ഒരൊറ്റ ജനാധിപത്യ രാജ്യമായി (One Democratic Country- ODC) മാറുക എന്നതാണ് ഇസ്രഈല്‍ – ഫലസ്തീന്‍ പ്രശ്നത്തിനുള്ള ശാശ്വത പരിഹാരം. അതിനെ എന്ത് പേര് വേണമെങ്കിലും വിളിക്കാം, ഇസ്രഈല്‍ എന്നോ, ഫലസ്തീന്‍ എന്നോ, മാക്കാസൂക്കി എന്നോ എന്തും.

പക്ഷേ, ജൂതനും അറബും തുല്യതയും അവസരസമത്വവും ഉള്ള ഡെമോക്രാറ്റിക്‌ രാജ്യമാവണം അത് – പിന്നെ ഇന്നത്തെ സയണിസ്റ്റ്, അപ്പാര്‍ത്തിഡ്, ജൂയിഷ് സ്റ്റേറ്റ് ഉണ്ടാവില്ല/ ഉണ്ടാവരുത് . അതാണ് ശാശ്വത പരിഹാരം.

ചോദ്യം: ഇസ്രഈല്‍ എന്ന രാജ്യം നിലനില്‍ക്കാന്‍ പാടില്ല എന്നാണോ?
ഉത്തരം: ഒരു സംശയവും വേണ്ട, ഇന്നത്തെ സയണിസ്റ്റ്, ആപ്പാര്‍ത്തിഡ്, വംശീയ ഇസ്രഈല്‍ നിലനില്‍ക്കാന്‍ പാടില്ല.(ഈഭാഗം സ്‌ക്രീന്‍ ഷോട്ട് ആയി പോകാന്‍ സാധ്യതയുണ്ട്, കാരണം കൂടി കോപ്പി ചെയ്യുമല്ലോ )

ചോദ്യം: കാരണം?
ഉത്തരം: രണ്ടു പ്രധാന കാരണങ്ങളുണ്ട്.

ഒന്ന്: 21% വരുന്ന അറബ് – ഇസ്രഈല്‍ സിറ്റിസനിനെതിരെ എതിരെ 65 ഓളം വിവേചന നിയമങ്ങള്‍ (Discriminatory laws ) ഉള്ള രാജ്യമാണ് സയണിസ്റ്റ് ഇസ്രഈല്‍. (Including the Israel Basic law). സ്വന്തം പൗരന്മാര്‍ക് എതിരെ നിലനില്‍ക്കുന്ന അത്തരം നിയമങ്ങള്‍ പാടില്ല.

രണ്ട്: ഫലസ്തീനികളുടെ സ്ഥലം അധിനിവേശം ചെയ്ത് സെറ്റിലമെന്റുകള്‍ പണിത് യഹൂദര്‍ക്ക് ( വെസ്റ്റ് ബാങ്കിലെ Hill-Top സെറ്റലേഴ്സ് എന്ന ജൂത-ഗുണ്ടകള്‍ ഉള്‍പ്പെടെ) കോളനികള്‍ വച്ച് കൊടുക്കുന്നു. അതും നിര്‍ത്തണം. അതിനു ഇന്നത്തെ അപ്പാര്‍തീഡ് ഇസ്രഈല്‍ ഭരണം അവസാനിക്കണം.

ചോദ്യം: അപ്പാര്‍ത്തീഡ് ഭരണകൂടം എന്നത് ഒരു ആരോപണം അല്ലെ? ഇപ്പോഴും ഫലസ്തീന്‍ അനുകൂലികള്‍ എടുത്തുപയോഗിക്കുന്ന അര്‍ത്ഥമില്ലാത്ത ആരോപണം?
ഉത്തരം : അല്ല. ഇസ്രഈല്‍ ബേസിക് ലോയുടെ ദേശ -രാഷ്ട്രം എന്ന അനുബന്ധം 2018 ല്‍ ഭേദഗതി ചെയ്തിരുന്നു. ആ ഭേദഗതി വഴി ഇസ്രഈലില്‍ സ്വയം നിര്‍ണ്ണയ അവകാരം ജൂതര്‍ക്ക് മാത്രമായി ചുരുക്കപ്പെട്ടു. ഇസ്രഈല്‍ ജൂതന്മാരുടെ രാഷ്ട്രമാണ് എന്നും ഭേദഗതിയില്‍ പറയുന്നു. പക്ഷെ, ജൂതന്മാരല്ലാത്തവരുടെ പൗരത്വം റദ്ദ് ചെയ്യപ്പെടുന്നില്ല.

