കാരക്കസ്: വെനസ്വേലന് മുന് പ്രസിഡന്റ് നിക്കോളാസ് മഡുറോയുടെ അടുത്ത അനുയായിയും കൊളംബിയന്-വെനസ്വേലന് വ്യവസായിയുമായ അലക്സ് സാബിനെ വെനസ്വേല അമേരിക്കയിലേക്ക് നാടുകടത്തി.
ശനിയാഴ്ചയാണ് വെനസ്വേലന് കുടിയേറ്റ ഏജന്സിയായ SAIME ഇത് സംബന്ധിച്ച വിവരം പുറത്തുവിട്ടത്. വെനസ്വേലയിലെ പുതിയ ഭരണകൂടവും അമേരിക്കയും തമ്മിലുള്ള സഹകരണം വര്ധിക്കുന്നതിന്റെ സൂചനയായാണ് ഈ നീക്കം വിലയിരുത്തപ്പെടുന്നത്.
2026 ജനുവരിയില് നിക്കോളാസ് മഡുറോയെ യു.എസ് പ്രത്യേക സേന പിടികൂടിയതിന് പിന്നാലെ ഫെബ്രുവരിയില് കാരക്കാസില് വെച്ച് നടന്ന സംയുക്ത ഓപ്പറേഷനിലൂടെയാണ് അലക്സ് സാബ് അറസ്റ്റിലായത്.
വെനസ്വേലന് നിയമപ്രകാരം സ്വന്തം പൗരന്മാരെ നാടുകടത്താന് കഴിയില്ലെങ്കിലും, സാബിനെ ഒരു ‘കൊളംബിയന് പൗരന്’ ആയിട്ടാണ് അധികൃതര് രേഖകളില് പരാമര്ശിച്ചിരിക്കുന്നത്
മഡുറോയുടെ സാമ്പത്തിക ഇടപാടുകള് നിയന്ത്രിച്ചിരുന്ന വിശ്വസ്തനായ ‘ബാഗ് മാന്’ ആയാണ് അമേരിക്കന് ഉദ്യോഗസ്ഥര് സാബിനെ കാണുന്നത്.
വെനസ്വേലയിലെ സി.എല്.എ.പി ഭക്ഷ്യ വിതരണ പദ്ധതിയുമായി ബന്ധപ്പെട്ട അഴിമതി ആരോപണങ്ങളും ഭവന നിര്മാണ കരാറുകളിലെ കോഴ ഇടപാടുകളും ഇദ്ദേഹം നേരിടുന്നുണ്ട്.
ആക്ടിങ് പ്രസിഡന്റ് ഡെല്സി റോഡ്രിഗസ് അധികാരം ഏറ്റെടുത്തതോടെ സാബിന് രാജ്യത്തെ സ്വാധീനം നഷ്ടപ്പെട്ടതായി റിപ്പോര്ട്ടുകള് പറയുന്നു. സാബിനെ കാബിനറ്റ് പദവികളില് നിന്നും വിദേശ നിക്ഷേപ ചുമതലകളില് നിന്നും റോഡ്രിഗസ് നേരത്തെ നീക്കം ചെയ്തിരുന്നു.
2020ല് കേപ് വെര്ദെയില് വെച്ച് അറസ്റ്റിലായ സാബിനെ 2023ല് തടവുകാരെ കൈമാറുന്ന കരാറിന്റെ ഭാഗമായി ജോ ബൈഡന് ഭരണകൂടം മാപ്പ് നല്കി വിട്ടയച്ചിരുന്നു. എന്നാല് പുതിയ അഴിമതി കേസുകളുടെ അടിസ്ഥാനത്തിലാണ് ഇപ്പോള് വീണ്ടും നാടുകടത്തിയിരിക്കുന്നത്.
നിലവില് നിക്കോളാസ് മഡുറോയും ഭാര്യ സിലിയ ഫ്ളോറസും നാര്ക്കോ ടെററിസം ഉള്പ്പെടെയുള്ള കുറ്റകൃത്യങ്ങളില് ന്യൂയോര്ക്കില് വിചാരണ നേരിടുകയാണ്.
Content highlight: Venezuela has deported Alex Sabin, a close aide to former Venezuelan President Nicolas Maduro, to the United States.
