ഇന്ത്യയും ഇംഗ്ലണ്ടും തമ്മിലുള്ള നാലാം ടെസ്റ്റ് മത്സരം സമനിലയില്‍ അവസാനിച്ചിരിക്കുകയാണ്. മാഞ്ചസ്റ്ററിലെ ഓള്‍ഡ് ട്രാഫോര്‍ഡ് ക്രിക്കറ്റ് സ്റ്റേഡിയത്തില്‍ നടന്ന മത്സരത്തിന്റെ അവസാന ദിവസം ഇന്ത്യയെ ഓള്‍ഔട്ട് ആക്കാന്‍ സാധിക്കാതെ വന്നതോടെയാണ് ബെന്‍ സ്റ്റോക്‌സിനും സംഘത്തിനും സമനില വഴങ്ങേണ്ടി വന്നത്.

മത്സരത്തില്‍ ഇന്ത്യക്ക് വേണ്ടി വീരോചിതമായ പോരാട്ടമാണ് വൈസ് ക്യാപ്റ്റനും വിക്കറ്റ് കീപ്പര്‍ ബാറ്ററുമായ റിഷബ് പന്ത് കാഴ്ചവെച്ചത്. പരിക്കിന്റെ പിടിയിലായിരുന്നിട്ടും ഇന്ത്യയ്ക്ക് വേണ്ടി നാലാം ടെസ്റ്റിലെ ആദ്യ ഇന്നിങ്സില്‍ രണ്ട് സിക്സും മൂന്ന് ഫോറും ഉള്‍പ്പെടെ 75 പന്തില്‍ 54 റണ്‍സ് നേടിയാണ് പന്ത് മടങ്ങിയത്.

ക്രിസ് വോക്സിന്റെ യോര്‍ക്കറില്‍ പരിക്ക് പറ്റി വീങ്ങിതടിച്ച കാല്‍ വിരലുമായാണ് താരം കൂടാരത്തിലേക്ക് പോയത്. റിട്ടയേഡ് ഹര്‍ട്ടിലും അവസാന ഘട്ടത്തില്‍ കളത്തിലേക്ക് തിരിച്ചെത്തിയാണ് പന്ത് അമ്പരപ്പിക്കുന്ന പ്രകടനം നടത്തിയത്.

ഇതോടെ പന്തിന് ആറ് ആഴ്ചയോളം വിശ്രമം ആവശ്യമായിരുന്നു, മാത്രമല്ല വരാനിരിക്കുന്ന അഞ്ചാം മത്സരത്തില്‍ പന്ത് ടീമില്‍ നിന്ന് പുറത്തായിരിക്കുകയാണ്. ഇപ്പോള്‍ പന്തിന്റെ പ്രകടനത്തെ പ്രശംസിച്ച് സംസാരിക്കുകയാണ് മുന്‍ ഇന്ത്യന്‍ താരവും ക്യാപ്റ്റനുമായ സൗരവ് ഗാംഗുലി.

‘അദ്ദേഹം വളരെ മികച്ച ഒരു ടെസ്റ്റ് കളിക്കാരനാണ്. അദ്ദേഹത്തിന് പരിക്കേറ്റിട്ടുണ്ട്, കാലിന് ഒടിവുണ്ട്, അദ്ദേഹം സുഖം പ്രാപിക്കാന്‍ ഇനിയും സമയമെടുക്കും. പരമ്പരയില്‍ അദ്ദേഹം മികച്ച പ്രകടനം കാഴ്ചവച്ചു,’ ഗാംഗുലി ഐ.എ.എന്‍.എസിനോട് പറഞ്ഞു.

അതേസമയം മാഞ്ചസ്റ്റര്‍ ടെസ്റ്റിലെ സമനിലയ്ക്ക് പിന്നാലെ അഞ്ച് മത്സരങ്ങളുടെ പരമ്പരയിലെ നാലാം മത്സരം അവസാനിച്ചപ്പോള്‍ ആതിഥേയരായ ഇംഗ്ലണ്ട് 2-1ന് മുമ്പിലാണ്. ജൂലൈ 31 മുതല്‍ ഓഗസ്റ്റ് നാല് വരെയാണ് പരമ്പരയിലെ അഞ്ചാമത്തെയും അവസാനത്തെയും ടെസ്റ്റ് മത്സരം. ദി ഓവലാണ് വേദി.

Content Highlight: India VS England: Sourav Ganguly Talking About Rishabh Pant