ഇസ്രഈലില്‍ നാഷണാലിറ്റിയും, സിറ്റിസണ്ഷിപ്പും ഒന്നല്ല. ജൂതന്മാര്‍ക്ക് മാത്രം നാഷണാലിറ്റി ഉണ്ടായിരിക്കുമ്പോള്‍ ബാക്കിയുള്ളവര്‍ പൗരന്മാര്‍ മാത്രമായിരിക്കും. അങ്ങിനത്തെ അപൂര്‍വ്വം രാജ്യങ്ങളില്‍ ഒന്നാണ് ഇസ്രഈല്‍.

അന്ന് ആ ബില്ലിനെ എതിര്‍ത്ത ജൂതന്മാരുള്‍പ്പടെ 55 കെന്നസ്സത്ത് അംഗങ്ങള്‍ ബില്ലിന്റെ കോപ്പി കെന്നെസ്സെറ്റിന്റെ തറയില്‍ കീറിയെറിഞ്ഞു- അവര്‍ പറഞ്ഞതാണ് ‘ഇസ്രഈല്‍ ഒരു അപ്പാര്‍ത്തീഡ് ഭരണകൂടം ആണെന്ന്.‘ ആ ബില്ല് പാസാക്കിയത് 55 നെതിരെ വെറും 62 വോട്ടുകള്‍ക്കാണ്. 120 അംഗങ്ങളില്‍ മൂന്നു പേര് അന്ന് ഹാജരായിരുന്നില്ല. അതായത് പകുതിയോളം വരുന്ന ഇസ്രഈല്‍ പൗരന്മാര്‍ക്കു ഈ വിവേചനത്തോട് താല്പര്യമില്ല. അവരില്‍ പ്രതീക്ഷയര്‍പ്പിക്കാം.

ചോദ്യം : അപ്പോള്‍ അവിടെയുള്ള ജൂതന്മാര്‍ എങ്ങോട്ട് പോകും?
ഉത്തരം : എങ്ങോട്ടും പോകേണ്ടതില്ല,  1948 ന് മുന്‍പ് അവര്‍ ഒരുമിച്ച് കഴിഞ്ഞവരാണ് .കുടിയേറ്റം നിമിത്തം ജൂത – അറബ് അനുപാതം മാറിയിട്ടുണ്ട്, അത് പരിഹരിക്കാവുന്നതേയുള്ളൂ. യുറോപ്പിന്റെയും അമേരിക്കയുടെയും ഇടപെടലിനു മുന്‍പ് ആ നാട്ടില്‍ സമാധാനത്തോടെ സഹവര്‍ത്തിതം ചെയ്തവരാണ് അവര്‍.

യഹൂദന് ഈ ലോകത്തില്‍ ഒരുമിച്ച് കഴിയാവുന്നതില്‍ അറബിനോളം ആരും വരില്ല എന്നത് ചരിത്രം. നരവംശ ശാസ്ത്രപ്രകാരവും ഒരേ മനുഷ്യരാണ്, ഒരപ്പന്റെ മക്കള്‍. അതിനിയും സാധ്യമാണ്.

ചോദ്യം: ലോകരാജ്യങ്ങളില്‍ ഭൂരിപക്ഷവും Two – State – Solution ആണല്ലോ മുന്നോട്ട് വയ്ക്കുന്നത്?
ഉത്തരം: ഇതില്‍ ലോക രാജ്യങ്ങള്‍ക്ക് ഒരു ഇടപാടും ഇല്ല. വെറുതെ അഭിപ്രായം പറയുന്നതിനപ്പുറം ആരും ഇടപെടുകയും ഇല്ല. അനുഭവിക്കുന്നത്  അവിടെയുള്ള മനുഷ്യരാണ്. ഇതൊരു സ്വപ്‌നമായി ഇന്ന് തോന്നും.

ഇന്നത്തെ സാഹചര്യത്തില്‍ റ്റു സ്റ്റേറ്റ് സൊല്യൂഷന്‍ അതിലും വലിയ നടക്കാത്ത സ്വപ്‌നമാണ് എന്നത് മറ്റൊരു കാര്യം.

വെസ്റ്റ് ബാങ്കിലെ ഛിന്നഭിന്നമാക്കികളഞ്ഞ ഫലസ്തീന്‍ എന്‍ക്ലെവുകളും 90 മൈല്‍ അപ്പുറത്തുള്ള ജനസാന്ദ്രമായ ഗസ്സയും ഇടയ്ക്കുള്ള ഇടനാഴിയും ചേര്‍ത്ത് ഒരു രാജ്യമാക്കാന്‍ ആര്‍ക്കും കഴിയില്ല. പ്രശ്‌നപരിഹാരത്തെ ഗൗരവമായി കാണാത്തവരാണ് Two-State-Solution പറയുന്നത്. സുന്ദരമായ നടക്കാത്ത സ്വപ്‌നം.

