ഇന്ത്യയും അയര്‍ലാന്‍ഡും തമ്മിലുള്ള ടി – 20 പരമ്പരയ്ക്ക് ഇനി ദിവസങ്ങളുടെ കാത്തിരിപ്പ് മാത്രമാണുള്ളത്. പുതിയ ക്യാപ്റ്റന്‍ ശ്രേയസ് അയ്യരുടെ കീഴില്‍ ഇന്ത്യ കളിക്കുന്ന ആദ്യ ടി – 20 പരമ്പരയാണിത്.

പരമ്പരയില്‍ രണ്ട് ടി -20 മത്സരങ്ങളാണ് ഷെഡ്യൂള്‍ ചെയ്തിരിക്കുന്നത്. ജൂണ്‍ 26ന് ആദ്യ ടി – 20 മത്സരത്തിനും 28ന് രണ്ടാം മത്സരത്തിലുമാണ് ഇന്ത്യ കളത്തിലിറങ്ങുക.

ടി – 20 ലോകകപ്പില്‍ പ്ലെയര്‍ ഓഫ് ദി ടൂര്‍ണമെന്റായതിന് ശേഷം മലയാളി താരം സഞ്ജു സാംസണ്‍ ഇറങ്ങുന്ന ആദ്യ പരമ്പരയാണ് എന്ന പ്രത്യേകതയുമുണ്ട് ഇതിന്. ഈ പരമ്പരയില്‍ കളത്തിലിറങ്ങുമ്പോള്‍ വിക്കറ്റ് കീപ്പര്ക്ക് ഒരു നാഴികക്കല്ല് പിന്നിടാനുള്ള അവസരമുണ്ട്.

അന്താരാഷ്ട്ര ടി -20യില്‍ 1500 റണ്‍സെന്ന മൈല്‍സ്റ്റോണ്‍ സ്വന്തമാക്കാനുള്ള അവസരമാണ് സഞ്ജുവിന് മുന്നിലുള്ളത്. ഈ നേട്ടത്തിലെത്താന്‍ താരത്തിന് വേണ്ടത് 101 റണ്‍സ് മാത്രമാണ്.

കുട്ടി ക്രിക്കറ്റില്‍ ഇന്ത്യന്‍ ജേഴ്‌സിയില്‍ ഇതുവരെ സഞ്ജുവിന് 1399 റണ്‍സുണ്ട്. 62 ടി -20 മത്സരങ്ങളില്‍ കളിക്കാന്‍ താരം ഇത്രയും റണ്‍സ് തന്റെ അക്കൗണ്ടിലെത്തിച്ചത്. മൂന്ന് സെഞ്ച്വറിയും ആറ് അര്‍ധ സെഞ്ച്വറിയും മലയാളി താരം കുട്ടി ക്രിക്കറ്റില്‍ നേടിയിട്ടുണ്ട്.

ഇന്ത്യക്ക് വേണ്ടി ടി -20യില്‍ 1500 റണ്‍സ് പിന്നിട്ടത് എട്ട് താരങ്ങള്‍ മാത്രമാണ്. വിരാട് കോഹ്ലി, രോഹിത് ശര്‍മ, സൂര്യകുമാര്‍ യാദവ്, ഹര്‍ദിക് പാണ്ഡ്യ, കെ.എല്‍. രാഹുല്‍, ശിഖര്‍ ധവാന്‍, എം.എസ് ധോണി, സുരേഷ് റെയ്‌ന എന്നിവരാണ് ഇതുവരെ ഈ നാഴികക്കല്ലിലെത്തിയവര്‍.

ടി – 20 ലോകകപ്പിലും അത് കഴിഞ്ഞെത്തിയ ഐ.പി.എല്ലിലും നടത്തിയ മിന്നും പ്രകടനം ഈ പരമ്പരയിലും ആവര്‍ത്തിച്ചാല്‍ ഈ നേട്ടം സഞ്ജുവിന് അനായാസം സ്വന്തമാക്കാന്‍ സാധിക്കും. താരം തിളങ്ങുമോയെന്ന് കാത്തിരുന്ന് തന്നെ കാണേണ്ടി വരും.

Content Highlight: Sanju Samson to join the Indian players with 1500 T20I runs