![?php echo $post['title']; ?>](https://assets.doolnews.com/w/900x473/2018/06/amma-meeting.jpg)
തിരുവനന്തപുരം: അമ്മയില് നിന്നും രാജിവെക്കുന്നതായി ആക്രമണത്തെ അതിജീവിച്ച നടി. ഡബ്യൂ.സി.സിയുടെ ഫേസ്ബുക്ക് പേജിലൂടെയാണ് നടി രാജി പ്രഖ്യാപിച്ചത്.
തനിക്ക് നേരെ നടന്ന ആക്രമണത്തില് കുറ്റാരോപിതനായ നടനെ “അമ്മ”യിലേക്ക് തിരിച്ചെടുത്തതു കൊണ്ടല്ല ഈ തീരുമാനമെന്നും ഇതിനു മുന്പ് ഈ നടന് എന്റെ അഭിനയ അവസരങ്ങള് തട്ടിമാറ്റിയിട്ടുണ്ടെന്നും അന്ന് പരാതിപ്പെട്ടപ്പോള് ഗൗരവപ്പെട്ട ഒരു നടപടിയും സംഘടന എടുത്തിരുന്നില്ലെന്നും നടി പറയുന്നു.
ഇത്രയും മോശപ്പെട്ട അനുഭവം എന്റെ ജീവിതത്തില് ഈയിടെ ഉണ്ടായപ്പോള്, ഞാന് കൂടി അംഗമായ സംഘടന കുറ്റാരോപിതനായ വ്യക്തിയെ സംരക്ഷിക്കാനാണ് കൂടുതല് ശ്രമിച്ചത്. ഇനിയും ഈ സംഘടനയുടെ ഭാഗമായിരിക്കുന്നതില് അര്ത്ഥമില്ല എന്ന് മനസ്സിലാക്കി ഞാന് രാജി വെക്കുന്നു- നടി പ്രസ്താവനയില് പറഞ്ഞു.
“”അമ്മ എന്ന സംഘടനയില് നിന്ന് ഞാന് രാജിവെക്കുകയാണ് . എനിക്ക് നേരെ നടന്ന ആക്രമണത്തില് കുറ്റാരോപിതനായ നടനെ “അമ്മ”യിലേക്ക് തിരിച്ചെടുത്തതു കൊണ്ടല്ല ഈ തീരുമാനം . ഇതിനു മുന്പ് ഈ നടന് എന്റെ അഭിനയ അവസരങ്ങള് തട്ടിമാറ്റിയിട്ടുണ്ട്. അന്ന് പരാതിപ്പെട്ടപ്പോള് ഗൗരവപ്പെട്ട ഒരു നടപടിയും സംഘടന എടുത്തിരുന്നില്ല. ഇത്രയും മോശപ്പെട്ട അനുഭവം എന്റെ ജീവിതത്തില് ഈയിടെ ഉണ്ടായപ്പോള് , ഞാന് കൂടി അംഗമായ സംഘടന കുറ്റാരോപിതനായ വ്യക്തിയെ സംരക്ഷിക്കാനാണ് കൂടുതല് ശ്രമിച്ചത്. ഇനിയും ഈ സംഘടനയുടെ ഭാഗമായിരിക്കുന്നതില് അര്ത്ഥമില്ല എന്ന് മനസ്സിലാക്കി ഞാന് രാജി വെക്കുന്നു.””- നടി പറയുന്നു.
ആക്രമിക്കപ്പെട്ട നടിക്ക് പിന്തുണ നല്കി രമ്യ നമ്പീശന്, ഗീതു മോഹന്ദാസ്, റിമ കല്ലിങ്കല് തുടങ്ങിയവരും രാജിവെച്ചിട്ടുണ്ട്. അവള്ക്കൊപ്പം തങ്ങളും രാജിവെക്കുകയാണെന്ന് ഇവര് വ്യക്തമാക്കിയിട്ടുണ്ട്.
