1984ല്‍ പുറത്തിറങ്ങിയ മൈ ഡിയര്‍ കുട്ടിച്ചാത്തന്‍ എന്ന ചിത്രത്തിലൂടെ തന്റെ സിനിമാ ജീവിതം ആരംഭിച്ച നടനാണ് ജഗദീഷ്. വര്‍ഷങ്ങളായി മലയാള സിനിമയില്‍ തുടരുന്ന അദ്ദേഹം ഹാസ്യ താരമായി എത്തി നിരവധി കഥാപാത്രങ്ങളിലൂടെ പ്രേക്ഷകരെ ചിരിപ്പിച്ചിട്ടുണ്ട്.
ഈയിടെയായി മികച്ച ഒരുപാട് സിനിമകളുടെ ഭാഗമായി സീരിയസ് റോളുകളും തനിക്ക് ചെയ്യാന്‍ പറ്റുമെന്ന് തെളിയിക്കാന്‍ ജഗദീഷിന് സാധിച്ചിട്ടുണ്ട്. ഇപ്പോള്‍ ആസിഫ് അലിയെ കുറിച്ച് പറയുകയാണ് നടന്‍. ആസിഫിന്റെ കരിയര്‍ ഗ്രാഫ് എങ്ങനെയാണെന്ന് എല്ലാവര്‍ക്കും അറിയാമെന്നും ആ ഗ്രാഫ് ഒരിക്കലും താഴേക്ക് പോയിട്ടില്ലെന്നും ജഗദീഷ് പറയുന്നു.
ആസിഫ് അലി നായകനായ രേഖാചിത്രത്തിന്റെ പ്രൊമോഷന്റെ ഭാഗമായി നടന്ന വാര്‍ത്താ സമ്മേളനത്തില്‍ സംസാരിക്കുകയായിരുന്നു നടന്‍. ജഗദീഷും ഈ സിനിമയില്‍ ഒരു പ്രധാനവേഷത്തില്‍ എത്തുന്നുണ്ട്.
ആസിഫിന്റെ സിനിമാ സെലക്ഷനെ പറ്റി എല്ലാവര്‍ക്കും അറിയാമെന്നും ഓരോ സിനിമയിലും എന്തെങ്കിലുമുണ്ടാകും എന്ന പ്രതീക്ഷയിലാണ് പ്രേക്ഷകര്‍ തിയേറ്ററില്‍ വരികയെന്നും നടന്‍ പറയുന്നു.
‘ആസിഫ് അലിയുടെ ഗ്രാഫ് എങ്ങനെയാണെന്ന് നമുക്ക് എല്ലാവര്‍ക്കും അറിയാം. അവന്റെ ഗ്രാഫ് ഒരിക്കലും താഴേക്ക് പോയിട്ടില്ല. ആസിഫിന്റെ സിനിമാ സെലക്ഷനെ പറ്റി എല്ലാവര്‍ക്കും അറിയാവുന്നതാണ്. അതില്‍ എന്തെങ്കിലും ഉണ്ടാകും എന്ന പ്രതീക്ഷയില്‍ ആയിരിക്കും പ്രേക്ഷകര്‍ തിയേറ്ററില്‍ വരിക.
ആസിഫിന്റേതായി വരുന്ന അടുത്ത സിനിമ ആഭ്യന്തര കുറ്റവാളിയാണ്. ഭാഗ്യവശാല്‍ അതിലും ഞാന്‍ ഒരു വേഷം ചെയ്യുന്നുണ്ട്. അത് പ്രതീക്ഷയോടെ കാത്തിരിക്കുകയാണ് ഞാന്‍,’ ജഗദീഷ് പറയുന്നു.
Content Highlight: Jagadish Talks About Asif Ali
