ഐ.പി.എല്‍ ചരിത്രത്തില്‍ 'കിങ്ങിനല്ലാതെ' മറ്റൊരുത്തനുമില്ല ഇങ്ങനൊരു റെക്കോഡ്!

ഐ.പി.എല്‍ 2026 ആരംഭിക്കാന്‍ ഇനി മണിക്കൂറുകളുടെ കാത്തിരിപ്പ് മാത്രമാണുള്ളത്. ടൂര്‍ണമെന്റിന്റെ 19ാം എഡിഷന്റെ ഓപ്പണിങ് മാച്ചില്‍ ഡിഫന്‍ഡിങ് ചാമ്പ്യന്‍മാരായ റോയല്‍ ചലഞ്ചേഴ്‌സ് ബെംഗളൂരു മുന്‍ ചാമ്പ്യന്‍മാരായ സണ്‍റൈസേഴ്സ് ഹൈദരാബാദിനെ നേരിടും. ആര്‍.സി.ബിയുടെ തട്ടകമായ ചിന്നസ്വാമി സ്റ്റേഡിയമാണ് വേദി.

മത്സരത്തില്‍ ഏവരുടേയും ശ്രദ്ധാകേന്ദ്രം ബെംഗളൂരു സൂപ്പര്‍ താരം വിരാട് കോഹ്‌ലിയായിരിക്കും. ഐ.പി.എല്ലിന്റെ 19ാം സീസണില്‍ വിരാടിന്റെ പ്രകടനം കാണാന്‍ ആരാധകര്‍ ആവേശത്തോടെ കാത്തിരിക്കുകയാണ്. ഹൈദരാബാദിനെതിരെ കളത്തിലിറങ്ങുമ്പോള്‍ ഒരു തകര്‍പ്പന്‍ റെക്കോഡ് കയ്യില്‍ കരുതിയാണ് വിരാടിന്റെ വരവ്.

ഐ.പി.എല്‍ ചരിത്രത്തില്‍ 1000+ ബൗണ്ടറി നേടുന്ന ഒരേയൊരു താരമാണ് വിരാട് കോഹ്‌ലി. ഏറ്റവും കൂടുതല്‍ ബൗണ്ടറി നേടുന്ന താരമെന്ന റെക്കോഡും വിരാടിന്റെ പോക്കറ്റിലാണ്. 1062 ബൗണ്ടറികളാണ് താരം ഇതുവരെ അടിച്ചെടുത്തത്. ഐ.പി.എല്ലില്‍ ഏറ്റവും കൂടുതല്‍ ബൗണ്ടറികള്‍ നേടുന്ന താരങ്ങളുടെ ലിസ്റ്റില്‍ സൂപ്പര്‍ താരം രോഹിത് ശര്‍മായാണ് രണ്ടാമന്‍. 942 ബൗണ്ടറികളാണ് താരം നേടിയത്.വിരാട് കോഹ്‌ലി

ഐ.പി.എല്ലില്‍ ഏറ്റവും കൂടുതല്‍ ബൗണ്ടറികള്‍ നേടുന്ന താരങ്ങള്‍

വിരാട് കോഹ്‌ലി – 1062

രോഹിത് ശര്‍മ – 942

ശിഖര്‍ ധവാന്‍ – 920

ഡേവിഡ് വാര്‍ണര്‍ – 899

ക്രിസ് ഗെയ്ല്‍ – 761

സുരേഷ് റെയ്ന – 709

എ.ബി ഡി വില്ലിയേഴ്‌സ് – 664

റോബിന്‍ ഉത്തപ്പ – 663

കെ.എല്‍. രാഹുല്‍ – 660

എം.എസ്. ധോണി – 639

2025ലെ ഫൈനലില്‍ പഞ്ചാബിനെ പരാജയപ്പെടുത്തിയാണ് ബെംഗളൂരു തങ്ങളുടെ കന്നി കിരീടത്തില്‍ മുത്തമിട്ടത്. സീസണില്‍ ഏറ്റവും കൂടുതല്‍ റണ്‍സ് നേടുന്ന മൂന്നാമത്തെ താരമാകാനും വിരാട് കോഹ്ലിക്ക് സാധിച്ചിരുന്നു. 15 മത്സരങ്ങളില്‍ നിന്ന് 657 റണ്‍സാണ് വിരാട് 2025ല്‍ നേടിയത്. മാത്രമല്ല 73* റണ്‍സിന്റെ ഉയര്‍ന്ന സ്‌കോറും 65.18 എന്ന ആവറേജ് 167.91 എന്ന സ്‌ട്രൈക്ക് റേറ്റും കിങ് നേടി. എട്ട് അര്‍ധ സെഞ്ച്വറികളാണ് താരം ഈ സീസണില്‍ സ്വന്തമാക്കിയത്.

മാത്രമല്ല ഐ.പി.എല്‍ ചരിത്രത്തില്‍ ഏറ്റവും കൂടുതല്‍ റണ്‍സ് നേടുന്ന താരമായിട്ടാണ് വിരാട് പതിനെട്ടാം സീസണ്‍ അവസാനിപ്പിക്കുന്നത്. 2008ല്‍ ആര്‍.സി.ബിയില്‍ അരങ്ങേറ്റം നടത്തിയ വിരാട് പിന്നീടുള്ള 259 ഇന്നിങ്‌സില്‍ നിന്നും 8661 റണ്‍സ് ആണ് നേടിയത്.

Content Highlight: Virat Kohli In Great Record Achievement In IPL History