ചോദ്യം : ഇതിനു മുന്‍ മാതൃകകള്‍ ഉണ്ടോ?
ഉത്തരം : രാഷ്ട്രീയമായി സൗത്ത് ആഫ്രിക്ക ആണ് ഏറ്റവും നല്ല ഉദാഹരണം. വംശീയമായി റുവാണ്ട നല്ല ഉദാഹരണമാണ്. റുവാണ്ടയില്‍ ഹുടുവും ട്യൂട്‌സിയും തമ്മില്‍ ഭിന്നിപ്പ് ഉണ്ടാക്കിയത് ബെല്‍ജിയം എന്ന യൂറോപ്യന്‍ രാജ്യമാണ്. 1994 ല്‍ എട്ടു ലക്ഷം പേര് 100 ദിവസം കൊണ്ട് കൊല്ലപ്പെട്ടു. ബെല്‍ജിയം പോയി – ഇന്ന് ഹുടുവും യുട്‌സിയും സഹകരണത്തിന്റെ പാതയിലാണ്. സമാനതകള്‍ കുറവാണെങ്കിലും ആസ്ത്രേലിയ കാനഡ തുടങ്ങിയ മാതൃകകളും നമ്മുടെ മുന്നിലുണ്ട്.

ചോദ്യം: ആരാണ് ODC യ്ക്ക് തടസ്സം ?
ഉത്തരം: ബാഹ്യമായ തടസ്സം അവഗണിച്ചാല്‍ ODC യ്ക്ക് ഏറ്റവും വലിയ തടസം അധിനിവേശമല്ല – ഇസ്രഈല്‍ സ്‌കൂള്‍ കുട്ടികള്‍ ആയിരിക്കുമ്പോഴേ ഫലസ്തീനികള്‍ക്ക് എതിരെ നടത്തുന്ന ഡി-ഹ്യുമനൈസെഷന്‍ ആണ്. ഫലസ്തീനികളെ മനുഷ്യരായിപ്പോലും കാണാന്‍ സയണിസ്റ്റ് ഭരണകൂടം അനുവദിക്കുന്നില്ല. ജൂത പട്ടാളക്കാരുടെ ഇടയിലും ഇത്തരം പ്രൊപ്പഗണ്ടകള്‍ ഇറക്കുന്നുണ്ട്.  അത് ചെയ്യുന്നത് സയണിസ്റ്റ് ഭരണകൂടമാണ്‌. അതിനെതിരെ പ്രവര്‍ത്തിക്കുന്ന ധാരാളം സംഘടനകളുണ്ട് ഇസ്രഈലില്‍. അവര്‍ വിജയം കാണും. അങ്ങിനെ വന്നാല്‍ അവര്‍ക്ക് ഒരുമിച്ച് താമസിക്കാനാകും.

രണ്ടാമത്തെ വിഷയം അധിനിവേശമാണ്. ഒറ്റ രാജ്യമായാല്‍ പിന്നെ അധിനിവേശം ആവശ്യമില്ലല്ലോ. (ബാഹ്യ ശക്തികളില്‍ അമേരിക്കയിലെ ഇസ്രഈല്‍ ലോബിയും ക്രിസ്ത്യന്‍ സയണിസ്റ്റുകളും യൂറോപ്പും ആണ്)

ചോദ്യം : എന്തായിരിക്കും ODC യുടെ Political Structure ?
ഉത്തരം : അറിയില്ല. One Country – Two System ആകാം. ഒരു രാജ്യം രണ്ട് ഓട്ടോണമസ് ബോഡി ആകാം. ഒറ്റ പാര്‍ലമെന്റ് – ആകാം. അവര്‍ ചര്‍ച്ച ചെയ്ത തീരുമാനം ഉണ്ടാക്കേണ്ടതാണ്.

ചോദ്യം : ഇത് ഇരു ഭാഗത്തും സജീവ പരിഗണയിലുണ്ടോ?
ഉത്തരം : ഉണ്ട്. അടുത്ത കാലത്ത് ODC വേണ്ടി പ്രവര്‍ത്തിക്കുന്ന ധാരാളം സംഘടനകള്‍ ഇസ്രഈലില്‍ ഉണ്ട്. Matzpen (The Socialist Organization in Israel), Zochrot എന്ന NGO , Alternative Information Center (AIC), The One Democratic State Campaign (ODSC) തുടങ്ങിയ പല സംഘടനളുമുണ്ട്. Ilan Pappé, Oren Yiftachel, ഗിദെയോന്‍ ലേവി തുടങ്ങിയ ധാരാളം ബുദ്ധിജീവികള്‍, അക്കാദമിഷ്യന്‍സ് ഉണ്ട്.