1995 മുതല് മലയാള സിനിമാരംഗത്ത് പ്രവര്ത്തിക്കുന്ന സംഘടനയാണ് അമ്മ. ദേശീയ തലത്തിലും അന്തര്ദേശീയ തലത്തിലും അംഗീകാരങ്ങള് നേടി തരുന്ന മലയാള സിനിമാ മേഖലയില് പ്രവര്ത്തിക്കുന്നതില് ഞങ്ങള് ഏറെ അഭിമാനിക്കുന്നു
പക്ഷേ,സ്ത്രീ സൗഹാര്ദ്ദപരമായ തൊഴിലിടമായി മലയാള സിനിമാ വ്യവസായത്തെ മാറ്റാനുള്ള ഒരു ശ്രമവും നടത്തിയിട്ടില്ല ഈ സംഘടന എന്നു ഞങ്ങള് ഓര്മ്മിപ്പിക്കുന്നു.
ഒട്ടേറേ സ്ത്രീകള് അംഗങ്ങളായുള്ള സംഘടനയാണിതെന്ന് ഓര്ക്കണം. മാത്രമല്ല വിമന് ഇന് സിനിമാ കളക്ടീവ് അതിനായി നടത്തിയ ശ്രമങ്ങളെ , ഫാന്സ് അസോസിയേഷനുകളുടെ മസില് പവറിലൂടേയും തരം താണ ആക്ഷേപഹാസ്യത്തിലൂടെയും പരിഹസിക്കുകയാണ് ചെയ്തിട്ടുള്ളത്.
അമ്മയുടെ അംഗമായ ഞങ്ങളുടെ സഹപ്രവര്ത്തകക്ക് നേരെ ഉണ്ടായ അതിക്രമത്തില് അമ്മ അംഗവും കുറ്റാരോപിതനുമായ നടനെ പിന്തുണക്കുന്ന നിലപാടാണ് “അമ്മ” സ്വീകരിച്ചത്.
കുറ്റാരോപിതനായ നടനെ തിരിച്ചെടുക്കാന് തീരുമാനിക്കുക വഴി, തങ്ങള് ആരുടെ പക്ഷത്താണെന്ന് അസന്നിഗ്ദ്ധമായി പ്രഖ്യാപിച്ചിരിക്കുകയാണ്. അമ്മയുടെ ജനറല് ബോഡിയില് അജണ്ടയില് ഇല്ലാതിരുന്ന ഈ വിഷയം ചര്ച്ചക്കെടുത്ത് നാടകീയമായി തിരിച്ചെടുക്കാന് തീരുമാനിച്ചത് ഞെട്ടലോടെയാണ് മാധ്യമങ്ങളില് നിന്ന് അറിഞ്ഞത്. ഞങ്ങള്ക്ക് ഈ മീറ്റിങ്ങില് പങ്കെടുക്കാന് സാധിച്ചില്ല എന്നത് ഈ പ്രവൃത്തിയെ സാധൂകരിക്കുന്നില്ല. ഈ തീരുമാനമെടുക്കുമ്പോള്, ആക്രമണത്തെ അതിജീവിച്ച അംഗത്തെ നിങ്ങള് ഓര്ത്തില്ല!
അമ്മയുടെ ഈ തീരുമാനത്തിനൊപ്പം നില്ക്കാന് ഞങ്ങള്ക്കാവില്ല. ഞങ്ങള് അവളുടെ പോരാട്ടത്തിന് കൂടുതല് ശക്തമായി ഐക്യദാര്ഢ്യം പ്രഖ്യാപിക്കുന്നു. “”അമ്മ”യില് നിന്നും രാജി വെക്കാനുള്ള അവളുടെ തീരുമാനത്തോട് ഐക്യപ്പെട്ടു കൊണ്ട് ഞങ്ങളില് കുറച്ചു പേര് രാജി വെക്കുകയാണ്. ഇത് അമ്മയുടെ ഇപ്പോഴെടുത്ത തീരുമാനം തിരുത്തുന്നതിന് കാരണമാകട്ടെ എന്ന് ആശിക്കുന്നു.”- ഇവര് ഫേസ്ബുക്ക് കുറിപ്പില് പറയുന്നു.
