പ്രിയദര്ശന്റെ സംവിധാനത്തില് മോഹന്ലാല് നായകനായ ചിത്രമാണ് ബോയിംഗ് ബോയിംഗ്. ലിസി, മാധുരി, അശ്വനി എന്നിവര് നായികമാരായ ചിത്രം ഒരു കോമഡി എന്റര്ടെയ്നറായിരുന്നു. മുകേഷ്, ജഗതി ശ്രീകുമാര്, സുകുമാരി, മണിയന്പിള്ള രാജു തുടങ്ങിയവര് അഭിനയിച്ച ചിത്രത്തിന് ഇന്നും വലിയ റിപ്പീറ്റ് വാല്യൂ ഉണ്ട്. 1965ല് ഇതേപേരില് ഇറങ്ങിയ ഒരു ഫ്രഞ്ച് ചിത്രത്തില് നിന്നാണ് പ്രിയദര്ശന് ബോയിംഗ് ബോയിംഗ് അണിയിച്ചൊരുക്കിയത്.
ശ്രീനിവാസനാണ് ചിത്രത്തിനായി തിരക്കഥ ഒരുക്കിയത്. ബോയിംഗ് ബോയിംഗ് എന്ന സിനിമയെ കുറിച്ച് സംസാരിക്കുകയാണ് വിനീത് ശ്രീനിവാസന്. ബോയിംഗ് ബോയിംഗ്, പ്രിയദര്ശന് ഒരു ഇംഗ്ലീഷ് സിനിമയില് നിന്നും എടുത്തതാണെന്ന് വിനീത് ശ്രീനിവാസന് പറയുന്നു. തന്റെ അച്ഛന് ശ്രീനിവാസന് ഇതൊരു ഇംഗ്ലീഷ് സിനിമ ആയിരുന്നു എന്നറിയാതെയാണ് ബോയിംഗ് ബോയിങ്ങിന്റെ തിരക്കഥ എഴുതിയതെന്ന് വിനീത് പറഞ്ഞു.
എനിക്കെപ്പോഴും ആ ഒറിജിനല് ബോയിംഗ് ബോയിംഗ് കണ്ടാല് കൊള്ളാം എന്നുണ്ട്. ഇതാണോ അതെന്ന് അറിയാന് വേണ്ടി. അല്ലെങ്കില് ഏതാണ് കൂടുതല് മെച്ചം എന്നറിയാന് വേണ്ടി. ആ സിനിമയുടെ പേരും ബോയിംഗ് ബോയിംഗ് എന്നുതന്നെയാണ്. പേര് പോലും മാറ്റിയിട്ടില്ല. പ്രിയന് അങ്കിള് അതിനെ കുറിച്ചൊന്നും കെയര് ചെയ്തിട്ടില്ല. അദ്ദേഹം ചെയ്യുന്ന സമയത്ത് അങ്കിളിന്റെ ഒരു ഫ്ളേവര് വരുമല്ലോ,’ വിനീത് ശ്രീനിവാസന് പറയുന്നു.