Oren Yiftachel / Ilan Pappé

ഫലസ്തീനില്‍ The One Democratic State Campaign (ODSC), Popular Front for the Liberation of Palestine (PFLP) എന്ന ഇടതു പക്ഷ സംഘടന, Palestinian Civil Society Movements, തുടങ്ങിയ സംഘടനകളും മരണം വരെ Edward Said ഉം Ali Abunimah ഉം ODC സപ്പോര്‍ട്ട് ചെയ്യുന്നു.

Edward Said

അവസാനത്തെ ചോദ്യം: വ്യക്തിപരമാണ്, താങ്കള്‍ പൂര്‍ണ്ണമായും ഫലസ്തീന് അനുകൂലമാണല്ലോ. ഇസ്രഈലിന്റെ പ്രവര്‍ത്തനങ്ങളില്‍ ഒരു ശരിയും ഇല്ലേ? അവര്‍ക്ക് Existence നും Self-Defence നും അവകാശമില്ലേ?
ഉത്തരം : ഞാന്‍ ഈ വിഷയത്തില്‍ ഫലസ്തീന്‍ ജനതക്കൊപ്പം മാത്രമാണ്. അതുകൊണ്ട് അവര്‍ക്ക് വേണ്ടി പ്രതിരോധം തീര്‍ക്കുന്ന ഹമാസിനൊപ്പം ആണെന്ന് പറയേണ്ടതില്ലല്ലോ.

ആശയപരമായി ഹമാസിന്റെ വിരുദ്ധ ധ്രുവത്തില്‍ നില്‍ക്കുന്ന ഹൂത്തികളും മനുഷ്യത്വതിന്റെ പേരില്‍ ഫലസ്തീനൊപ്പമാണ് എന്നത് പോലെ തന്നെ ഹിസ്ബൊള്ളയും ഇറാനും ഫലസ്തീനൊപ്പം ആണ്. അതുകൊണ്ട് ഞാന്‍ വ്യക്തിപരമായി ഈ വിഷയത്തില്‍ അവരെയെല്ലാം അനുകൂലിക്കുന്നു. മറ്റു പല വിഷയങ്ങളിലും വിയോജിപ്പുകളുണ്ട്- പ്രത്യേകിച്ച് ഞാന്‍ ഒരു മത/ ദൈവ വിശ്വാസി അല്ലാത്തതിനാല്‍. അതൊന്നും ഈ വിഷയത്തില്‍ ഇപ്പോള്‍ പ്രസക്തമല്ല.

16,000 കുഞ്ഞുങ്ങള്‍ ഉള്‍പ്പടെ 45,000 ല്‍ പരം മനുഷ്യരെ ഇസ്രഈല്‍ കൊന്നു കളഞ്ഞു ഒരു വര്ഷം കൊണ്ട്.

ചുണ്ടങ്ങ കൊടുത്തിട്ട് വഴുതനങ്ങ വാങ്ങിയതല്ലേ എന്ന വാദം തള്ളിക്കളയുന്നു. 2023 ജനുവരി മുതല്‍ ഒക്ടോബര്‍ 7 വരെ മാത്രം 42 കുട്ടികള്‍ ഉള്‍പ്പടെ 208 ഫലസ്തീനികള്‍ വെസ്റ്റ് ബാങ്കില്‍ കൊല്ലപ്പെട്ടു. ഗസ്സയിലെ എണ്ണം ഇതിലും കൂടും. ഇവര്‍ ചുണ്ടങ്ങ കൊടുക്കാതെ വഴുതനങ്ങ വാങ്ങിയവരാണ്‌. ചുണ്ടങ്ങ കൊടുക്കാതെ കഴിഞ്ഞ 79 വര്‍ഷമായി വഴുതനങ്ങ വാങ്ങുന്നവരാണ് ഫലസ്തീനികള്‍.

ആക്രമണം നടത്തുന്നത് ഇസ്രഈലാണ്‌, ഫലസ്തീനികള്‍ നടത്തുന്നത് പ്രത്യാക്രമണമാണ്. അതുകൊണ്ട്, ഫലസ്തീനികളുടെ കൂടെ മാത്രമാണ്.

content highlights: A sense of justice is growing among the Jews; One country is the solution