ഇന്ത്യ-ഇംഗ്ലണ്ട് അഞ്ച് ടി-20 മത്സരങ്ങളുടെ പരമ്പരയിലെ നാലാം മത്സരം ഇന്നാണ് നടക്കുന്നത്. ഈ മത്സരത്തില്‍ ഇന്ത്യ വിജയം മാത്രം ലക്ഷ്യം വെച്ചായിരിക്കും കളത്തിലിറങ്ങുക. നിലവില്‍ പരമ്പരയിലെ മൂന്ന് മത്സരങ്ങള്‍ പിന്നിട്ടപ്പോള്‍ ഇംഗ്ലണ്ട് 2 – 0ന് മുന്നിലാണ്. ആദ്യ മത്സരം മഴമൂലം ഉപേക്ഷിക്കപ്പെട്ടിരുന്നു.

ഈ മത്സരത്തില്‍ മലയാളി താരം സഞ്ജു സാംസണിന് പ്ലെയിങ് ഇലവനില്‍ തിരിച്ചെത്താന്‍ സാധിക്കുമോയെന്നാണ് ആരാധകര്‍ ഉറ്റുനോക്കുന്നത്. രണ്ടാം ടി-20യില്‍ സഞ്ജു സാംസണിനെ ഒഴിവാക്കി യുവതാരം വൈഭവ് സൂര്യവംശി ഇന്ത്യക്കായി അരങ്ങേറിയിരുന്നു.

ഇപ്പോള്‍ മത്സരത്തിന് മുന്നോടിയായി സഞ്ജുവിനെ ടീമില്‍ നിന്നും ഒഴിവാക്കിയ തീരുമാനത്തെക്കുറിച്ച് സംസാരിക്കുകയാണ് ഇന്ത്യന്‍ ഇതിഹാസം ആര്‍. അശ്വിന്‍. രണ്ട് മത്സരങ്ങള്‍ ഇന്ത്യ പരാജയപ്പെട്ടതിന് ശേഷവും ഒരാളെ പുറത്തിരുത്തണമെന്ന ചിന്ത ശരിയല്ലെന്നാണ് അശ്വിന്‍ പറഞ്ഞത്. ഇത്തരത്തിലുള്ള തീരുമാനങ്ങള്‍ താരങ്ങളുടെ ആത്മവിശ്വാസത്തെ ബാധിക്കുമെന്നും അശ്വിന്‍ വ്യക്തമാക്കി. തന്റെ യുട്യൂബ് ചാനലിലൂടെ സംസാരിക്കുകയായിരുന്നു മുന്‍ ഇന്ത്യന്‍ താരം.

‘സഞ്ജു സാംസണിന്റെ ഫോം മോശമായതിനാലും ടീം രണ്ട് മത്സരം പരാജയപ്പെട്ടതുകൊണ്ടും അവനെ പുറത്തിരുത്തി. എന്നാല്‍ രണ്ട് തോല്‍വികള്‍ക്ക് ശേഷവും ഒരാളെ പുറത്തിരുത്തണമെന്ന ചിന്ത ശരിയല്ല. അടുത്തതായി ആരെയാവും പുറത്താക്കുകയെന്ന ആശങ്ക എല്ലാവര്‍ക്കുമുണ്ടാവും. ഇത് നല്ല സമീപനമല്ല. ഇന്ത്യ ഈ സാഹചര്യം ശരിയായ രീതിയില്‍ കൈകാര്യം ചെയ്യുമെന്ന് ഞാന്‍ പ്രതീക്ഷിക്കുന്നു.

സ്‌കൈയുടെ സംഭവത്തിന് ശേഷം ഞാന്‍ ഇതേ കാര്യം പറഞ്ഞിട്ടുണ്ട്. ഇത്തരത്തിലുള്ള തീരുമാനങ്ങള്‍ താരങ്ങളുടെ ആത്മവിശ്വാസത്തെ ബാധിക്കും. റണ്‍സ് നേടിയില്ലെങ്കില്‍ ടീമില്‍ നിന്നും പുറത്താവുമോയെന്ന ഭയം താരങ്ങള്‍ക്ക് തോന്നിയാല്‍ അവര്‍ സ്വാഭാവികമായി കളിക്കാതെ സ്വന്തം സ്ഥാനം സംരക്ഷിക്കാനാവും ശ്രദ്ധിക്കുക. ടി-20യില്‍ ഇത് ടീമിന് വളരെ ദോഷകരമാണ്,’ അശ്വിന്‍ പറഞ്ഞു.

അതേസമയം സിംബാബ്‌വേക്കെതിരെയുള്ള മൂന്ന് ടി-20 മത്സരങ്ങളുടെ പരമ്പരക്കുള്ള ഇന്ത്യന്‍ ടീമില്‍ ഇടം നേടാന്‍ സഞ്ജുവിന് സാധിച്ചില്ല. 2026 ടി-20 ലോകകപ്പില്‍ മികച്ച പ്രകടനം നടത്തിയിട്ടും സഞ്ജുവിനെ ഇന്ത്യ ഈ പരമ്പരയില്‍ ഉള്‍പ്പെടുത്താതെ പോവുകയായിരുന്നു.

2026 ഐ.സി.സി ടി-20 വേള്‍ഡ് കപ്പില്‍ മിന്നും പ്രകടനമായിരുന്നു സഞ്ജു നടത്തിയിരുന്നത്. ലോകകപ്പിലെ ആദ്യ മത്സരങ്ങളില്‍ പുറത്തിരുന്ന സഞ്ജു, നിര്‍ണായക ഘട്ടത്തില്‍ ടീമിലെത്തിയപ്പോള്‍ തന്റെ കഴിവ് തെളിയിക്കുകയായിരുന്നു. ലോകകപ്പിന് ശേഷം നടന്ന ഐ.പി.എല്ലിലും സഞ്ജു മികച്ച പ്രകടനമാണ് കാഴ്ചവെച്ചത്.

Content Highlight: R. Ashwin talks about Sanju Samson