റോണോയുടെ ആയിരാമത് ഗോളിന് വഴിയൊരുക്കണം, ചരിത്രത്തില്‍ അടയാളപ്പെടുത്താന്‍ പോകുന്ന ഗോളാകും അത്: ജാവോ ഫെലിക്‌സ്

ഇതിഹാസ താരം ക്രിസ്റ്റ്യാനോ റൊണാള്‍ഡോയുടെ 1000ാം ഗോളിന് അസിസ്റ്റ് നല്‍കുകയാണ് തന്റെ ലക്ഷ്യമെന്ന് അദ്ദേഹത്തിന്റെ സഹതാരവും പോര്‍ച്ചുഗീസ് മുന്നേറ്റ താരവുമായ ജാവോ ഫെലിക്‌സ്. പോര്‍ച്ചുഗല്‍ ദേശീയ ടീമിന് പുറമെ ക്ലബ്ബ് തലത്തില്‍ അല്‍ നസറിലും ഫെലിക്‌സ് റൊണാള്‍ഡോയ്‌ക്കൊപ്പമാണ് പന്ത് തട്ടുന്നത്.

ചരിത്രത്തില്‍ രേഖപ്പെടുത്താന്‍ പോകുന്ന ഗോളായിരിക്കും അതെന്നും അതിന് വേണ്ടി എന്തും ചെയ്യുമെന്നും ഫെലിക്‌സ് പറഞ്ഞു.

എ.എസിന് നല്‍കിയ അഭിമുഖത്തില്‍ സംസാരിക്കുകയായിരുന്നു അദ്ദേഹം.

‘ക്രിസ്റ്റ്യാനോയുടെ 1,000-ാം ഗോളിന് അസിസ്റ്റ് നല്‍കാന്‍ ഞാന്‍ ആഗ്രഹിക്കുന്നു. ഈ നേട്ടത്തിന് ഒരു ഗോള്‍ മാത്രം അകലെ നില്‍ക്കെ, അദ്ദേഹത്തിനെ സജ്ജമാക്കാന്‍ ഞാന്‍ എല്ലാ അവസരങ്ങളും ഉപയോഗിക്കും. ആ ഗോള്‍ ഫുട്‌ബോള്‍ ചരിത്രത്തില്‍ ഇടം നേടും,’ ഫെലിക്‌സ് പറഞ്ഞു.

41-ാം വയസിലും മികച്ച ഫോമിലുള്ള റൊണാള്‍ഡോ നിലവില്‍ 979 കരിയര്‍ ഗോളുകള്‍ നേടിയിട്ടുണ്ട്. ചരിത്രപരമായ 1,000 ഗോളുകള്‍ എന്ന നാഴികക്കല്ലിലെത്താന്‍ ഇനി 21 ഗോളുകള്‍ കൂടി മാത്രം മതി.

ഈ സീസണില്‍ അല്‍ നസറിനായി കളിച്ച ഏഴ് മത്സരങ്ങളില്‍ നിന്ന് മൂന്ന് ഗോളുകള്‍ റൊണാള്‍ഡോ നേടിയിട്ടുണ്ട്.

2025 സമ്മറില്‍ അല്‍ നസറിലെത്തിയ ഫെലിക്‌സ് മികച്ച ഫോമിലാണ്. ക്ലബ്ബിന്റെ സമീപകാല ലീഗ് കിരീടനേട്ടത്തില്‍ മികച്ച കളിക്കാരനായി തിരഞ്ഞെടുക്കപ്പെട്ട ഫെലിക്‌സ്, അല്‍ നസറിനായി 55 മത്സരങ്ങളില്‍ നിന്ന് 30 ഗോളുകളും 22 അസിസ്റ്റുകളും നേടിയിട്ടുണ്ട്.

തന്റെ കളിയെക്കുറിച്ചും മുന്നേറ്റത്തെക്കുറിച്ചും ഫെലിക്‌സ് പറഞ്ഞു.

‘ഒരു കളിക്കാരന്‍ എന്ന നിലയില്‍ ഞാന്‍ കൂടുതല്‍ മെച്ചപ്പെട്ടതായി അനുഭവപ്പെടുന്നു. കളിയെക്കുറിച്ചും മത്സരത്തിന്റെ വിവിധ ഘട്ടങ്ങളെക്കുറിച്ചും എനിക്കിപ്പോള്‍ കൂടുതല്‍ വ്യക്തതയുണ്ട്. 20-21 വയസില്‍ ആയിരിക്കുന്നതുപോലെയല്ല 26-ാം വയസ്സില്‍ കാര്യങ്ങള്‍ ഗ്രഹിക്കുന്നത്,’ അദ്ദേഹം കൂട്ടിച്ചേര്‍ത്തു.

അതേസമയം, യുവേഫ നേഷന്‍സ് ലീഗില്‍ മികച്ച പ്രകടനവുമായി ഫെലിക്‌സ് കൈയടി നേടുകയാണ്. വെയ്ല്‍സിനെതിരായ ആദ്യ മത്സരത്തില്‍ എതിരില്ലാത്ത ഒരു ഗോളിന് വിജയിച്ചപ്പോഴും, നോര്‍വേയ്‌ക്കെതിരെ ഒന്നിനെതിരെ രണ്ട് ഗോളിന് വിജയിച്ചപ്പോഴും ഫെലിക്‌സ് ഗോള്‍ നേടിയിരുന്നു.

നേഷന്‍സ് ലീഗ് ഗ്രൂപ്പ് ഡി-യില്‍ നിലവില്‍ ഒന്നാമതാണ് പോര്‍ച്ചുഗല്‍. രണ്ട് മത്സരത്തില്‍ രണ്ടിലും ജയിച്ച് ആറ് പോയിന്റാണ് നിലവില്‍ ടീമിനുള്ളത്.

ഒക്ടോബര്‍ രണ്ടിനാണ് പോര്‍ച്ചുഗലിന്റെ അടുത്ത മത്സരം. ഡെന്‍മാര്‍ക്കാണ് എതിരാളികള്‍.

Content highlight: Joao Felix wants to provide the assist for Cristiano’s 1000th goal.