ഇന്ത്യയും ഇംഗ്ലണ്ടും തമ്മിലുള്ള ആദ്യ ടെസ്റ്റ് ലീഡ്സിലെ ഹെഡിങ്ലിയില് നടക്കുകയാണ്. മത്സരത്തിലെ നാലാം ദിനം അവസാനിച്ചപ്പോള് രണ്ടാം ഇന്നിങ്സില് ബാറ്റിങ്ങിനിറങ്ങിയ ഇന്ത്യയെ 364 റണ്സിന് തളച്ച് ഇംഗ്ലണ്ട് തുടര് ബാറ്റിങ്ങിന് ഇറങ്ങിയിരിക്കുകയാണ്. മാത്രമല്ല ആറ് ഓവര് പൂര്ത്തിയായപ്പോള് വിക്കറ്റ് നഷ്ടപ്പെടാതെ 21 റണ്സാണ് ഇംഗ്ലണ്ട് നേടിയത്. 350 റണ്സാണ് ത്രീ ലയണ്സിന്റെ വിജയലക്ഷ്യം.
രണ്ടാം ഇന്നിങ്സില് ഇന്ത്യയ്ക്ക് വേണ്ടി മിന്നും പ്രകടനം നടത്തിയത് ഓപ്പണര് കെ.എല്. രാഹുലും റിഷബ് പന്തുമാണ്. സെഞ്ച്വറി പൂര്ത്തിയാക്കിയാണ് രാഹുല് മിന്നും പ്രകടനം കാഴ്ചവെച്ചത്. ആദ്യ ഇന്നിങ്സില് 42 റണ്സിന് പുറത്തായ രാഹുല് രണ്ടാം ഇന്നിങ്സില് 247 പന്ത് നേരിട്ട് 18 ഫോറുകള് അടക്കം 137 റണ്സാണ് രാഹുല് സ്വന്തമാക്കിയത്. ബ്രൈഡന് കാഴ്സിന്റെ പന്തില് ബൗള്ഡാകുകയായിരുന്നു താരം.
രാഹുലിന് പുറകെ സെഞ്ച്വറി നേടിയാണ് റിഷബ് പന്തും തിളങ്ങിയത്. 140 പന്ത് നേരിട്ട് 118 റണ്സാണ് പന്ത് രണ്ടാം ഇന്നിങ്സില് അടിച്ചെടുത്തത്. മൂന്ന് സിക്സറും 15 ഫോറും ഉള്പ്പെടുന്നതായിരുന്നു പന്തിന്റെ ഇന്നിങ്സ്. ഷോയ്ബ് ബഷീറിന്റെ പന്തില് സാക്ക് ക്രോളിക്ക് ക്യാച്ച് നല്കിയായിരുന്നു പന്ത് തന്റെ ഇന്നിങ്സ് അവസാനിപ്പിച്ചത്. ആദ്യ ഇന്നിങ്സില് 134 റണ്സ് നേടി പന്ത് സെഞ്ച്വറി നേടിയിരുന്നു.
ഇന്നിങ്സ് അവസാനിച്ച ശേഷം ഇന്ത്യയ്ക്ക് വേണ്ടി മിന്നും പ്രകടനം കാഴ്ചവെച്ച റിഷബ് പന്തിനെക്കുറിച്ച് കെ.എല്. രാഹുല് സംസാരിച്ചിരുന്നു. റിഷബിന്റെ കളി കാണുന്നത് തനിക്ക് വളരെ ഇഷ്ടമാണെന്നും എന്നാല് പന്തിനെപ്പോലെ ആക്രമണ രീതിയില് ടെസ്റ്റ് ക്രിക്കറ്റ് കളിക്കാന് തനിക്ക് സാധിക്കില്ലെന്നും രാഹുല് പറഞ്ഞു. പന്ത് കളിക്കുന്ന ആദ്യത്തെയോ രണ്ടാമത്തെയോ പന്തില് സ്റ്റെപ് ഔട്ട് ചെയ്ത് കൂറ്റന് അടിക്കക്ക് ശ്രമിക്കുന്നതിന് വളരെയധികം ധൈര്യം ആവശ്യമാണെന്നും അതിന് അവനെ താന് അഭിന്ദിക്കുന്നുവെന്നും ഓപ്പണര് കൂട്ടിച്ചേര്ത്തു.
