ബാലതാരമായി സിനിമയിലേക്കെത്തിയ നടനാണ് കമല്‍ ഹാസന്‍. ഇന്നും സിനിമാ ലോകത്തേ തന്റെ അഭിനയശൈലികൊണ്ട് ഞെട്ടിക്കുന്ന നടനാണ് അദ്ദേഹം. തമിഴ് സിനിമയിലൂടെയാണ് അരങ്ങേറിയതെങ്കിലും കമല്‍ ഹാസന്‍ എന്ന നടനെ ആദ്യമായി നായകനായി അവതരിപ്പിച്ചത് മലയാളം ഇന്‍ഡസ്ട്രിയായിരുന്നു. അഭിനയത്തിന് പുറമെ സംവിധാനം, തിരക്കഥ, നിര്‍മാണം, ഗാനരചന, ഗായകന്‍, മേക്കപ്പ് ആര്‍ട്ടിസ്റ്റ്, കൊറിയോഗ്രാഫര്‍ തുടങ്ങി സകലമേഖലയിലും കമല്‍ ഹാസന്‍ തന്റെ കയ്യൊപ്പ് ചാര്‍ത്തിയിട്ടുണ്ട്.

മണിരത്നത്തിന്റെ സംവിധാനത്തില്‍ പുറത്തിറങ്ങാന്‍ പോകുന്ന ഏറ്റവും പുതിയ സിനിമയാണ് തഗ് ലൈഫ്. കമല്‍ഹാസന് പുറമെ തൃഷ, ചിമ്പു, അശോക് സെല്‍വന്‍, ജോജു ജോര്‍ജ്, അഭിരാമി തുടങ്ങിയവരും ചിത്രത്തില്‍ പ്രധാനവേഷത്തില്‍ എത്തുന്നുണ്ട്. തഗ് ലൈഫിന്റെ പ്രൊമോഷനുമായി ബന്ധപ്പെട്ട അഭിമുഖത്തില്‍ മലയാള സിനിമയെ കുറിച്ച് സംസാരിക്കുകയാണ് ഇപ്പോള്‍ കമല്‍ഹാസന്‍.

മലയാളികള്‍ നല്ല സിനിമയെ പിന്തുണക്കുന്നവരാണെന്നും കേരളം നല്ല സിനിമകളെ പിന്തുണക്കുമെന്ന് രാജ്യത്തിന് മുഴുവന്‍ അറിയാമെന്നും കമല്‍ഹാസന്‍ പറയുന്നു. ബംഗാളി സിനിമയുടെ കയ്യില്‍ നിന്ന് റൗണ്ട് ട്രോഫി പറിച്ചെടുത്തത് കേരളമാണെന്നും അതൊരു റോളിങ് ട്രോഫിയാണെന്നും അദ്ദേഹം പറഞ്ഞു. തമിഴ് സിനിമയും ആ ട്രോഫിയിലേക്കാണ് ഉറ്റുനോക്കുന്നതെന്നും വേഗം കിട്ടട്ടെ എന്ന് താന്‍ ആഗ്രഹിക്കുന്നുവെന്നും കമല്‍ഹാസന്‍ കൂട്ടിച്ചേര്‍ത്തു. താന്‍ പ്രാര്‍ത്ഥിക്കാറില്ലെന്നും ആഗ്രഹിക്കുകയാണ് ചെയ്യാറുള്ളതെന്നും അദ്ദേഹം പറഞ്ഞു.

‘നിങ്ങള്‍ നല്ല സിനിമയെ പിന്തുണക്കും. കേരളം നല്ല സിനിമയെ പിന്തുണക്കുമെന്ന് രാജ്യം മുഴുവന്‍ അറിയാം. ബംഗാളി സിനിമയുടെ കൈയ്യില്‍ നിന്ന് ആ റൗണ്ട് ട്രോഫി പറിച്ചെടുത്തത് കേരളമാണ്. അതൊരു റോളിങ് ട്രോഫിയാണ്. തമിഴ്‌നാടും ആ ട്രോഫിയിലേക്ക് തന്നെയാണ് ഉറ്റു നോക്കി കൊണ്ടിരിക്കുന്നത്. വേഗം കിട്ടട്ടെ. ഞാന്‍ പ്രാര്‍ത്ഥിക്കാറില്ല. ഞാന്‍ ആഗ്രഹിക്കാറുണ്ട്. കലയിലെ എല്ലാ തരത്തിലുള്ള അതിര്‍വരമ്പുകളും കലയിലൂടെ അപ്രത്യക്ഷമാകണമെന്നാണ് ഞാന്‍ ആഗ്രഹിക്കുന്നത്,’ കമല്‍ഹാസന്‍ പറയുന്നു.

Content Highlight: Kamal Haasan talking about Malayalam cinema.