താനൊരു ക്യാന്സര് സര്വൈവര് ആണെന്ന് പറയുകയാണ് നടനും നിര്മാതാവുമായ മണിയന്പിള്ള രാജു. കഴിഞ്ഞ വര്ഷം സെപ്റ്റംബര്- ഒക്ടോബര് ഒക്കെ ആയപ്പോള് ഹോസ്പിറ്റലില് നിന്നിറങ്ങിയെന്നും തൊണ്ടയിലായിരുന്നു തനിക്ക് ക്യാന്സര് എന്നും മണിയന്പിള്ള രാജു പറയുന്നു.
30 റേഡിയേഷനും അഞ്ച് കീമോയും കഴിഞ്ഞുവെന്നും ഇപ്പോള് താന് പൂര്ണ ആരോഗ്യവാനാണെന്നും അദ്ദേഹം പറഞ്ഞു. അസുഖം കാരണം കുറച്ച് സിനിമകള് തനിക്ക് ചെയ്യാന് കഴിഞ്ഞില്ലെന്നും എന്നാല് ഇനിമുതല് സിനിമകള് ചെയ്യാന് തുടങ്ങണമെന്നും മണിയാപിള്ള രാജു കൂട്ടിച്ചേര്ത്തു. കൗമുദി മൂവീസിന് നല്കിയ അഭിമുഖത്തില് സംസാരിക്കുകയായിരുന്നു അദ്ദേഹം.
‘ഇപ്പോള് എന്റെ ആരോഗ്യമെല്ലാം ഓക്കേ ആയി. കഴിഞ്ഞ വര്ഷം സെപ്റ്റംബര്- ഒക്ടോബര് ഒക്കെ ആയപ്പോള് ഹോസ്പിറ്റലില് നിന്ന് ഇറങ്ങി. ക്യാന്സര് ആയിരുന്നു. ഞാന് ഒരു ക്യാന്സര് സര്വൈവര് ആണെന്ന് പറയാം. എനിക്ക് തൊണ്ടയില് ആയിരുന്നു ക്യാന്സര്. 30 റേഡിയേഷനും അഞ്ച് കീമോയും കഴിഞ്ഞു. കുറച്ച് ബുദ്ധിമുട്ടുകളൊക്കെ ഉണ്ടായിരുന്നു. അത് കഴിഞ്ഞപ്പോള് ഞാന് ഓക്കേ ആയി. ഫിറ്റായി.
അതുകാരണം എനിക്ക് രണ്ടുമൂന്ന് സിനിമകള് ചെയ്യാന് കഴിഞ്ഞില്ല. ഇനി സിനിമകള് ചെയ്യാന് തുടങ്ങണം. ഞാന് ഇപ്പോള് പൂര്ണ ആരോഗ്യവാനാണ്. ചിലര് പറയും ഇതൊക്കെ വന്നാല് പുറത്ത് പറയരുതെന്ന്. പക്ഷെ ഒരു അസുഖം വന്നാല് പറയേണ്ടേ. എന്തുകൊണ്ട് ക്ഷീണിച്ചു എന്നുള്ളതൊക്കെ പറയേണ്ടേ. എനിക്ക് 82 കിലോ ഉണ്ടായിരുന്നു. അസുഖം മാറിയപ്പോള് പതിനാറ് കിലോയോളം കുറഞ്ഞു. ഇപ്പോള് 69 ഉണ്ട്. അത് ഇനിയൊരു 72 ആകണം. എന്റെ ഉയരത്തിന് ആവശ്യമുള്ള വെയ്റ്റ് ആണത്,’ മണിയന് പിള്ള രാജു പറയുന്നു.
മലയാളി പ്രേക്ഷകരുടെ പ്രിയ നടനാണ് മണിയന്പിള്ള രാജു. ബാലചന്ദ്രമേനോന് സംവിധാനം ചെയ്ത മണിയന്പിള്ള അഥവാ മണിയന്പിള്ളയാണ് അദ്ദേഹം ആദ്യമായി നായകനായി അഭിനയിച്ച ചിത്രം. 400ലധികം സിനിമകളില് മണിയന്പിള്ള രാജു അഭിനയിച്ചിട്ടുണ്ട്.
Content Highlight: Maniyanpilla Raju Talks About His Health Condition
