ഇന്ത്യയും ഇംഗ്ലണ്ടും തമ്മിലുള്ള ആദ്യ ടെസ്റ്റ് ലീഡ്‌സിലെ ഹെഡിങ്ലിയില്‍ നടക്കുകയാണ്. മത്സരത്തിലെ നാലാം ദിനം അവസാനിച്ചപ്പോള്‍ രണ്ടാം ഇന്നിങ്‌സില്‍ ബാറ്റിങ്ങിനിറങ്ങിയ ഇന്ത്യയെ 364 റണ്‍സിന് തളച്ച് ഇംഗ്ലണ്ട് തുടര്‍ ബാറ്റിങ്ങിന് ഇറങ്ങിയിരിക്കുകയാണ്. മാത്രമല്ല ആറ് ഓവര്‍ പൂര്‍ത്തിയായപ്പോള്‍ വിക്കറ്റ് നഷ്ടപ്പെടാതെ 21 റണ്‍സാണ് ഇംഗ്ലണ്ട് നേടിയത്. 350 റണ്‍സാണ് ത്രീ ലയണ്‍സിന്റെ വിജയലക്ഷ്യം.

രണ്ടാം ഇന്നിങ്സില്‍ ഇന്ത്യയ്ക്ക് വേണ്ടി മിന്നും പ്രകടനം നടത്തിയത് ഓപ്പണര്‍ കെ.എല്‍. രാഹുലും റിഷബ് പന്തുമാണ്. സെഞ്ച്വറി പൂര്‍ത്തിയാക്കിയാണ് രാഹുല്‍ മിന്നും പ്രകടനം കാഴ്ചവെച്ചത്. ആദ്യ ഇന്നിങ്സില്‍ 42 റണ്‍സിന് പുറത്തായ രാഹുല്‍ രണ്ടാം ഇന്നിങ്സില്‍ 247 പന്ത് നേരിട്ട് 18 ഫോറുകള്‍ അടക്കം 137 റണ്‍സാണ് രാഹുല്‍ സ്വന്തമാക്കിയത്. ബ്രൈഡന്‍ കാഴ്സിന്റെ പന്തില്‍ ബൗള്‍ഡാകുകയായിരുന്നു താരം.

എന്നാല്‍ അടുത്തിടെയായി രാഹുല്‍ തന്റെ ആവറേജിന്റെ പേരില്‍ ഏറെ വിമര്‍ശിക്കപ്പെട്ടിരുന്നു. 101 ടെസ്റ്റ് ഇന്നിങ്‌സില്‍ നിന്ന് 33.6 എന്ന ശരാശരിയില്‍ 3257 റണ്‍സാണ് രാഹുല്‍ നേടിയത്. ഏകദിനത്തിലെ 79 ഇന്നിങ്‌സില്‍ നിന്ന് രാഹുല്‍ 49.1 ശരാശരിയില്‍ 3043 റണ്‍സും നേടി. ടി-20യില്‍ 37.8 എന്ന ശരാശരിയില്‍ 2265 റണ്‍സും താരത്തിനുണ്ട്.

നാലാം ദിവലം കഴിഞ്ഞപ്പോള്‍ മാധ്യമപ്രവര്‍ത്തകരോട് സംസാരിച്ച രാഹുല്‍ തന്റെ ആവറേജിനെക്കുറിച്ചും സംസാരിച്ചിരുന്നു. തന്റെ ശരാശരി നോക്കുമ്പോള്‍ വേദനിക്കാറുണ്ടെന്നും എന്നാല്‍ നിര്‍ണായക ഘട്ടങ്ങളില്‍ നമ്പറുകളെക്കുറിച്ച് ചിന്തിക്കാന്‍ താത്പര്യമില്ലെന്നും താരം പറഞ്ഞു.

‘എന്റെ ശരാശരി നോക്കുമ്പോള്‍ എനിക്ക് ഏറെ വേദന തോന്നുന്നു. പക്ഷേ നിര്‍ണായക ഘട്ടങ്ങളില്‍ എനിക്ക് നമ്പറുകളെക്കുറിച്ച് ചിന്തിക്കാന്‍ താത്പര്യമില്ല. എനിക്ക് അവസരം ലഭിക്കുമ്പോഴെല്ലാം ഒരു സ്വാധീനം ചെലുത്താനും ഇന്ത്യയ്ക്കായി ടെസ്റ്റ് ക്രിക്കറ്റ് കളിക്കുന്നത് ആസ്വദിക്കാനും ഞാന്‍ ആഗ്രഹിക്കുന്നു. ഞാന്‍ വളര്‍ന്നത് ഇതിലൂടെയാണ്,’ രാഹുല്‍ പറഞ്ഞു.

രാഹുലിന് പുറമെ വൈസ് ക്യാപ്റ്റൻ റിഷബ് പന്തും ഇന്ത്യക്കായി രണ്ടാം ഇന്നിങ്സിൽ സെഞ്ച്വറി നേടിയിരുന്നു. 140 പന്ത് നേരിട്ട് 118 റൺസാണ് പന്ത് രണ്ടാം ഇന്നിങ്‌സിൽ അടിച്ചെടുത്തത്. മൂന്ന് സിക്‌സറും 15 ഫോറും ഉൾപ്പെടുന്നതായിരുന്നു പന്തിന്റെ ഇന്നിങ്‌സ്.

Content Highlight: India VS England: K.L Rahul Talking About His Average In Cricket