്ക്ക് മുന്നോടിയായി ഇന്ത്യന് ക്യാപ്റ്റന് ശുഭ്മന് ഗില് തങ്ങളുടെ ലക്ഷ്യത്തെക്കുറിച്ച് സംസാരിച്ചിരുന്നു. ക്യാപ്റ്റന് എന്ന നിലയില് താന് പൂര്ണമായ ആത്മവിശ്വാസത്തിലാണെന്നും ലോക ടെസ്റ്റ് ചാമ്പ്യന്ഷിപ്പ് ഫൈനലിലേക്ക് എത്തുകയാണ് തങ്ങളുടെ ലക്ഷ്യമെന്നും അദ്ദേഹം പറഞ്ഞു. പി.ടി.ഐയോട് സംസാരിക്കുകയായിരുന്നു അദ്ദേഹം.
‘ഇപ്പോള് ക്യാപ്റ്റന് എന്ന നിലയിലുള്ള എന്റെ ചുമതലയില് ഞാന് പൂര്ണമായും ആത്മവിശ്വാസത്തിലാണ്. ലോക ടെസ്റ്റ് ചാമ്പ്യന്ഷിപ്പ് ഫൈനലിലേക്ക് എത്താന് സജീവമായി തുടരുകയാണ് ഞങ്ങളുടെ ലക്ഷ്യം. അതിനായി ഞങ്ങള്ക്ക് ആറ് അല്ലെങ്കില് ഏഴ് ടെസ്റ്റുകളില് വിജയിക്കേണ്ടതുണ്ട്. അതുകൊണ്ട് തന്നെ ഇവിടെ നിന്ന് അതിന് തുടക്കം കുറിക്കാനാണ് ഞങ്ങള് ആഗ്രഹിക്കുന്നത്,’ ശുഭ്മന് ഗില് പി.ടി.ഐയോട് പറഞ്ഞു.
All in readiness in Galle for the #SLvIND Test Series 🏆
പരമ്പരയിലെ ആദ്യ മത്സരം ഓഗസ്റ്റ് 15 മുതല് 19 വരെ ഗല്ലെയിലാണ് നടക്കുന്നത്. രണ്ടാം മത്സരം ഓഗസ്റ്റ് 23 മുതല് 27 വരെ കൊളംബോയിലും നടക്കും. പരമ്പരയ്ക്ക് മുന്നോടിയായി ഇരു ടീമുകളും സ്ക്വാഡ് പുറത്ത് വിട്ടിരുന്നു.
സൂപ്പര് താരം ജസ്പ്രീത് ബുംറയും ബാറ്റര് സായി സുദര്ശനുമില്ലാതെയാണ് ഇന്ത്യ കളത്തിലിറങ്ങുന്നത്. പരിക്ക് കാരണമാണ് താരങ്ങള് പരമ്പരയില് നിന്ന് പുറത്തായത്. അതേസമയം ശ്രീലങ്കയും സൂപ്പര് താരങ്ങളായ പാത്തും നിസങ്കയും കുശാല് മെന്ഡിസും ഇല്ലാതെയാണ് കളത്തിലിറങ്ങുന്നത്.