പന്തിന്റെ ആക്രമണ ബാറ്റിങ്ങിനെക്കുറിച്ച് രാഹുല് പറഞ്ഞത്
‘റിഷബിന്റെ കളി കാണുന്നത് എനിക്ക് വളരെ ഇഷ്ടമാണ്. പക്ഷേ ടെസ്റ്റ് ക്രിക്കറ്റില് എനിക്ക് അങ്ങനെ കളിക്കാന് കഴിയുമെന്ന് കരുതുന്നില്ല! അങ്ങനെ ചെയ്യുന്നതിനെക്കുറിച്ച് ഞാന് ചിന്തിക്കുകപോലുമില്ല. പന്ത് അവന് ഇഷ്ടപ്പെടുന്ന രീതിയില് കളിക്കട്ടെ, അവന്റെ ഷോട്ടുകളെയും ധൈര്യത്തെയും ഞാന് അഭിനന്ദിക്കുന്നു. അവന് കളിക്കുന്ന ആദ്യത്തെയോ അല്ലെങ്കില് രണ്ടാമത്തെയോ പന്തില് സ്റ്റെപ് ഔട്ട് ചെയ്ത് കൂറ്റന് അടിക്ക് ശ്രമിക്കുന്നതിന് വളരെയധികം ധൈര്യം ആവശ്യമാണ്! അതിനാല് ഞാന് അവനെ അഭിനന്ദിക്കുന്നു. എന്റെ കളിയിലും എന്റെ മേഖലയിലും ഞാന് തുടരുന്നു,’ കെ.എല് രാഹുല് പറഞ്ഞു.
മറ്റാര്ക്കും ഇന്ത്യയ്ക്ക് വേണ്ടി മികച്ച ബാറ്റിങ് പ്രകടനം നടത്താന് സാധിച്ചില്ലായിരുന്നു. മധ്യ നിരയില് കരുണ് നായരും (20 റണ്സ്) ഷാര്ദുല് താക്കൂറും (4 റണ്സ്) ആദ്യ ഇന്നിങ്സിലേത് പോലെ മികവ് പുലര്ത്താന് സാധിക്കാതെയാണ് മടങ്ങിയത്. പന്നീട് ഇറങ്ങിയ മുഹമ്മദ് സിറാജും ജസ്പ്രീത് ബുംറയും പ്രസിദ്ധ് കൃഷ്ണയും പൂജ്യം റണ്സിനാണ് മടങ്ങിയത്.
അതേസമയം രണ്ടാം ഇന്നിങ്സില് ഇംഗ്ലണ്ടിന് വേണ്ടി മിന്നും ബൗളിങ് പ്രകടനം കാഴ്ചവെച്ചത് ബ്രൈഡന് കാഴ്സും ജോഷ് ടംഗുമാണ്. ഇരുവരും മൂന്ന് വിക്കറ്റുകളാണ് ഇന്ത്യയ്ക്ക് വേണ്ടി നേടിയത്. ഷൊയ്ബ് ബഷീര് രണ്ട് വിക്കറ്റും ക്രിസ് വോക്സ്, ബെന് സ്റ്റോക്സ് എന്നിവര് ഓരോ വിക്കറ്റും നേടി. ആദ്യ ഇന്നിങ്സില് മികച്ച ബൗളിങ് പ്രകടനമാണ് സ്റ്റോക്സ് കാഴ്ചവെച്ചത്. നാല് വിക്കറ്റുകളായിരുന്നു താരം നേടിയത്.
Content Highlight: India VS England: K.L Rahul Praises Great Fearless Performance Of Rishabh Pant
